Ezekiel 37

Kajle Waara Na Ndru Mu Ŋmaa Ta

Ki ble ka, o Tafun Nyiɛkpɔɔ wre Ŋumu na pan mu le ni nu, mna ni wru mu sɛ landɛɛ ka nu, na leele kajle bribri yii wa ki nu. 2 A wra tia ndaa nyaari yi nu mu sɛ yiɛ, mu pan kro, kajle nyjɛ ndaa nya tra wa yire na nɛɛ titi, a yira liɔ mu pe gbeligbeli kaara nsraa wa yi na. 3 A Nyiɛkpɔɔ na ni wie mbo, “Ezekiel, lewo pɔ, kena kajle nyjɛ we jaa ŋmaa ta ŋgaa?” A ndaa kna mu yo, “Ni Tafun Nyiɛkpɔɔ Jaŋgafun, ŋu chiin mu ki chin?”

4 A wra kna mu yo ni pan mbo, “Yo kajle nyjɛ pan na, Yire kajle wɛɛ, e o Tafun Nyiɛkpɔɔ kee ŋga u yuu loo.” 5 Kee ŋga o Tafun Nyiɛkpɔɔ Jaŋgafun wre yuu yire kajle wɛɛ nyjɛ pan yi kre, mbe ŋu mbe le e nu, mbe e yiri mbe ŋmaa ta. 6 Mbe kaprɛ le e nu, mbe kaara na hlɛ mbra e na, kena ni ŋu mu le e nu, mbe e ndru mbe ŋmaa ta. Kre ee chin na mi wi e Tafun Nyiɛkpɔɔ wre.

7 A ndaa Nyiɛkpɔɔ nyu kee shɔ mu yo imi na wra ki yo ni pan kre. Ŋga ndaa paara kre to, a yirɛ yɛ naa tini nyaanyaa ni ndie, a ndaa nya na kajle yire paan na soolo yiyɛ na. 8 Ŋga mbe nya na kaprɛ, na kaara, na wejiŋge hlɛ pan mu yi tɔ, la, ŋumu nsraa wa yi nu.

9 A Nyiɛkpɔɔ na yo ni pan mbo, “Ezekiel, lewo pɔ, yo fuflɛ pan na, kee ŋga o Tafun Nyiɛkpɔɔ Jaŋgafun wre yuu yi kre, yo fuflɛ pan na ki yiri kokoe jijirɛ yire kro na mbe paan le leele mblɛ pra gbo fa ŋga nu, mbe pe ŋmaa ta.”^a

10 A ndaa paara imi na Nyiɛkpɔɔ na yo ni pan kre. A ŋumu na pan mu le pe nu, a praa ŋuni, a pra yiri mu yire pe jeelee na, leŋunɔ titi na lɛ.

11 A Nyiɛkpɔɔ na yo ni pan mbo, “Ezekiel, lewo pɔ, pan Israel leele pre nyi na yire kajle wɛɛ nyjɛ yi. Pre pe yuu na, ‘Pan o nyi na kajle wɛɛ kpokpo yi, o dankna kro kɔ, a yiɛ taa haa n wa o pan na.’ 12 Kena yo ni leele pre pan na, ‘Kee ŋga e Tafun Nyiɛkpɔɔ wre yuu yi kre, ni paan mbe pe fanyi nyaala, mbe pe wɔ mbe yili yi nu, mbe ndru mbe pan na pe ni Israel tra nu. 13 Na ni waa e fanyi yire nyaala mu e wɔ mu yili yi nu, kre ee chin na, mi wi e Tafun Nyiɛkpɔɔ wre. 14 Mbe ni ŋumu le e nu, mbe e ŋmaa ta, mbe ni sɛ e tɛɛ yire titi tra kre nu. Kre ee chin na mi Nyiɛkpɔɔ wre ni paara, mu tia ki pan ma. Mi e Tafun Nyiɛkpɔɔ Jaŋgafun wre ni ki yo.’”

Judah Na Israel Na Chaa Waŋgra Nunu

15 O Tafun Nyiɛkpɔɔ wre na yo ni pan mbo, 16 “Ezekiel, lewo pɔ, kaan ka cha mu nyunɔ ki na, ‘Judah ŋunumu.’ Mbe mu ndru mbe ka cha na mbe nyunɔ kre na, ‘Israel ŋunumu.’ 17 Na mu kɔ, mbe mu yi yii mbe yi soo yi yɛ na, mbe yi pe na kaan nunu yi mu kɛɛ.

18 Na mu waŋgra leele pre waa mu wie ki nɔɔ kre, 19 mbe mu yo pe pan na, mi e Tafun Nyiɛkpɔɔ jaŋgafun wre we kaan ŋga ki pe Israel wo kre wru, mbe ki soo Judah wo kre na, mbe yi pe kaan nunu ni kɛɛ. 20 Na maa paara ma mu kɔ, mbe mu kɛɛn shiin nyjɛ na mu nyunɔ yire wru mbe yii leele pre yiɛ na, 21 mbe yo pe pan na, ‘Kee ŋga mi e Tafun Nyiɛkpɔɔ wre yuu yi kre, mbe Israel leele pre wɔ mbe yili waŋgrɛ nyjɛ nu pe nyi yire nu. Mbe pe yoori mbe tro lawee yire kro nu, mbe ndru mbe pan na pe ni pre titi tra kre nu. 22 Mbe paan pe pe waŋgra nunu mbe pe tni Israel nyuɛ yire na pe tra kre nu. A pe ŋunu we pe nunu ŋmba we na pe kro le, pia pe waŋgrɛ shiin na, ndee mbe pe ŋunumu yire yɔ mbe yi pe shiin na fio. 23 A pia pe sɛɛnlɛ yire, na yirɛ wɛɛ nyjɛ pe sumi yire, na pe afunyi kee yire tɛɛ mbe peyɛ tɔ nɛɛrɛ ni na, ŋgi na hin? Mbe pe shɔ mbe yili pe sisam nyjɛ yi tia pra laari ni kro kre nu, mbe nɛɛrɛ laa pe na. Pie pe ni leele, mbe ni pe pe Nyiɛkpɔɔ.

24 Kre nyjila kre, ni sumifun David we pe pe ŋunu, mbe lefun pe nunu. Pie li ni mbra na ni kee kro na. 25 Pie tni tra ŋga ndaa ni sumifun Jacob ŋga kre na, tra ŋga nu pe tolɛɛlɛ pre na tni kre, bawa pre na pe biile, na pe nanae kro we tni nyjila kro nu. A ni sumifun David we pe pe ŋunu nyjila kro nu. 26 Mi na pre we wejinyiŋge nyu nunu pe, kre nyu nunu kre we kro ma nyjila kro nu. Mbe ti pe tnihaa ta, mbe jiri mbe nɛɛ, a mbe ni Suminyuŋgo sin mbe ki kro pe nu nyjila kro nu. 27 Ni tnihaa kre we pe pe nu, mbe ni pe pe Nyiɛkpɔɔ, mbe pre pe ni leele. 28 Na ki waa pan na ni Suminyuŋgo kre wa Israel leele pre nu nyjila kro nu, kre waŋgrɛ yire we chin na mi Israel Nyiɛkpɔɔ wre ni ni leele pe cheche.’”