Ezekiel Kaari Leele Shiefun
33
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, yo mu waŋgra leele pre pan na, Na mi Nyiɛkpɔɔ paan na brɔfiɛn yiɛshiin ni tra ka leele nu, a tra kre leele waa ndro wɔ peyɛ nu mu tɛɛ a wra pe sri, 3 a waa nya na ni paan na brɔfiɛn yiɛshiin kre ni tra kre nu, a waa bnɔ fɔ mbe leele pre jaari, 4 a ki pan na wa bnɔ kre loo, a u nsra uyɛ jaari, a brɔfiɛn yiɛshiin kre waa pan mu u gbo kre, kena wre titi u u kumu cha. 5 Ŋga ufun wre bnɔ kre tiŋge loo, a u n uyɛ jaara kre ndra na, kena wre u u kumu cha. Na wra uyɛ jaari, we na ŋmaa ta. 6 La, na ki pan na lawee shiefun wre nya na pe paan na brɔfiɛn yiɛshiin kre ni, a u nsra bnɔ kre fɔ, mu leele pre jaari, a pe waa pan na brɔfiɛn yiɛshiin kre ni mu pe wa gbo kre, ndro wrefun we ku u sisam nu ya, la, lawee shiefun wre we gboo wre kumu mapini tio.7 Ezekiel, lewo pɔ, mi ni mu tɛɛ Israel leele pre shiefun, kena kee ŋga ni yuu ŋga loo, mu pe jaari ni pan. 8 Na mi Nyiɛkpɔɔ yo sisampefun pan na, ‘Ŋu sisampefun mu ku, we ku yɛŋgɛ.’ Kena na mu nsra paara mu sisampefun wre nyina, a u laa ŋga u pini kro, sisampefun wre we ku u sisam nu ya, la, mu gboo wre kumu mapini tio. 9 La, na maa sisampefun wre jaari na u laa u sisam kro, a u nsra laa u sisam yire kro, ufun wre we ku u sisam tlo, la, mu muyɛ ndra ta.
10 Ezekiel, lewo pɔ, kee nyjɛ Israel leele pre yuu yire yo pe pan mbe pe yi loo, pe yuu na, ‘O punɔɔ, na o sisam nyjɛ o pini yire nɛɛ mu wɛ o na, mu tia o na kala nyaa titi, kena mni oo pe mbe ŋmaa ta hin?’ 11 Kena yo pe pan, ‘Ŋga mi pe Tafun Nyiɛkpɔɔ wree wa ŋga, ni yiɛ n shɔ sisampefun kumu na. La, ŋga ni chaa yi na pie laa pe sisam kro, mbe ŋmaa ta. Israel leele, ni yuu e pan na, e laa e sisam kro, kena na e laa e sisam kro, ŋgi ki tia e na chaa mbe ku hin?’
12 Kena Ezekiel, lewo pɔ, yo mu leele pre pan na, ‘Na lewo fraka, a waa ndikana kee pe, u frakaa kre wa jaa u shɔ, a na sisampefun laa u sisam nyjɛ u pini kro, yaka wa ti mbe u to. Na lewo frakafun sisam pe, wa ŋmaa li, pia yila u frakaa ŋga wra fraka fa kre na mbe ti u ŋmaa ta, we ku.’ 13 Na ni yo lewo ŋmba u fraka pan na we ŋmaa li, a waa na kaan u frakaa kre na mu na sisam pini kre, mba u kefrakaa yire ka sɔɔnri fio, ufun wre we ku u sisam tlo. 14 A na ni yo sisam pefun pan na, ‘Mu ku.’ La, na waa ki loo mu laa u sisam yire kro, maa na ŋga ki fraka pini na kpra lii, 15 a na ndro pan mu yira tle u pan, we ki ndro mbe u ŋga kre, ndee na u yira ju, we ndruu sɛ ki tɛɛ ki lawee, mbe taa mbra nyjɛ yi ŋmaa kaan yire na kre, kena we ŋmaa li, wa ku. 16 Na u pe ma, mba u sisam nyjɛ wra pe yire ka sɔɔnri mbe ki tɛɛ mbe u taan na, ŋgi na hin? U kpra li, mu fraka. Kie ti mbe u ŋmaa li.
17 Ezekiel, yire kee nyjɛ krɛrɛ kɔkro ni, mu waŋgra leele pre je na yuu na, ‘O Tafun Nyiɛkpɔɔ wre n na kpra lii.’ Kena pre ma pe n na kpra lii ŋgaa? 18 Na lewo frakafun laa u frakaa kro mu sɛ na sisam pini kre, we ku u sisam tlo. 19 A na sisampefun laa u sisam pee kro mu sɛ na kpra lii, mu na kefrakaa pini kre, we ŋmaa li, kee ŋga u pini kre saara na. 20 Nyjɛ krɛrɛ kɔkro kre, Israel leele je na yuu na, ‘O Tafun Nyiɛkpɔɔ wre n na kpra lii u kee nu.’ La, e kee nyjɛ e pini yire mbe le mbe e kpra kun.”
Jerusalem To
21 Ŋga pra o yii mu sɛ Babylon tra nu kre, ki yɛlɛ kɛmbɔshiin wo kre nyiɛpɔ kɛ wo kre ble ŋga ki taa kunɔ na, kre blɔ wa na fɛ mu yili Jerusalem na mna pan mu yo ni pan mbo, “Jerusalem to loŋgoolo kɛɛ, a pe ki ja.” 22 Ŋga ble nyiŋge we se mbe blɔ wre pan kre yilakɔŋgɔ, o Tafun Nyiɛkpɔɔ wre jaŋga na pan mu le ni nu, a ndaa ja na paara, a wra chin mu le bnimi. Ni nyu nsra tɔ na, a ndaa ja mu na paara.
23 A o Tafun Nyiɛkpɔɔ wre na yo ni pan mbo, 24 “Ezekiel, lewo pɔ, leele mblɛ pee wa mu tni Israel chiɛ nyjɛ pe juari yire na pre yuu mbo, ‘Abraham nunu chom wraa wa fa, a nde Nyiɛkpɔɔ na u ŋga tra ŋga kro. La, wre nɛɛ fuŋga, kena ki fna mbe tra ŋga pe o wo.’ 25 Kena yo pe pan na, kee ŋga o Tafun Nyiɛkpɔɔ Jaŋgafun wre yuu yi kre, ‘Ŋga e yurɔ nyimi tii u nu mbe u ka, mu yiɛ taa e sɛɛnlɛ na, mu na linkuuro kee pini ŋga, kena ki fna mbe ni e ŋga tra ŋga ra? 26 E brɔfiɛn yiɛshiin yire na e kaan, mu yi tɛɛ na yirɛ klai, a yire titi na e tnifɛɛnlɛ chiɛlɛ toni nɛɛrɛ ni. Kena ki fna mbe ni e ŋga tra ŋga ra?’
27 Kena kre kee ŋga yo pe pan na, ‘Kee ŋga e Tafun Nyiɛkpɔɔ Jaŋgafun wre yuu yi kre, ŋga mi Nyiɛkpɔɔ wre wa ŋga, leele mblɛ pe kro kajaa kre na wa kre we to brɔfiɛn yiɛshiin nyu na. Mblɛ pee wa nyaa kre, nyaalam yurɛ kɛɛ mbe pe le mbe pe pe ka. A pe mblɛ pie sɛ le dnɛ weele, na pe ndrahɛɛ yire nu kre, yira kie pre gbo wa. 28 Mbe ti mbe tra kre sni waara, mbe pe faŋga ŋga pe ta na peyɛ kpɔɔri kre nyu to, mbe ki ti Israel tra nyuɛ yire kro sni waara, mbe ndro wa jaa tro wa. 29 Na ni waa tra kre kla a ki sni waara, pe afunyi kee nyjɛ pe pini yire ndra na kre, kre pie chin na, mi wi pe Tafun Nyiɛkpɔɔ wre.’
30 Ezekiel, lewo pɔ, mu waŋgra leele pre fni Babylon mboe yire lawee, na pe kalonyi jlonwee nyu na na mu kala yuu. Pe yuu peyɛ pan mbo, ‘E pan e kee ŋga ki yiri o Tafun Nyiɛkpɔɔ wre pan mu pan loo.’ 31 Ki tia ni leele pre paan mu pan, imi na pe pini kre, mbe paan tni mu yiɛ, mbe mu paara pe pan, la, kee nyjɛ mu yuu pe pan kre, praa yi tɛɛ mbe tnumu tun. Ketɛɛn yi yilii pe nyuu, la, dnumu kee yii wa pe lolonyi nu. 32 Ŋga pe jawa kro yi na, mu mana taan teeri na mɛɛ koni, a mu juru gbun mu chin. Pe mu kee nyjɛ mu yuu yire ndru, a nde pia li yi na.
33 La, na mu kee nyjɛ mu yuu yire krɛrɛ waa pe yɛŋgɛ, a yiɛ pe ma yɛŋgɛ, kre pie chin na Nyiɛkpɔɔ keenyanyofun waa wa mu tni pe nu.”