7 Mbe ti mbe Israel leele ni mɛɛ cheche kre chin. A mba ti mbe pe ni mɛɛ cheche kre kla na, mbe ki ti waŋgrɛ yire chin na mi wi Israel leele Tafun Nyiɛkpɔɔ cheche wre. 8 Kre kee ŋga paan, a kie pe. Pan mi e Tafun Nyiɛkpɔɔ wre yo. Kre ble ŋga, ni ki kee yo mu tɛɛ fa na kie pan.

9 Na ki ble kre waa to, Israel leele mblɛ pee wa chiɛ lam kre we yili mbe sɛ ŋunɔwiyirɛ koli mbe paan yi pe kejenyi, mbe yi sro. Ŋunɔwiyirɛ bɛɛlɛ na kpɔɛ, na bɛnyi na snimi, na gblumbu nyjɛ ni pe wii, na chomboolo kro, pie yi koli mbe ya. Yɛlɛ nununu kɔɔnashin na yire pie na gbeerii. 10 Na kre nyjila kre waa da, kia shian na Israel leele we sɛ kejenyi cha nyaa, ndee mbe sɛ yɛ cha klɔɛ nu, ŋgi na hin? Ŋunɔwiyirɛ pie na gbeerii. A leele mblɛ pra pan mu pe foolo, mna pe ju kre, pie pe ta mbe foolo mbe pe ju ka na. Pan mi e Tafun Nyiɛkpɔɔ Jaŋgafun wre yo.

11 Kre ble kre mbe ti pe Gog na u ŋunɔwifɛɛnlɛ tataara pre le Israel na. Abarim landɛɛ ŋga kii wa na shie epo weŋge wo kre kre nu, bawa pie pe koli mbe sɛ le. Pe faŋga kre we kpɔɔ, kie ti ndro ŋmba we na chaa mbe tro landɛɛ kre nu kpan, wa lawee ta mbe tro. Mbe praa landɛɛ kre yeeri Hamon-Gog.

12 Nyiɛpɔ kɔɔnashin, na Israel leele pree wa na gboolo pre leni, imi kie pe mbe tra kre pe chasi. 13 Leele mblɛ pee wa tra kre nu kro we ya mbe pe gboolo pre le, a ŋga ble pie fni mbe ni ŋga yɛnyiŋge kre, kie pe ble kpɔɔ ŋga pie na sɔɔnri. Pan mi e Tafun Nyiɛkpɔɔ Jaŋgafun wre yo.

14 Nyiɛpɔ kɔɔnashin yire kɔkro kre, pie bilɛ plɛ wɔ mbe pe kila mbe gboolo pre hamblɛ cha tra kre nu mbe tro, mbe plɛ na gboolo pre leni, imi kie pe mbe nɛɛrɛ wa tra kre tɔ. 15 Na pe kila mu sɛ gboo kajle da haka kre, mbe pe ki lawee tnɔ yira ni, kena fanyi tuufɛɛnlɛ pre pan mbe ki wru mbe sɛ le Hamon-Gog landɛɛ kre nu, 16 A chia ŋga pe yeeri Hamonah kre we pe wa na, na pe kɔ kie ti mbe tra kre ndru mbe pe chasi.”

17 Ezekiel, lewo pɔ, Kee ŋga mi e Tafun Nyiɛkpɔɔ Jaŋgafun wre yuu yi kre, hanyiɛlɛ, na yurɛ kro yeeri, mbe pe kro pan mbe fni mbe sra ŋga mbe wɔ mbe pe ŋga kre li. Sra kpɔɔ ka mbe wɔ Israel nyuɛ yire na. Bawa pie kaara ta mbe ka, mbe nyimi ta mbe gbɔ. 18 Ee jaŋgafɛɛnlɛ kaara ka wa, mbe waŋgrɛ ŋulo nyimi ta mbe gbɔ, mbe ki pe na mbapilɛ, na mbaloolo, na sikaala, na nablɛm nyina wolo mblɛ ni pe yiri Bashan na nyimi e ta na gboo. 19 Kre sra ŋga mbe wɔ mbe e ŋga ŋga, ee nyina ka chiin mbe yɔɔ, mbe nyimi gbɔ chiin mbra fuula. 20 Ni lihaa wa ee pan mbe li, mbe soolo, na pe nduufɛɛnlɛ, na jaŋgafɛɛnlɛ, na ŋunɔwifɛɛnlɛ nyininyini kaara ka mbe yɔɔ. Mi e Tafun Nyiɛkpɔɔ Jaŋgafun wre ni ki yo.

21 Mbe ni yɛnyiŋge wɔ mbe waŋgrɛ yire nyina, kre waŋgrɛ yire we jaŋga ŋga ni ni pe ndie tinii kre nya. 22 Mu yire kre ble kre na shie kre, Israel leele pre we chin na mi wi pe Tafun Nyiɛkpɔɔ Jaŋgafun wre. 23 A waŋgrɛ yire kro leele we chin na Israel leele pre sisam kra tia pra pe yii mu sɛ tra ka nu. Ŋgi na hin? Pe nsra kpra wru na ni ni. A kra tia ndaa yiɛ wɔ pe na, mna pe wru mu le pe loŋgoolo kɛɛ, a pra pe gbo brɔfiɛn yiɛshiin ni. 24 Pe nɛɛrɛ kee, na pe kefuɛn yire praa pini kre ndaa le mna yiɛ wɔ pe na mu pe pe imi na ki fna.

25 Ki tia o Tafun Nyiɛkpɔɔ Jaŋgafun wre na yo mbo, “Fuŋga rɛ, mbe nyu Jacob nanae mblɛ Israel leele pre na, a mbe ti mbe pe ndru mbe peyɛ ta na, mbe ni yiɛ nyina ni mɛɛ cheche kre na. 26 Na ki waa pan ma, pie pe nyifɛɛrɛ kee nyjɛ praa pini, na kpra ŋga pe nsraa lii na ni ni kre fɛɛ, kre nyjila kre yaka nsraa pe tɔɔra, a fiɛrɛ nsraa pe yiri tra kre nu. 27 Na ndaa pe wɔ mu yili waŋgrɛ yire nu pe loŋgoolo pre kɛɛ kre, mbe yire pe na mbe ni yɛ wɔ mbe waŋgrɛ tataara nyina na ni pe cheche. 28 Kre pie chin na mi wi pe Tafun Nyiɛkpɔɔ Jaŋgafun wre. Kii wa na ndaa tia pra pe yii mna sɛ waŋgrɛ nu, mbe ndru mbe pe yoori mbe tro mbe pan na pe ni pre titi tra nu, pe nunu chom kuraa wa kro. 29 A mba yiɛ wɔ pe na na, ŋgi na hin? Mbe Israel leele pre ŋga ni Ŋumu. Mi e Tafun Nyiɛkpɔɔ Jaŋgafun wre ni ki yo.”