Gog We Israel Leele Tɔ
38
O Tafun Nyiɛkpɔɔ wre na yo ni pan mbo, 2 “Ezekiel lewo pɔ, ni kee shɔ mu yo mu Gog taan, wre u ŋunumu lii waŋgrɛ nyjɛ pe yeeri Meshech, na Tubal nyjɛ Magog tra nu yire na. 3 Yo u pan na, ‘Kee ŋga mu Tafun Nyiɛkpɔɔ Jaŋgafun wre yuu yi kre. Mbe wre Gog ndie tini.’ Wre u ŋunumu lii Meshech na Tubal na. 4 Mbe u yiɛ viŋge mbe kna, mbe u yii drawa ni gbekɛɛn nu, mbe u tini mbe yili wa, wre na u ŋunɔwifɛɛnlɛ, na pe soolo, na soolo nduufɛɛnlɛ mblɛ pe peyɛ kna, na leŋunɔ mblɛ pe pe wiyirɛ bɛɛlɛ na kpɔɛ yii yii ni, na pe brɔfiɛn yiɛshiin ni kɛɛ. 5 Persia, na Ethiopia, na Libya ŋunɔwifɛɛnlɛ kro we ya pe na, pre na pe ŋunɔwiyirɛ ni kɛɛ. 6 Gomer, na Beth-Togarmah trɛ yire ŋunɔwifɛɛnlɛ tataara mblɛ pe yire nyjeeri haa kre we chaa pe nu.7 Ezekiel, yo pe pan na pe peyɛ kna, mbe pe ŋunɔ wifɛɛnlɛ tataara pre yeeri mbe paan fni titɛɛ, mbe u yiɛklu pe pan. 8 Yɛlɛ yɛ kɔkro kre, mbe ti mbe e sɛ wi na tra ka leele ni, pra sɛ ŋunɔ wi, a ndaa sɛ pe yoori waŋgrɛ nu mu pan na pe ni Israel nyuɛ nyjɛ yi sni waara mu mu yire na, a pe pan mu tni wejinyiŋge nu. 9 Yire na e ŋunɔ wifɛɛnlɛ tataara pre, na waŋgrɛ nyjɛ yie ya e na pre we yiri mbe wi na pe ni, pan ee pe na nyiɛ fuflɛ ki gbuun na paan pe pan, mbe paan pe tɔ na tlo ki pan mu tra kre tɔ.
10 Kee ŋga o Tafun Nyiɛkpɔɔ Jaŋgafun wre yuu Gog pan yi kre mbo, ‘Na kre ble kre wa da, mu sisam kee nyjɛ kro jawa mu ndra. 11 Mu yo na, mbe tra ŋga chiɛ nyjɛ pe n mboe sin mu fɛ mu kun, a krɔɛ n wa yi na yire tɔ, pee wa mu tni wejinyiŋge nu, a yaka n na pe tɔɔra. 12 Mbe sɛ pe foolo pe chiɛ nyjɛ yira juari fa, a pe ndru mu yi sin na yire na. Waŋgrɛ nu pra nyi, a pe ndru mu pan na pe ni. Pe kɛ nyu, a pɔɔri yurɛ wa pe pan, a pee wa mu tni waŋgra ŋga lalaa.’ 13 Ki ble kre, Sheba, na Dedan, na Tarshish jafalifɛɛnlɛ, na yi seechiɛ yire kro we pan mbe ŋu Gog wie na, ‘Mu pan na mu leŋunɔ pre ni, mbe paan swafiŋge, na swanyiɛ, na pɔɔri yurɛ, na yirɛ tataara foolo mbe sɛ ra?’
14 Kena Ezekiel, lewo pɔ, ni kee shɔ mu yo Gog pan na, ‘Kee ŋga mi mu Tafun Nyiɛkpɔɔ Jaŋgafun wre yuu yi kre, kena kre nyjila kre, na ni leele Israel wolo pree wa wejinyiŋge nu, ma ki chin ra? 15 Kre nyjila kre ŋu na waŋgrɛ tataara we yiri haalee nyjeeri haa wa mbe pan, na e paan soolo na yire na e ŋunɔwifɛɛnlɛ faŋgafɛɛnlɛ pre kro we tni. 16 Ee yiri mbe ni leele Israel wolo pre taan, mbe pe na tlo ki pan mu tra kre tɔ. Ŋu Gog, nyjila ka paan mbe ni ti mu wi na ni waŋgra Israel leele pre ni, mbe ki ti mbe waŋgrɛ yire kro chin na mi pe Tafun Nyiɛkpɔɔ wre, na ni e cheche.’
17 Kee ŋga o Tafun Nyiɛkpɔɔ Jaŋgafun wre yuu Gog pan yi kre mbo, ‘Ŋu kee ndaa yo ni sumifɛɛnlɛ keenyanyofɛɛnlɛ mblɛ praa wa Israel tra nu fa kre pan na, kre nyjila kre praa ni kee nyaa na yuu na, nyjila ka paan mbe ni ti mu paan wi na pe ni. 18 Kena kre kee kre we pe kre nyjila kre nu. Na Gog waa pan mu wi na Israel tra leele ni kre, ni krɔ sisaa kre we yiri. Mi e Tafun Nyiɛkpɔɔ Jaŋgafun wre ni ki yo.’ 19 Kre ble kre, na ni krɔ kre waa kun sisaa ma kre, mbe ti mbe Israel tra kre seeri kpɔɔ. 20 Mbe ki ti mbe mbroe mblɛ pee wa epo nu, na hanyiɛlɛ, na yurɛ mblɛ pee wa nyaa, na yurɔ ŋmba u fulo tra yiɛ na kro, na leele mblɛ pee wa tra yiɛ na kro we na seeri ni yiɛ. Nyuɛ we kna mbe juule, mbe nyuɛ chuuli chuuli gedenyi yire kro juari mbruru, a mboe nyjɛ pe sin kro we juari mbe wo tra ki ble kre. 21 Ki ble kre mbe ti mbe brɔfiɛn yiɛshiin wi na Gog ni Israel nyuɛ yire na. U leele pre kro we kna mbe to peyɛ na mbra peyɛ kuu. 22 Ki ble kre mbe u gbun na pimi ni, mbe ti yira le pe nu, mbe praa peyɛ kuu. A mbe ti mbe nyiɛ pan titi, mbe nyiɛsubie wo, mbe kanhun na pua tuwe chaa mbe wo wre na u ŋunɔwifɛɛnlɛ pre, na waŋgrɛ tataara pre pe ya u na pre ni. 23 Kre kolo ŋga na mbe tro mbe ni kpɔɔmu nyina, na ni pe cheche, a mbe niyɛ wɔ mbe waŋgrɛ tataara nyina. Kre pie chin na mi wi pe Tafun Nyiɛkpɔɔ Jaŋgafun wre.”