Pe Kumu Mɛɛ Kɔ Mu Egypt Ŋunu Ŋga
32
Ŋga pra o yii mu sɛ Babylon tra nu kre, ki yɛlɛ kɛmbɔshiin wo kre nyiɛpɔ kɛmbɔshiin kre ble ŋga kra yiɛ klu na, o Tafun Nyiɛkpɔɔ wre na yo ni pan mbo, 2 “Ezekiel, lewo pɔ, kumu mɛɛ kɔ mu wo Egypt ŋunu Pharaoh na, mu yo u pan na,‘Mu muyɛ pe na jira wi
waŋgrɛ yire nu,
la, pan mu nyi na dɛnkɛ wi
epo nu, na nyumu kre bri
na shie na paan mu na
ki frɛrɛ kre taanla na ki pɔtɔ.’
3 Kee ŋga mi e Tafun Nyiɛkpɔɔ
Jaŋgafun wre yuu yi kre,
Lenɛɛmu ni mbe pan mu pan,
mbe paan ni asau wa mu na,
mbe pe mu tini na ki ni mbe sɛ.
4 Mbe ti pe mu tini mbe sɛ wa
tra ka na lawee waa
gbeŋglen ka nu,
mbe hanyiɛlɛ paan to mu na
mbe mu kaara li,
mbe nyaalam yurɛ paan
ki haŋa ka mbe yɔɔ.
5 Mbe mu kaara nyina
mbe yi sɛ wo nyuɛ na,
mbe yi yɛ sɛ wo landɛɛ nu,
6 mbe mu nyimi fo mbe tra kre tɔ,
hali mbe sɛ yili nyuɛ yire na,
nyuɛ ndoolo yire kro,
yie fo mbe tro wa.
7 Na ndaa mu gbo mu kɔ kre,
mbe ti mbe wɔmu pan
mbe nyjeeri wɔɛlɛɛ tɔ,
mbe tloe pan mbe yila yiɛ tɔ,
na ki pan ma, nyiɛpɔ wa fniŋge.
8 Yirɛ nyjɛ yii wa nyjeeri
na nyaa kro,
mbe ti mbe wɔmu yi tɔ.
A mbe ti mbe wɔmu
mu tra kre tɔ kro,
Pan mi mu Tafun Nyiɛkpɔɔ
Jaŋgafun wre yo.
9 Na ni waa mu kla waŋgrɛ yire nu,
trɛ nyjɛ mu n chin yire nu kre,
na pe waa ki loo kre, kie ti
mbe lenɛɛrɛ jawala pe tɔɔra.
10 Mbe ti mbe mu kee lenɛɛrɛ fo,
na ndaa ni brɔfiɛn yiɛshiin
kre tini kra nyini pe yiɛ na,
mu ndra na, fiɛrɛ we pe ŋulo yii
mbe praa seeri.
Ŋga ble mu to kre, leele pre kre
we na seeri nununu,
pe ŋmaa ndra na.
11 Kee ŋga mi e Tafun Nyiɛkpɔɔ wre yuu yi kre,
Babylon ŋunu we pan
na u brɔfiɛn yiɛshiin ni mu na.
12 Mbe ti mbe ŋunɔwifɛɛnlɛ,
faŋgafɛɛnlɛ mblɛ ndra
ki sheli titi, pre paan
mu leele tataara pre gbo.
Yirɛ nyjɛ ni Egypt kiyɛ kpɔɔri
yire kro,
pie yi gbun mbe juari,
mbe ki leele kro kla.
13 Mbe pe nui kro gbo,
pe lɔɛ yire lawee,
a ndro wa kro
mbe lɔɛ yire taanla mbe kla na,
ndee pe nui pie kro
mbe yi taanla mbe pɔtɔ na.
14 Na ki pan ma, mbe ti
mbe pe lɔɛ yire yiɛ to,
mbe pe lafoelee yire
na fuu na simi li wo yi.
Mi e Tafun Nyiɛkpɔɔ
Jaŋgafun wre ni ki yo.
15 Na ni waa tia Egypt tra
kre sni waara,
maa tia pe yirɛ kro yili pe kɛɛ,
a ndaa leele mblɛ pee wa wa
kro gbo kre,
kre pie chin na
mi wi pe Tafun Nyiɛkpɔɔ wre.
16 Kena kre kumu mɛɛ ŋga ni yo mu kɔ mbe wo Egypt tra kre na yi kre. Kre mɛɛ kre chɔɔ, waŋgrɛ yire chiɛlɛ we ki kɔ mbe wo Egypt tra kre, na ki leele na. Mi Nyiɛkpɔɔ Jaŋgafun wre ni ki yo.”
17 Ŋga pra o yii mu sɛ Babylon tra nu kre, ki yɛlɛ kɛmbɔshiin wo kre, nyiɛpɔ jle wo kre ble kɛmbɔkunɔ ble kre, kre o Tafun Nyiɛkpɔɔ wre na yo ni pan mbo, 18 “Ezekiel, lewo pɔ, nyɛni mu Egypt leele pre ŋga, mu yo pe pan na, pre na waŋgrɛ faŋgafɛɛnlɛ pre leele kro we mblɛ pee wa kuulo ndoo wa kre kɔŋgɔ ni. 19 Yo pe pan na, ‘E jawa na mbe nyu e na mbe wɛ leele hamblɛ pre na ree? E sɛ sni e chaa leele mblɛ pe n mi Nyiɛkpɔɔ chin pre nu.’ 20 Pre na mblɛ pra ku brɔfiɛn yiɛshiin nyu na kre pie chaa mbe ku. Pie brɔfiɛn kre tini mbe Egypt leele tataara pre gbo peii. 21 Ŋulo jaŋgafɛɛnlɛ mblɛ pee wa kuulo ndoo wa kre we na Egypt tra kre, na mblɛ pe wii na yaa pe na pre kee yuu na, ‘Pe pan mna mbe paan sni mbe chaa wre mblɛ o n Nyiɛkpɔɔ chin, a o na ku brɔfiɛn yiɛshiin nyu na kre nu.’
22 Assyria ŋunɔwifɛɛnlɛ mblɛ pra ku brɔfiɛn yiɛshiin nyu na kree wa kuulo ndoo wa, a pe fanyi pe fɛ mu kun. 23 Leele pre fanyi yiree wa kuulo ndoo lawee ŋga ki juo titi kre nu, a pe ŋunɔwifɛɛnlɛ pre fanyi pe fɛ mu kun. Mblɛ praa leele piɛri ŋmaafɛɛnlɛ tra ŋga nu, pre kro na ku brɔfiɛn yiɛshiin nyu na.
24 Elam ŋunɔwifɛɛnlɛ pre fanyi wa wa mu fɛ mu kun. Brɔfiɛn yiɛshiin nyu na pra ku. Pre mblɛ praa leele piɛri ŋmaafɛɛnlɛ tra ŋga nu kre na ku mu sɛ kuulo ndoo wa na pe n Nyiɛkpɔɔ chin. Nyifɛɛrɛ na pe gbo leele mblɛ praa wa kuulo ndoo wa pre nu. 25 Kuulo ndoo wa pra Elam dɛŋglɛ chan mu chaa mblɛ pra gbo pre nu, a u leele tataara pre fanyi na u faŋga fɛ mu kun. Pre leele pre kro nsra Nyiɛkpɔɔ chin, a pra ku brɔfiɛn yiɛshiin nyu na. Ŋgi na hin? Pe fiɛrɛ na wo leele na ŋmaafɛɛnlɛ tra ŋga nu. Nyifɛɛrɛ na pe gbo kuulo ndoo wa.
26 Meshech, na Tubal na pe leele tataara pre naa wa wa, a pe fanyi na fɛ mu kun. Pe kro nsra Nyiɛkpɔɔ chin, mna ku brɔfiɛn yiɛshiin nyu na. Ŋgi na hin? Praa fiɛrɛ woni leele na ŋmaafɛɛnlɛ tra ŋga nu. 27 Pre na leele mblɛ pe nsra Nyiɛkpɔɔ chin, a pra to ŋunɔ pre pee wa mu sni titɛɛ, pre krɛrɛ na ku mu sɛ kuulo ndoo na pe ŋunɔwiyirɛ ni. Kumu yi pe sisam fɔtɔɔrɔ. Nde pre ŋunɔwifɛɛnlɛ mblɛ fiɛrɛ na ŋmaafɛɛnlɛ tra ŋga shɔ mu ta.
28 Ŋu ŋunu Pharaoh, pie mu gbo mbe mu sɛ sni mbe chaa leele mblɛ pe n Nyiɛkpɔɔ chin, a pra ku brɔfiɛn yiɛshiin nyu na pre nu.
29 Edom ŋulo na pe loplombo kro fanyi wa wa. Imi na pe jaŋga na kpɔɔ mu da kpan, pee wa mu sni mu chaa leele mblɛ pra ku brɔfiɛn yiɛshiin nyu na pre nu. Pre na leele mblɛ pe nsra Nyiɛkpɔɔ chin, a pee wa kuulo ndoo wa kre pee wa wa.
30 Ŋulo mblɛ pee wa nyjeeri haa wa, na Sidon leele pre kro wa kuulo ndoo wa. Pe jaŋga na tia fiɛrɛ naa leele yiri. Pe nsra Nyiɛkpɔɔ chin mu ku, a pre na leele mblɛ pra ku brɔfiɛn yiɛshiin nyu na pre sɛ chaa mu sni titɛɛ, a nyifɛɛrɛ pre na mblɛ pee wa kuulo ndoo wa kre gbo.
31 Na Egypt ŋunu wre waa pe fanyi yire krɛrɛ nya kre, wre na u ŋunɔwifɛɛnlɛ pre gbun we nyjii pe na, na pre chiin ma pee wa wa. Mi e Tafun Nyiɛkpɔɔ Jaŋgafun wre ni ki yo. 32 Mi Nyiɛkpɔɔ ndaa tia Egypt ŋunu wre fiɛrɛ na leele yii ŋmaafɛɛnlɛ tra ŋga nu. A mbe ti mbe wre na u ŋunɔwifɛɛnlɛ pre kro ku mbe sɛ sni mbe chaa leele mblɛ pe nsra mi Nyiɛkpɔɔ chin, a pra ku brɔfiɛn yiɛshiin nyu na kre nu. Mi Nyiɛkpɔɔ Jaŋgafun wre ni ki yo.”