3 A blɔ wre na nyaari mu le ki nyuŋgo too wa, wra ki krɔ kre nyu kra, a ki lam jijuom na pe fiiti taarɛ, a ki valam naa fiiti kɛ, a ki mboo kre gbidiŋge na pe fiiti kɛmbɔshiin yi kokoe yire kro na. 4 A wra nyuŋgo too kre lam kra, ki kro naa fiiti fulo na kɛmbɔjijirɛ mu fɛ mu kun. Kre nyuŋgo kre naa wa nyuŋgo lalaa wo kre kro, a blɔ wre na yo ni pan na, “Cheche Ndoo Titi kre yi kre.”

5 A wra suminyuŋgo kre mboo kre gbidiŋge kra, kraa fiiti kɛ. Nyinyi bɛɛlɛ yɛ naa wa mu Suminyuŋgo kre titi fɛ mu kun, a yi kro valam naa fiiti kɔɔnashinshin. 6 Yire nyinyi yire, pra yi sin na abansru yi mu taala taarɛ yɛ na, yi taa mu nunu naa wa nyinyi fulo na kɛ. Yiraa wa Cheche Ndoo Titi kre mbɛɛ na. Pra yi sin mu taa Suminyuŋgo kre mboo jenu na, yi nsra le mboo kre. 7 Nyinyi bɛɛlɛ yire yira Suminyuŋgo kre fɛ mu kun yire na tia na mu nyuŋgo kre le ki nyjeeri haa kre na vala mu wɛ ki tapan kre na. Pra nyinyi yire sin na abansru yi mu taala taarɛ, a kra tia na ndro ndru na shie ki nyjeeri mu nya na nyinyi yire vala mu sɛ nyjeeri. A pra nduu haa pe mu yire nɔɔ wo kre na, mu sɛ su nyjeeri wo kre na, mna tro na ki ni lalaa wo kre nu.

8 Dnɛ ni pra Suminyuŋgo kre, na nyinyi bɛɛlɛ yire nɔɔ le mu taa, a ki nɔɔ kre gedem naa fiiti kɛ. 9-10 Abansru nyinyi yire mboo kre gbidiŋge naa fiiti kɔɔnatarɛ, nyinyi nyjɛ yira mbra yi na kre na yire lalaa naa fiiti fulo na kɛmbɔjijirɛ, yaka nsraa wa yi lalaa kre nu. 11 Nyinyi nyjɛ nu praa yirɛ teeri yire nyjɛ yiraa wa na shie Suminyuŋgo kre nyjeeri haa yire kolo naa nunu, a yi nyjɛ yiraa wa na shie tapan haa yire nyu naa nunu. Pra nyinyi nyjɛ nu praa yire teeri yire nɔɔ le a yira yili mboo kre kro, yi nyjɛ yira yili fimi na kre naa fiiti kɔɔnatarɛ. 12 Nyuŋgo ka naa wa na shie Suminyuŋgo kre yila tohaa, mna kun ki yɛ na, ki titnɔmu naa fiiti lafaa na fuloe shiin na kɛ, a ki valam na pe fiiti lafaa na kɛmbɔkɔɔnanu, a ki mboo kre gbidiŋge na pe fiiti kɔɔnanyjirɛ mu fɛ mu kun.

13 A blɔ wre na Suminyuŋgo kre titnɔmu kra, a kra pe fiiti lafaa na fuloe taarɛ na kɔɔnatarɛ. A wra yire ki mboo kre kro, mna lawee ŋga pra wa mu mbra ki na kre kra mu ya, mna sɛ su nyuŋgo ŋga kraa wa na shie ki yila tohaa kre na, a kra pe fiiti lafaa na fuloe taarɛ na kɔɔnatarɛ. 14 Suminyuŋgo kre lawee vankam ŋga kraa wa na shie yila finhaa kre, na ki yiɛ wa kro valam na da fiiti lafaa na fuloe taarɛ na kɔɔnatarɛ.

15 A blɔ wre na nyuŋgo ŋga kra yiɛ kan lawee vankam kre nu kre kra, na nyinyi bɛɛlɛ yire ni kro, a yira pe fiiti lafaa na fuloe taarɛ na kɔɔnatarɛ. Suminyuŋgo kre jlonwee nyuŋgo kre, na cheche ndoo kre, na cheche ndoo titi yire kro.

16 Pra yire tra mna yi tɔ na taaboe ni mu sɛ su ki vromboe yire na, a pra yi vromboe yire mbɛɛlɛ tɔ tɔ. 17 Suminyuŋgo kre mboe yire lam kre, pra yirɛ kaanri ki na mu sɛ su krɔɛ yire ndra na. 18 Cherubim, na shuɛ tinyi pra kaanri mboe yire na, na pe shuɛ tiŋge pe, mbe pe Cherub pe mbe taa, Cherubim pre yiɛ naa shiinshiin. 19 Pra Cherubim yiɛ nunu pe na lewo wi kra shuɛ tiŋge le kokoo nunu na, a u yiɛ kokoo na pe jira yiɛ mu na shuɛ tiŋge le kokoo nunu na, pra pe pe mu nyuŋgo kre lam fɛ mu kun. 20 Hali mu yire tra mu sɛ su krɔɛ yire nyjeeri kro praa wa yi na.

21 Krɔɛ jeelee nyjɛ yiraa wa Cheche ndoo wa jenu jijirɛ yire kro na yila. 22 Cheche Ndoo titi kre jlonwee nyu na wa ndaa yira ka nya na kɛɛn sragbunu yi. Ki gedem naa fiiti kunɔ, a ki valam naa fiiti jijirɛ, a pra ki mbɛɛlɛ yire kro tɔ na taaboo ni. A blɔ wre na yo ni pan na, “Kre tebru ŋga ki yire o Tafun Nyiɛkpɔɔ wre yiɛ kre.” 23 Cheche Ndoo kre, na Cheche Ndoo titi kre kro krɔɛ bie naa shiin shiin yi na. 24 Krɔɛ yire bie naa shiin shiin, mbe jaa nyaa mbe sɛ kokoe shiin yire kro na. 25 Pra shuɛ tinyi, na Cherubim pre plɛ kaanri Cheche Ndoo krɔ kre na, imi na pra yi kaanri mboe yire na kre. A pra kɛɛn tɛɛ mna bambae nyjɛ yiraa wa krɔɛ yire fimi haa kre tɔ. 26 A nyinyi bɛɛlɛ yire kro vromboe naa wa yi na, a pra shuɛ tinyi kaanri yi mboombɛɛ yire na mu yi san.