7 Kena yire mbaala lefɛɛnlɛ pre, e loo kee ŋga o Tafun Nyiɛkpɔɔ Jaŋgafun wre yuu, 8 ‘Mi pe Tafun Nyiɛkpɔɔ Jaŋgafun wre ni ki yo. Ŋga nii wa na le, a ndro n wa na ni mbaala pre le, mu tia leele na pe juu, a pe sɛ kaari nyaalam yurɛ sisɛɛ kro pan sro, a ni mbaala lefɛɛnlɛ pre n na pe haa chaa, a pre titi na peyɛ le, mu ni mbaala pre ti kre ndra na.’ 9 Yire mbaala lefɛɛnlɛ pre e loo kee ŋga e Tafun Nyiɛkpɔɔ Jaŋgafun wre yuu, 10 ‘Yire mbaala lefɛɛnlɛ, mbe e ndie tini, mba e ti kee nyjɛ e pini ni mbaala pre na kre ndra na. Mbe e ni mbe laa mbaala pre kro, mbe yaa pe taa ka na, mbe mbaala pre shɔ e nyu na, pia kaari e sro na.’

11 Kena kee ŋga O Tafun Nyiɛkpɔɔ Jaŋgafun wre yuu yi kre, ‘Mi titi we ni mbaala pre haa cha, mbra pe le.’ 12 Imi na mbaala lefun yiɛ nyinai u mbaala mblɛ pe da mu nyina na kre, pan mbe ni mbaala pre haa cha, mbe pe cha lawee nyjɛ nu pra nyina mu sɛ ndram wɔɔ ble sisaa kre nu kre. 13 Mbe pe wɔ mbe yili waŋgrɛ yire nu, mbe pan na pe ni pre titi tra nu. Mbe pan na pe ni ka haa Israel nyuɛ yire, na nyuɛ ndoolo yire nu, na tra nyjɛ nu leele nyi mu tni yire nu. 14 Israel nyuɛ yire ndra lalaa mbe sɛ na pe ni mbe pe sɛ kahaa chichie ta mbe ka. Bawa snihaa nyi mbe pe sni mbe wuu, mbe yiri mbe nyaa chiriri ta mbe ka. 15 Mi titi mbe ni mbaala pre le, mbe ti mbe pe lawee ta mbe sni mbe wuu. Mi e Tafun Nyiɛkpɔɔ Jaŋgafun wre ni ki yo. 16 Mbaala pre mblɛ pe fun pe nu kre, mbe pe haa cha mbe ndru mbe pan na pe ni. Mblɛ na klɛ nyi pre krɛrɛ mbe tuwe le yi nu mbe yi pɔ, a pe mblɛ pe yaa kre mbe pe tra. La, mblɛ pe kpɔɔ kpɔɔ, a faŋgaa wa pe nu kre, mbe pe kla, mbe hamblɛ pre le na kpra ni.

17 Yire ni mbaala pre, kee ŋga mi e Tafun Nyiɛkpɔɔ Jaŋgafun wre yuu e pan yi kre, mbe e chichiele pre wɔ mbe yili sisɛɛ pre nu, mbe mbaala wɔ mbe yili sikaala nu. 18 E plɛ nyaa chichiele taa na kaa, a nde ki n tna e pan. A na e ka mu kɔ, mbe e hɛnyi yire taanla. Ee sɛ nyumu chichie kre gbɔ, na e gbɔ mu kɔ mbe haŋa kre taanla mbe pɔtɔ. 19 Kena nyaa nyjɛ e taanla yire ki fna mbe ni mbaala pre na kaa, mbra nyumu ŋga e taanla mu pɔtɔ kre gboo ra?

20 Ki tia kee ŋga O Tafun Nyiɛkpɔɔ Jaŋgafun wre yuu e pan yi kre, e le, mi titi we ni mbaala pre le, mbe mblɛ pe kpɔɔ kpɔɔ pre wɔ mbe yili mblɛ pe chɔɔn chɔɔn kre nu. 21 Ŋgi na hin? Faŋgafɛɛnlɛ pre mblɛ nu faŋga n wa pre sini nyamblɛ ni na yilii mbaala pre nu. 22 Ki tia mbe ni mbaala pre shɔ, mbe yaa pe ta mbe pe tɔɔnrɔ ma na. Mbe pe le mbe chichiele pre wɔ mbe yili sisɛɛ pre nu. 23 Na ni kɔ, mbe ni ni sumifun David wɔ mbe u pe ni mbaala pre lefun. Kena e kro lefun nunu ta mbe wra e le. 24 Mi pe Tafun Nyiɛkpɔɔ wre mbe pe pe Nyiɛkpɔɔ, mbe ni sumifun David wre pe pe ŋunu. Mi e Tafun Nyiɛkpɔɔ wre ni ki yo.

25 Mi na pre we wejinyiŋge nyu nunu pe, a mbe yurɛ sisɛɛ ni mbe yili tra kre nu, mbe ki ti pe lawee ta mbe tni tablɔ tra kre nu, mbe sni haa ta klɔɛ yire nu mbe yaka wa pe ta. 26 Mbe pe dwan ni nyambie cheche kre lawee, a ni dwamu kre we ti mbe nyiɛ na woni wa yi nyjila nu. 27 Tinyi we na sɛni, mbe sro na nyɔɔ seele nu tra kre nu, mbe ndro kro tni tra kre nu wejinyiŋge nu. Na ni waa pe shɔ mu yili pe tnibim nu kre pie chin na mi wi pe Tafun Nyiɛkpɔɔ wre. 28 Na ki pan ma, waŋgrɛ yire wa pe foolo na, a nyaalam yurɛ sisɛɛ wa pe yii ka na. Pie tni wejinyiŋge nu, a pia yaka fiɛ na. 29 Mbe ti mbe pe tra kre tna mbra sro nyɔɔ, mbe ki ti klo wa na tuuri tra kre nu na, mbe waŋgrɛ yire wa na pe tɛɛ. 30 Kre pie chin na mi pe Tafun Nyiɛkpɔɔ wree wa pe nu, a pre Israel leele pre pe ni leele. Pan mi pe Tafun Nyiɛkpɔɔ wre yo. 31 Leele kee ni yuu kre, na ni mbaala lɛ, a mi ni pe kaan sro, a mi wi pe Nyiɛkpɔɔ. Pan mi e Tafun Nyiɛkpɔɔ Jaŋgafun wre yo.”