Foorochiɛn Nyiɛtalaa
5
O Tafun Nyiɛkpɔɔ jande,kalɛɛ nyjɛ yi o nyaa kre sɔɔnri.
O le, imi na nyifɛɛrɛ o gbo mu da.
2 O krɔyira kre pan mu to fumblɔ kɛɛ,
waŋgra fɔŋgɔ leele pe pan
mu tni o kalonyi nu.
3 Loŋgoolo pan mu o lɛɛlɛ gbo,
mu tia o kaari bijile,
a o loolo kaari lekuchiɛlɛ.
4 Nyumu ŋga o gboo,
na kenyi nyjɛ oo gbɛɛri kuraa kre,
ndrɔshelee o yi loni.
5 Leele mblɛ pe o kɔŋgɔ nini pre o da,
o fna, a pia o ti mbe o wuu.
6 O na oyɛ nyjii mna Egypt,
na Assyria leele ŋga,
imi kie pe mbe o yaka ta mbe ka.
7 O tolɛɛlɛ na sisaa pe,
la, pre n wa aŋga na,
a wre na pe sisam nyjɛ pra pe
yire kanyana nyaa.
8 Tinlɛ pe kna na o le fuŋga,
a ndro n wa mbe o shɔ pe kɛɛ.
9 Na o sro chaa mbe li,
fɔna o o ŋmaa wa jenyje.
Ŋgi na hin?
Brɔfiɛn yiɛshiin kree wa
na tro tablɔ tra kre nu.
10 Klo titi tia wejinyi wɛɛri o na,
na kanhun pe le fnunu nu.
11 Pe o chiɛlɛ frɛ mu cha
Jerusalem na jaŋga na,
mu pe mblɛ pe n bilɛ chin kla
Judae chiɛ yire na.
12 Pe o ŋulo yii mu sɛ pe pɔ kɛnyi na,
mu pe hlu nyjeeri.
A pe n o loplombo pre le mu nya.
13 Pe tia o yirifumblɔ na kala nyaa
yua tre dnɛ na.
A o nyanyjɛbɛɛlɛ na kejenyi tru
na fuula yi tapan.
14 Loplombo pre n na jiin
kakpɔɔ kre jlonwee nyu na,
mbe pe kala li na,
a nyanyjɛbɛɛlɛ
pre n na yɛshɔɔrɔ mɛɛ kɔ na.
15 Yɛshɔɔrɔ kee n wa o tnimu nu na,
a yɔɔrɔ nyjɛ o naa yoo
yire kaari o pan nyɛnɛɛ.
16 Yirɛ nyjɛ yi o kaan yɛnyiŋge
kre n wa na.
O atɛ, ŋgi na hin?
O sisam pimi li.
17 Yire kee nyjɛ krɛrɛ tia o yiɛ je kpɔɔ,
a yotunyi tia o n na nyaa chiriri.
18 Ŋgi na hin? O kakpɔɔ kre ja,
a ŋmbokuŋmboe ki ta pe tni haa.
19 Ŋu o Tafun Nyiɛkpɔɔ wre,
wi ŋunu nyjila kro nu,
a mu ŋunumu lie wa,
hali mbe sɛ su dnunya nyukɔɔrɔ.
20 Mni a mu o kee fɛɛ,
mu laa o na, a ki mu ma hin?
21 O Tafun Nyiɛkpɔɔ jande,
ti mbe o ndru mbe pan
mu pan na,
na ki pan ma,
oo ndru mbe o yɛnyiŋge lɛɛ
kre ta na.
22 Ndee mu o je puli ra?
Ndee mu krɔ ŋga ki kun na o ni kre,
ki nyu wa jaa nyjii ra?