Jerusalem Ndie Tiniɛ
4
Swanyiɛ titi kla,a kia jaa chiɛnri na,
pe Suminyuŋgo dnɛ
nyjɛ yi chiɛnri yire,
yi nyina mu wo lete na.
2 Pan Jerusalem leele na nyi
na swanyiɛ titi yi,
aŋga pan pe pe le na chɔ waara,
ŋga lewo choo tɛɛ mu faanri yi.
3 Hali ŋmbokuŋmboe kuraa
pe biile kaan nyinimi nyumu,
na pe poorii.
La, ni leele pre lɛɛ la,
pan pe nyi na krɔnisoolo
ŋmba u se to,
mu u pɔ kun mu wa wi.
4 Ŋga pe tia gbɔɔ
na pe bifimble kuu,
a pe ndile mbra pe nyu lam
kre ndra na,
ki tia biile pre na sro tali,
la, pe n ndro ta mbe u pe ŋga ka.
5 Leele mblɛ praa
sro taan lii fa kre,
aŋga klo ki pe kuu lete na,
mblɛ praa lii taan fa kre,
aŋga kafuŋgo na pe chrɛri na lii.
6 Ni leele pre ndie tiniɛ
wɛ Sodom leele na,
pe ndie tiniɛ na pe nyaanyaa,
a ndro nsra wa mbe pe shɔ.
7 Pan Jerusalem loplombo
na pe chasi na nyiɛsubie yi,
hali mna fniŋge mu wɛ nɔnɔ na,
a pe wejinyi na chiɛnri pe na,
a faŋgaa wa pe nu, mu yire yire.
8 La, fuŋga rɛ,
pan pe wɔ na kotari yi,
na mu pe nya kuraa
ma pe nyini chin.
Pe kaara shɔɔnri mu mbra pe kajle na,
a pe yua na kaan yi.
9 Pe mblɛ pra ku brɔfiɛn shiin
nyu na pre wo na prɔ,
pe mblɛ klo na fiŋge chiin
a pra chin mu ku kre na.
Ŋgi na hin?
Sro nsraa wa mbe ndro ta mbe li.
10 Kanyana sisaa ŋga kra to
ni leele pre na kre,
na tia chiɛlɛ mblɛ biile fooro
kraa wa pe na pre,
kuraa naa pe biile soori na kaa.
11 O Tafun Nyiɛkpɔɔ wre krɔ na kun titi,
a wra tia kanhun na pan,
mu wo Jerusalem na
mu ki sro putuu.
12 Ŋulo mblɛ pee wa
tra ŋga yiɛ na pre,
pe nsra ki shɔ mu li,
a pan chɔɔ waŋgra leele
nsra ki shɔ mu li,
na loŋgoolo we jaa tro
Jerusalem jlonwee nyu na.
13 La, kra ja mu pan ma,
pe keenyanyofɛɛnlɛ pre,
na srawɔfɛɛnlɛ pre sisam kee
nyjɛ praa pini kre kra tia.
Pre pra ya mna tia
pra leele frakafɛɛnlɛ pre gbo finfin.
14 Fuŋga rɛ, pan pe nyi na fuunlo lɛ,
na lami na tro lete na.
Pe peyɛ tɔ nɛɛrɛ ni,
mu tia nyimi pe dodonyi mana,
a ndro wa jaa kɛ taa pe na.
15 Ki tia leele na yuu pe pan mbo,
E laa o na e sɛ!
E le nɛɛrɛ nu.
Kena e laa kuraa o na,
yaa da o na.
A na pe fɛ mu sɛ na lami na
tro waŋgrɛ yire nu,
mbe praa yuu pe pan mbo,
wre na yire wa yila mna.
16 O Tafun Nyiɛkpɔɔ wre titi
u pe gbun mu nyina,
mu yiɛ wɔ pe na.
A u n na srawɔfɛɛnlɛ pre kaan buuro na,
a u n na nyɔɔ loplombo pre na na.
17 O na yiɛ wa mu le chiin mu fna,
o nduu mu yire
o nyinyi gedenyi yire na,
na waŋgra ka sri
mbe ki paan o shɔ, mu pra.
18 Loŋgoolo naa o dɔɔtaa,
a kra tia o nsra ja mbe yili lete na.
Pra o ble nyjɛ oo li nyu gbun,
ŋgi na hin? Na o kla nyjila da,
mbe o wo kɔ.
19 Leele mblɛ praa o kɔŋgɔ nini pre,
praa nyaanyaa mu wɛ nyuu na.
Pra o ni mu sɛ nyuɛ yire na,
mna sɛ ja na o sri tablɔ tra kre nu.
20 Pra ŋunu ŋmba o Tafun
Nyiɛkpɔɔ na wɔ,
a wra pe o ndra wre ta mu yii,
wre na o naa kaan
mbra jaa tni waŋgrɛ yire nu.
21 Edom leele mblɛ ee wa
Uz tra nu kre,
e ti mbe e yiɛshɔ.
La, yire chɔɔ pan kanyana paan e na,
ee gbɔ mbra fuula,
mbe yirɛ laala e na,
mbe e na tro wejiwaara.
22 Jerusalem leele e ndie tiniɛ
kre nyu we to.
Nyiɛkpɔɔ wa ti mbe e mu,
waŋgra fɔŋgɔ ŋga nu pe e yii
mu sɛ kre nu.
La, Nyiɛkpɔɔ we Edom waŋgra
kre leele ndie tini,
mbe pe sisam kee nyjɛ pe pe
yire kro wɔ fimi na.