5 Yire Edom leele e na Israel leele yii loŋgoolo, mna tia pra pe gbo brɔfiɛn yiɛshiin ni, nyjila ŋga nu ndaa tia pe ndie tinii na kpɔɔ kre. 6 Kena ŋga mi Nyiɛkpɔɔ wa na le ŋga, mbe ti mbe linkufɛɛnlɛ pan mbe e gbo, ŋga e n linkuuro kee fun ŋga wala. 7 Mbe Edom waŋgra kre kla, mbe ki sni waara, a ndro ŋmba we tro tra kre nu kpan, mbe u gbo. 8 Mbe mu nyuɛ yire tɔ na gboolo ni, leele mblɛ pe gbo brɔfiɛn yiɛshiin ni we bɔ mu nyambie, na mu landɛɛ, na nyuɛ ndoolo yire kro nu. 9 Mbe ti mbe tra kre sni waara nyjila kro nu, a ndro wa jaa tni chiɛ yire ka na. Kre mu chin na mi wi mu Tafun Nyiɛkpɔɔ wre.

10 Ŋgi na hin? Yire Edom leele naa yuu na, ‘Judah na Israel waŋgrɛ shiin yire na yi tra kro o wee yi, kena o yi wru mbe ta.’ A nde na mi pe Tafun Nyiɛkpɔɔ wre wa wa. 11 Kena ŋga mi Nyiɛkpɔɔ wa na le ŋga, mbe e fɔlɔ tɔ krɔ ŋga e na wru na ni leele ni, na yenyjam ŋga e naa wii na pe ni, mna pe pra kre ndra na. A na ndaa na e ndie tinii, ni leele pre we chin na pre ndra na ni yila na e pini ma. 12 Kre ee chin na mi e Tafun Nyiɛkpɔɔ wre naa kee nyjɛ e naa yuu Israel nyuɛ yire na, na leele pre pini na tɛɛ kre, na ndaa yi loo. E naa yuu na, ‘Pe nyuɛ yire sni waara, ki tia yi to o kɛɛ, mu pe o wee.’ 13 E naa eyɛ kpɔɔri ni na, mna paara mu ni taan, hali e nsraa fiɛ, a ndaa kee nyjɛ e naa yuu yire kro loo. 14 Ki tia kee ŋga mi e Tafun Nyiɛkpɔɔ Jaŋgafun wre yuu yi kre, ‘Mbe ti e waŋgra kre sni waara, mbe leele mblɛ pee wa waŋgra nu kro yiɛshɔ. 15 Ŋgi na hin? Ŋga Israel leele tra ŋga yi pe krɔyira kre na sni waara kre, e yiɛ na shɔ. Pan mbe Edom nyua kre, tra kre kro pe, kre ee chin na mi wi e Tafun Nyiɛkpɔɔ wre.’”