Nyiɛkpɔɔ Dwamu Wa Israel Na
36
O Tafun Nyiɛkpɔɔ na yo mbo, “Ezekiel, lewo pɔ, ni kee shɔ mu yo Israel nyuɛ yire pan na, Israel nyuɛ, e o Tafun Nyiɛkpɔɔ wre kee ŋga u yuu loo. 2 O Tafun Nyiɛkpɔɔ wre yo mbo, ‘E loŋgoolo pre yuu e pan na, fuŋga rɛ, fafa nyuɛ yire to o kɛɛ, mu pe o wee.’ 3 Kena Ezekiel, yo Israel leele pre pan na, Ŋga waŋgrɛ nyjɛ yi mbra e na pre na wi mu e ja kre, mna Israel nyuɛ yirɛ yirɛ foolo kre, praa e tɛɛlɛ. 4 Kena yire Israel nyuɛ yire e loo kee ŋga o Tafun Nyiɛkpɔɔ Jaŋgafun wre yuu, Yire nyuɛ, na nyambie, na landɛɛ, na nyuɛ ndoolo, na lawee nyjɛ yi sni waara, na chiɛ nyjɛ leele pe fɛ mu yi ti, a pe yi yirɛ foolo mu sɛ, a ki tia waŋgrɛ nyjɛ yi e fɛ mu kun yire na e pini na tɛɛ kre, 5 kee ŋga e Tafun Nyiɛkpɔɔ wre yuu yi kre, ni krɔkuɔn sisaa tɛɛ mu paara mu waŋgrɛ nyjɛ yi e fɛ mu kun yire taan. Edom kuraa ni paara mu taan kpɔɔ, praa peyɛ kpɔɔri e na, mnaa e pini na tɛɛ, mna ni tra kre wru mu ta, imi kie pe mbe ki yurɛ kahaa kre pe pe wo. 6 Kena Ezekiel, ni kee shɔ mu yo Israel nyuɛ, na nyambie, na landɛɛ, na nyuɛ ndoolo trɛ yire pan na, kee ŋga mi pe Tafun Nyiɛkpɔɔ wre yuu yi kre, yenyjam na krɔkuɔn ni ni paara, ŋgi na hin? Waŋgrɛ yire e le fiɛn, mu tia e na kala nyaa. 7 Ki tia kee ŋga mi e Tafun Nyiɛkpɔɔ Jaŋgafun wre yuu yi kre, ‘Ni da mu e ŋga na waŋgrɛ nyjɛ yi e fɛ mu kun kre yiɛ we le nyumu na.8 La, yire tinyi nyjɛ ee wa Israel nyuɛ yire na kre, e klɛ we nɛɛ mbe sɛ, mbe Israel leele ta mbe ka, ŋgi na hin? Kia mu, pe kro we ndru mbe pan katoo. 9 E keshian wa ni na, ki tia mbe nyu e na, mbe e tra kre jaa fali, mbe yirɛ luu ki nu. 10 Mbe ti mbe leele pre nɛɛ e tra kre nu, Israel leele pre kro we ndru mbe pan mbe chiɛ nyjɛ yira juari yire gbeele mbe sin, mbe tni. 11 Mbe ti mbe leele, na yurɛ nɛɛ tra kre nu, ee eyɛ ta kuraa mbe wɛ e jle kre na, a ee nɛɛrɛ mbe ya. Kre ee chin na mi wi e Tafun Nyiɛkpɔɔ wre. 12 Mbe ndru mbe pan na ni leele pre ni Israel tra kre nu, mbe pe paan ki wru mbe tni, mbe ki pe pe krɔyira, a tra kre wa ti mbe klo pe biile gbo na.
13 Kee ŋga mi e Tafun Nyiɛkpɔɔ Jaŋgafun wre yuu yi kre, Kee ŋga leele yuu Israel tra kre na yi na, ki leele kaa, kre ki tia leele wa jaa jiri tra kre nu. 14 Kena Israel tra, ma leele ka na, mbe ki ti leele jiri tra kre nu na. Mi e Tafun Nyiɛkpɔɔ Jaŋgafun wre ni ki yo. 15 Yaa loo na waŋgra leele pre e pini na tɛɛ, ndee na e pini kplɛndɛlɛ kee, ndee mbe e waŋgra kre kla na. Mi e Tafun Nyiɛkpɔɔ Jaŋgafun wre ni ki yo.’”
Israel We Nyiɛkpɔɔ Le Yɛnyiŋge
16 O Tafun Nyiɛkpɔɔ wre na ndru mna yo ni pan mbo, 17 “Ezekiel, lewo pɔ, nyjila ŋga ni Israel leele pre naa wa mu tni pe tra kre nu kre, pe kepele fuɛn yire na tia pra ki tɔ nɛɛrɛ ni. Imi na chlɔ kɛ kee nyiɛpɔ nyiɛpɔ mbe pe nɛɛrɛ ndro ni pan kre, pan Israel leele pre na pe ni yiɛ na. 18 Linku kee nyjɛ praa pini tra kre nu, na pe sɛɛnlɛ nyjɛ pra tɛɛ mna tra kre tɔ nɛɛrɛ ni kre ndra na, ndaa tia pra ni nyibinyiɛ sisaa nya. 19 Ndaa pe gbun mu nyina waŋgrɛ yire nu, a pra nyina mu sɛ lawee kro nu, pe kepele ndaa le mna pe gbun pimi ni. 20 A lawee nyjɛ nu pra nyina mu sɛ yire nu kro, pra ni mɛɛ cheche kre kla wa, leele naa pe kee yuu wa mbo, ‘Nyiɛkpɔɔ Jaŋgafun wre leele lɛ kre, a nde u pe ni mu yili u tra kre nu.’ 21 Ni mɛɛ cheche ŋga Israel leele pre naa klai waŋgrɛ yire nu kre kee na ni shian.
22 Kena yo Israel leele pre pan na, Kee ŋga e Tafun Nyiɛkpɔɔ Jaŋgafun wre yuu yi kre, yira ŋga yire Israel leele we ta na ma ni yila na kee nyjɛ pini, la, ni mɛɛ ŋga e klai waŋgrɛ nyjɛ nu e nyina mu sɛ yire nu kre na ni yila. 23 Mbe ti mbe waŋgrɛ chin na ni mɛɛ ŋga e klai pe nu kre pe cheche, mu kpɔɔ. Na ni waa yire e na mu niyɛ pe cheche waŋgrɛ yire yiɛ na kre, pie chin na mi wi e Tafun Nyiɛkpɔɔ wre. Mi e Tafun Nyiɛkpɔɔ Jaŋgafun wre ni ki yo.
24 Mbe e yoori mbe yili waŋgrɛ yire nu kro mbe ndru pan na e ni yire titi tra kre nu. 25 Mbe nyumu ŋga ki pe chasi nyaara e na, mbe ki ti mbe e pe chasi, mbe nɛɛrɛ nyjɛ yii wa e na, na sɛɛnlɛ yire nɛɛrɛ nyjɛ yii wa e na yire kro, mbe yi je mbe laa e na. 26 A mbe e ŋga loloŋgo fɔŋgɔ, na ŋumu fɔŋgɔ, mbe loloŋgo ŋga ki sheli e nu na dnɛ yi kre wɔ mbe yili e nu, mbe e ŋga loloŋgo ŋga ki pe yiɛyiɛ na wejikaara yi. 27 Mbe ni Ŋumu wre le e nu, mbe ki ti e jaa li ni kee, na ni mbra yire na. 28 Ee tni tra ŋga ndaa e tolɛɛlɛ ŋga kre nu, ee pe ni leele, mbe ni pe e Nyiɛkpɔɔ. 29 Mbe e shɔ mbe yili kee nyjɛ yi shie na e ni nɛɛrɛ nu yire kro nu. A mbe ti mbe shɔlɔ bɔ e na, a mba ti mbe klo to e na na fio. 30 Mbe ti mbe e tinyi li wee sɛ mbe nɛɛ, yire na e see yirɛ ni kro, imi kie pe mbe klo wa to e na, mbe nyifɛɛrɛ e gbo waŋgrɛ yire nu na. 31 Na ki pe ma kre, kie ti mbe e kefuɛn, na sisam nyjɛ e naa pini fa yire sɔɔnri, mbe ki ti eyɛ kee e bin, e sisam, na afunyi kee nyjɛ e naa pin kre ndra na. 32 Mbe ti mbe e chin na yire ndra na ma ni yila na yire kee nyjɛ pini, kena Israel leele, e ti mbe e kepele fuɛn yire e gbo na nyifɛɛrɛ ni. Mi e Tafun Nyiɛkpɔɔ Jaŋgafun wre ni ki yo.
33 Kee ŋga mi e Tafun Nyiɛkpɔɔ Jaŋgafun wre yuu yi kre, ŋga ble mbe e sisam yire je mbe laa e na kre, mbe ti mbe e ndru mbe sɛ tni e chiɛ yire na, mbe yi gbeele mbe sin na. 34 Tra ŋga kra kla mu sni waara kre, we ndruu tna mbe e yirɛ luu ki nu, mbe kia sni waara mbe leele na tro mbra ki nyaa ma na. 35 Leele we ki nya mbra yuu na, kre tra ŋga kra kla mna sni waara kre, kre ki ndru mu pe na Eden kagbla kre yi kre. Kakpɔɛ nyjɛ yira ja, mna kla, a leele nsraa wa yi na kre, leele pan mu nɛɛi na, a pe ndru mu mboe sin mu yi fɛ mu kun. 36 A waŋgrɛ nyjɛ yi kro mu e fɛ mu kun yire we chin na mi e Tafun Nyiɛkpɔɔ wre ni ndru mu chiɛ nyjɛ yira kla yire gbeele mu sin na, mu yirɛ luu tra ŋga kra kla mu sni waara kre nu. Mi e Tafun Nyiɛkpɔɔ wre ni ki yo, a mbe ki pe.
37 Kee ŋga mi e Tafun Nyiɛkpɔɔ wre yuu yi kre, mbe ndie tɛɛ Israel leele pre pan na, mbe pe nyiɛtalaa loo, mbe kre kee ŋga pe mbe pe ŋga, mbe ti mbe pe leele pre nɛɛ na mbaala mblɛ pia jaa tɔɔnri lɛ, 38 leele pre we nɛɛ na mbaala mblɛ ni pe sra woni Jerusalem na pe ble kpɔɛ lie nu kre yi. Pan leele we nɛɛ pe kakpɔɛ nyjɛ yira juari fa yire na na. Kre pie chin na mi wi pe Tafun Nyiɛkpɔɔ wre.”