Srawɔfɛɛnlɛ Pre Nyinyi
42
A blɔ wre na ni wru a o na yili Suminyuŋgo kre lam, mna sɛ lawee vankam fimi wo kre lam, a wra ni nyina nyinyi yɛ mu na shie nyjeeri haa, yire na nyuŋgo ŋga kraa wa na shie Suminyuŋgo kre kre lalaa nsra le. 2 Kre nyuŋgo kre titnɔmu na wa fiiti lafaa na fuloe taarɛ na kɔɔnatarɛ, a ki valam naa fiiti fuloe jijirɛ na jijirɛ. 3 Kre nyuŋgo kre kokoo nunu naa wa na le Suminyuŋgo kre haa, a yi lalaa na pe fiiti fulo na kɛmbɔjijirɛ, a ki kokoo nunu kre naa wa na le lawee vankam fimi wo kre lawee ŋga pra le dnɛ ni kre nu. Pra kre nyuŋgo kre sin na abansru yi mu taala taarɛ, a yira wɛ wɛ yiyɛ na chɛchiɛri. 4 A mu na shie nyuŋgo kre nyjeeri haa kre, trohaa naa wa wa, a ki valam naa fiiti kɛmbɔkɔɔnanu, a ki titnɔmu naa fiiti lafaa na fuloe taarɛ na kɔɔnatarɛ. A jlonwee nyu naa wa kre kokoo kre na. 5 Abansru nyjeeri wo kre naa fiɛn mu wɛ lalaa wo kre na, a lalaa wo kre naa fiɛn mu wɛ ki nɔɔ wo kre na. 6 Ki nyinyi nyjɛ yiraa wa nyjeeri yire nsraa wa na pilɛɛsi ni na ki nɔɔ wo kre yi, ki tia yire nyini yire naa fiɛn fiɛn, yi nsra da na ki lalaa, na ki nɔɔ nyinyi yire ni. 7 Mu na shie nyjeeri haa kre, pra mboo ka sin wa, a ki titnɔmu naa fiiti fuloe jijirɛ na jijirɛ. 8 A nyinyi nyjɛ yiraa wa lawee vankam kre lam kre titnɔmu naa fiiti fuloe jijirɛ na jijirɛ, a nyjɛ yiraa wa na mbra Suminyuŋgo kre na yire titnɔmu naa fiiti lafaa na fuloe taarɛ na kɔɔnatarɛ. 9 Na ndro yire lawee vankam kre fimi haa mbe le jaara nyinyi yire nu kre, kolo naa wa mu yire yila finhaa wa.10 Nyinyi naa wa lawee vankam fimi wo kre mboo kokoo ŋga kraa shie tapan haa kre nu, mna yiɛ kan lawee vankam fimi wo kre na. 11 A kolo naa wa mu tro yi yiɛ. Pan yire nyinyi yire na nyi na nyjɛ yiraa wa na shie nyjeeri haa yire yi. Yi titnɔmu, na yi valam na yila, yi krɔɛ nyu, na nyini yire damu kro naa nunu. 12 Yire nyinyi yire krɔɛ nyu naa wa na shie mboo kre nyukɔɔrɔ haa, na shie yilafin haa.
13 A blɔ wre na yo ni pan mbo, “Nyjeeri, na tapan haa nyinyi yire yi yiɛ kan Suminyuŋgo kre lawee vankam fimi wo kre na kre, srawɔfɛɛnlɛ pre nyinyi yi, bawa o Tafun Nyiɛkpɔɔ srawɔfɛɛnlɛ pre we na pe sra sro cheche yire kaa. A bawa pie na sra wɔ yirɛ cheche titi yire teeri, shɔlɔ sra yire, na sisam sra, na pimi sra yirɛ yire kro teeri, ŋgi na hin? Bawa pe cheche. 14 Na ki pan na srawɔfɛɛnlɛ pre le Suminyuŋgo wa mbe yili kre, pia shia pe sɔfum dodonyi yire ti peyɛ na mbe pan lawee vankam fimi wo kre nu, fɔna pe pe sɔfum dodonyi yire wɔ mu tɛɛ tun, ŋgi na hin? Sɔfum dodonyi yire pe cheche. Pre titi dodonyi ki fna pe le mbe chiin da lawee ŋga nu leele pre nyi kre nu.”
15 Ŋga blɔ wre na Suminyuŋgo lam kre kra mu kɔ kre, a wra yili na ni ni jlonwee ŋga ki shie yila fin haa kre nu, mna ki lawee kre kra mu ki fɛ mu kun. 16 A wra krayira kre tɛɛ mna ki yila finhaa kre kra, a kra pe fiiti lafɛɛ kɔɔnatarɛ na fuloe shiin. 17-19 A wra ki nyjeerihaa, na ki tapan haa, na ki yilatohaa yire kro kra, yi kokoe yire kro na yila, yiraa fiiti lafɛɛ kɔɔnatarɛ na fuloe shiin. 20 Mboo pra sin mu ki fɛ mu kun, a yi kokoe jijirɛ yire kro na yila, yiraa fiiti lafɛɛ kɔɔnatarɛ na fuloe shiin ki kokoe yire kro na, mu fɛ mu kun. Kena mboo kre kra ŋga ki pe cheche, na ŋga ki n pe cheche kre lalaa yɔ.