5 Bawa ndaa nya na pe mboo sin mu Suminyuŋgo kre lawee fɛ mu kun. A blɔ wre u kaan yirɛ kra wo kre wru, ki titnɔmu na pe fiiti kɛ, a wra sɛ mboo kre kra na ki ni, ki gedem na pe fiiti kɛ, a ki gbidiŋge na pe fiiti kɛ na.

6 A wra sɛ jlonwee ŋga kraa yiɛ kan yila fin haa kre nu, mna nduu ki nduu yirɛ yire na mna sɛ ki ndra kre kra, ki lam jijuom naa fiiti kɛ. 7 Bawa lawee shiefɛɛnlɛ pre nyinyi na nyi, nyinyi yire kro lam naa fiiti kɛ kɛ mu fɛ mu kun. A pra mboe sin nyuŋgo na nyuŋgo lalaa, a yi gbidinyi naa fiiti kɔɔnatatarɛ. Pra tro haa wɔ shiefɛɛnlɛ nyinyi yire yiɛ, a ki titnɔmu na pe fiiti kɛ, a na mu nyinyi yire nyu kɔ, tro haa kre naa wa mu yili jlonwee nyuŋgo ŋga kra yiɛ kan Suminyuŋgo kre na.

8-9 A wra ki kra, a ki lam kre na pe fiiti kɛmbɔjijirɛ. A ki mboo kre gbidiŋge na pe fiiti jijirɛ.

10 A jlonwee ŋga kraa wa na shie kre lam kre, shiefɛɛnlɛ nyinyi yire taarɛ naa wa kokoo nunu na, a taarɛ naa wa kokoo nunu na, a yi kro na yila yila, a mboe nyjɛ pra sin yi lalɛɛ nu yire kro gbidinyi na yila. 11 Blɔ wre na lawee ŋga nu mu tro mbe pan krɔ kre nyu na kre kra, a ki valam na pe fiiti fulo na shiin, la, jlonwee nyu titi kre naa fiiti kɛmbɔkɔɔnanu. 12 Pra bunyi sin sin shiefɛɛnlɛ pre nyinyi yire yɛsimi, a yi gedem na pe inchi fulo, a yi gbidinyi na pe inchi fulo, a nyinyi titi yire lam naa fiiti kɛ mu fɛ mu kun. 13 A wra yire shiefɛɛnlɛ pre nyinyi yire nunu mboo kre krɔ, mna ki kra mu sɛ su nunu ŋga kra yiɛ kan ki na na, a yi valam na pe fiiti fuloe shiin na shiin. 14 A wra jlonwee nyuŋgo kre kra mu tro ki tro haa kre nu, a ki valam na pe fiiti fulo na kɛmbɔjijirɛ. 15 Mu yire jlonwee nunu na, mu sɛ su shiin wo kre na kre naa fiiti fuloe jijirɛ na jijirɛ. 16 Pra vromboe bɛɛlɛbɛɛlɛ wɔ nyinyi yire krɔ, yiraa le fimi na, a yɛ naa wa lam na. Pra shuɛ tinyi kaanri mboe lam wee yire na, a yira yiɛ kan jlonwee kre na.

17 A blɔ wre na ni wru mna tro na ni ni jlonwee kre nu mna sɛ na ni ni lawee vankam kre nu. Bawa ndaa nyinyi fulo na kɛ yɛ nya, a pra yi sin mu lawee kre fɛ mu kun. A pra lawee vankam kre lam le dnɛ ni mu fɛ mu kun. 18 Kre lawee vankam kre naa wa tra mu wɛ lam wo kre na. 19 A blɔ wre na yire jlonwee lam wo kre na, mna lalaa kre kra mna pan mu su lawee vankam lam wo kre jlonwee nyu na, a kra pe fiiti lafaa na fuloe taarɛ na kɔɔnatarɛ.

20 A blɔ wre na sɛ jlonwee ŋga kra yiɛ kan nyjeeri haa mu to lawee vankam fimi wo kre nu kre valam na titnɔmu kra. 21 Ki lawee shiefɛɛnlɛ nyinyi yire, na mboe nyjɛ pra sin yi lalɛɛ kre, na jlonwee nyuŋgo kre, na jlonwee ŋga kra yiɛ kan yilafin haan wee yire kro na yila. Jlonwee kre titnɔmu naa fiiti fuloe jijirɛ na jijirɛ, a ki valam naa fiiti fuloe shiin na shiin. 22 Jlonwee nyuŋgo kre, na vromboe, na shuɛ tinyi nyjɛ pra kaanri mboe yire na kre, na nyjɛ yiraa wa jlonwee ŋga ki yiɛ kan yilafin haa na kre wee yire kro naa nunu. Taan nduu yirɛ kɔɔnashin mu nduu mbe chiin da jlonwee kre titi na. 23 Jlonwee naa wa mu sɛ yili lawee vankam lam wo kre nu mna yiɛ kan nyjeeri haa jlonwee kre na imi na ka naa wa yilafinhaa wa kre. A blɔ wre na jlonwee fimi wo kre, na lam wo kre lalaa kra a kra pe fiiti lafaa na fuloe taarɛ na kɔɔnatarɛ.

24 A blɔ wre na sɛ na ni ni jlonwee tapan haa kre nu, mna ki mboe na ki jlonwee nyuŋgo kre kra, kre na jlonwee shiin nyjɛ wra klu mu kra kre na yila. 25 Vromboe bɛɛlɛbɛɛlɛ naa wa shiefɛɛnlɛ nyinyi yire, na jlonwee nyuŋgo kre na, pan yira nyi to na jle wee yire, a ki jlonwee kre titnɔmu naa fiiti fuloe jijirɛ na jijirɛ, a ki valam fiiti fuloe shiin na shiin. 26 Taan nduu yirɛ kɔɔnashin mu nduu mbe chiin le ki nu, a ki jlonwee nyuŋgo kre na yiɛ kan lawee vankam kre na. A pra shuɛ tinyi kaanri ki lam mboe yire na. 27 Lawee vankam lam wo kre jlonwee kre na yiɛ kan na shie tapan haa, a blɔ wre na lawee vankam fimi wo kre na lam wo kre lalaa kra, a kra pe fiiti lafaa na fuloe taarɛ na kɔɔnatarɛ.

28 A blɔ wre na tro na ni ni jlonwee ŋga kraa wa na shie tapan haa kre na, mna pan na ni ni lawee vankam lam wo kre nu. Mna jlonwee tapanhaa wo kre kra. Pan kra da na jlonwee hɛnyi yire ni. 29-30 Lawee shiefɛɛnlɛ nyinyi yire, na jlonwee nyu nyinyi yire, na mboe lam wee yire kro naa nunu, pan jlonwee nyu hɛnyi yire kro na nyi. Vromboe naa wa nyinyi nyjɛ yiraa wa jlonwee nyu kre na mu fɛ mu kun, a jlonwee kre titnɔmu naa fiiti fuloe jijirɛ na jijirɛ, a ki valam naa fiiti fuloe shiin na shiin. 31 Lawee vankam lam wo kre jlonwee nyinyi yire na yiɛ kan lawee vankam fimi wo kre na, a pra shuɛ tinyi kaanri ki mboe yire na. Mu taan mbe nduu gbee kɔɔnatarɛ mbe chiin le lawee vankam lam wo kre nu.

32 Blɔ wre na sɛ na ni ni jlonwee ŋga kraa wa na shie yila fin kre nu, mna jlonwee kre kra, kre na jlonwee hɛnyi yire na yila. 33 Shiefɛɛnlɛ nyinyi yire, na jlonwee nyuŋgo kre, na ki mboe lam wee yire, na jlonwee hɛnyi yire wee na yila. Vromboe naa wa mu nyinyi yire fɛ mu kun, a jlonwee nyuŋgo kre chɔɔ vromboe naa wa ki na. Jlonwee kre titnɔmu naa fiiti fuloe jijirɛ na jijirɛ, a ki valam naa fiiti fuloe shiin na shiin. 34 Ki jlonwee nyuŋgo kre na yiɛ kan lawee vankam fimi wo kre na, a pra shuɛ tinyi kaanri ki mboe yire na. Mu taan mbe mbe nduu gbee kɔɔnatarɛ mbe chiin le lawee vankam kre nu.

35 A blɔ wre na sɛ na ni ni jlonwee ŋga ki shie nyjeeri haa kre nu, ŋga wra ki kra kre, na kre na jlonwee hɛnyi yire kro yila. 36 Shiefɛɛnlɛ nyinyi naa wa ki nu na, a pra ki mboe yire san na yirɛ ni na, a jlonwee nyuŋgo naa wa ki nu, pan vromboe yire na ki fɛ mu kun na. Jlonwee kre titnɔmu naa fiiti fuloe jijirɛ na jijirɛ, a ki valam naa fiiti fuloe shiin na shiin. 37 Ki jlonwee nyuŋgo kre chɔɔ na yiɛ kan lawee vankam fimi wo kre na, a pra shuɛ tinyi kaanri ki mboe yire na mu ki san. Mu taan mbe nduu gbee kɔɔnatarɛ mbe chiin le jlonwee kre nu.

38 Pra nyuŋgo ka pe lawee vankam fimi wo kre lam, a kra mbra jlonwee lam wo kre mbɛɛ na, na shie nyjeeri haa. A ki nyu naa wa jlonwee nyuŋgo ŋga kra yiɛ kan lawee vankam kre na kre nu. A na pe sra yurɛ mblɛ pe sroi popomblo pre gbo mu kɔ, bawa praa pe jee. 39 Kre nyuŋgo kre lam kre, tebru jijirɛ yiraa wa ki nu, shiin naa wa kokoo nunu na, a shiin naa kokoo nunu ŋga na. Yire tebru yire na praa yurɛ pre kuu, mbe chiin pe tɛɛ mbe sra wɔ, praa yurɛ sroo sra, na sisam sra woni, mnaa plɛ teeri na nyu yoo sra woni. 40 A nyuŋgo kre fimi na chɔɔ, pan tebru yire jijirɛ naa wa mu yire ki jlonwee kokoe shiin yire na, mu na shie nyjeeri haa krɔ kre lawee. 41 Kena tebru nyjɛ na praa yurɛ pre kuu kre naa kɔɔnatarɛ, jijirɛ na wa lam, a jijirɛ na wa lawee vankam kre lam. 42 Tebru jijirɛ nyjɛ yiraa wa lawee vankam kre lam kre, yire na praa yurɛ pre gbeele mbe chiin pe sro popomblo mbe sra wɔ, dnɛ pra tɛ mna yire tebru yire pe. Yi gedem naa inchi fulo, a yi ndra yire naa inchi fulo na kɛ mu fɛ mu kun. Yirɛ nyjɛ ni praa yurɛ pre kuu yire kro bawa praa yi taari. 43 Pra tɔɔnrɔ nyu kru kokoo shiin shiin na, a yira pe na srugu yi, a yi titnɔmu naa inchi tataarɛ, mna yi hlu hlu mboombɛɛ yire na. Tebru yire na praa yurɛ mblɛ ni praa sra woni pre kaara taari.

44 A blɔ wre na sɛ na ni ni lawee vankam lam wo kre nu. Bawa ndaa nyinyi shiin yɛ nya, a yi nyu naa wa lawee vankam kre lam, a nunu na yiɛ kan tapan haa, mu mbra jlonwee nyjeeri haa wo kre na, a nunu na yiɛ kan nyjeeri haa, mu mbra jlonwee tapan haa wo kre na. 45 A blɔ wre na yo ni pan na nyuŋgo ŋga ki yiɛ tɛɛ tapan haa kre, srawɔfɛɛnlɛ mblɛ pe tnumu tuni Suminyuŋgo kre nu pre wo yi. 46 A nyuŋgo ŋga ki yiɛ tɛɛ nyjeeri haa kre, srawɔfɛɛnlɛ mblɛ pe tnumu tuni sragbunu na pre wo yi kre. Zadok nɔɔ leele nu srawɔfɛɛnlɛ pre kro yili, a pre chiin pe yiri Levi jlom na mbe jaa sɛ o Tafun Nyiɛkpɔɔ wre yiɛ, mbe sɛ tnumu tun u pan.

47 A blɔ wre na sɛ lawee vankam lam wo kre kra, a kra pe fiiti lafaa na fuloe taarɛ na kɔɔnatarɛ mu fɛ mu kun. Suminyuŋgo kre naa wa na shie ki yila tohaa, a sragbunu naa wa mu yire ki yɛsimi.

48 A blɔ wre na sɛ na ni ni Suminyuŋgo kre jlonwee nyuŋgo kre nu, a wra jlonwee kre kra, ki lam jijuom naa fiiti kɔɔnanyjirɛ, a ki valam naa fiiti fulo na jijirɛ, a ki mboo kre gbidiŋge naa fiiti kunɔ. 49 Kre jlonwee nyu nyuŋgo kre titnɔmu naa fiiti fulo na kɛmbɔjijirɛ, a ki lam kre jijuom na fiiti fulo, a pra taan nduuhaa pe ki na, mna pilɛɛsi shiin sin a yiraa wa yi kokoe shiin yire na.