Pie Egypt Ŋunu Chieri Mbe Wa Na Cedar Tiŋge Yi
31
Ŋga pra o yii mna sɛ Babylon tra nu kre, ki yɛlɛ kɛmbɔnunu wo kre nyiɛpɔ taarɛ wo kre ble ŋga kra yiɛ klu kre nu, kre o Tafun Nyiɛkpɔɔ na yo ni pan mbo, 2 “Ezekiel, lewo pɔ, yo Egypt ŋunu Pharaoh na u leele pan na,Egypt ŋunu, mu yɛnyiŋge kpɔɔ
mu wɛ ndro kro na,
ŋmbi ni pie jaa tɛɛ
mbe mu kra hin?
3 Pan mu nyi na cedar tiŋge ka yi Lebanon tra nu.
Kra nyu, a wrɛ naa wa ki klɛ na.
Tiŋge kre na gede
mu sɛ su tloe na.
4 Tiŋge kre naa wa nyumu lawee
na lee,
a nyumu naa blo
na yilii ki nɔɔ na,
tiŋge kre lawee ka nsraa wa
a nyumu nsraa wa wa.
A nyumu naa yire ki jaara
na fuu na shie klɔɛ nu.
5 Ŋga tiŋge kre naa nyumu taa
imi na ki fna kre ndra na,
ki tia kra gede mu wɛ tinyi kro na,
a ki klɛ na kpɔɔ kpɔɔ
mna tnu tnu.
6 A kra tia hanyiɛlɛ kro
na zeere le ki klɛ yire nu,
a nyaalam yurɛ naa paan
na sii ki jaara,
A waŋgrɛ kpɔɛ yire kro na pan
mu tni ki nyimi.
7 Tiŋge kre na nyu titi,
a kra gede, a ki klɛ na tnu tnu.
Ki didinyi na le tra
mna sɛ su nyumu na.
8 Kre cedar tiŋge n wa
Nyiɛkpɔɔ kagbla wa,
mbe mu jaa ki wru
mbe gbun ki na.
Kre tiŋge n wa,
a kii klɛ ni na kre yi.
A tiŋge ka nsraa wa
mi Nyiɛkpɔɔ kagbla wa,
mu nyu mu da na ki ni.
9 Mi Nyiɛkpɔɔ ndaa tiŋge kre pe
a kra nyu,
tinyi nyjɛ yiraa wa
mi Nyiɛkpɔɔ Eden kagbla
wa yire kro naa chaa
mbe pe na kre yi.
10 Fuŋga mi Nyiɛkpɔɔ Jaŋgafun wre paan mbe e nyina kee ŋga kie tiŋge ŋga ki gede, a ki klɛ su tloe na kre da. A ŋga kraa lee kre, kraa kiyɛ kpɔɔri. 11 Ki tia mi Nyiɛkpɔɔ na ki je, mna ki wru mu le waŋgrɛ kro ŋunu kɛɛ, mbe u ki sisam le mbe ki pe imi na ki fna. 12 Waŋgrɛ fɔnyi nyjɛ leele ndra ki sheli titi pie ki kun mbe chan, mbe ki ti wa. Ki klɛ yire, na ki babaari we kuari mbe nyina mbe sɛ nyuɛ, na landɛɛ nu tra kre nu kro. Mbe waŋgrɛ nyjɛ yii wa mu tni ki nyimi kre flo ki jaara mbe sɛ. 13 Hanyiɛlɛ we na paan mbra tuuri tiŋge too kre na, mbe nyaalam yurɛ paan ki klɛ yire taala mbe tro. 14 Kena mu yire fuŋgaami na shie, imi na tiŋge nyumu taa mu da kpan, kia jaa lɛ mbe gede ma na, ndee mbe ki klɛ sɛ su tloe na na. Pe tinyi kro pe mbe yira kuu imi na lewo kuu na mblɛ pe ku mu sɛ kuulo ndoo pre kɔŋgɔ nini kre.
15 Kee ŋga o Tafun Nyiɛkpɔɔ Jaŋgafun wre yuu yi kre, Ŋga ble kre tiŋge ŋga we ku mbe sɛ kuulo ndoo kre, mbe ti mbe bloe nyjɛ yii wa tra tapan yire ki tɔ, mbe ki pe na ki kumu pe pini. Mba ti mbe lɔɛ, na lafooloe fo mbe yili fimi na. Ŋgi na hin? Tiŋge kre ku. A mbe ti mbe ndram wɔ Lebanon nyuɛ na, mbe ki klɔɛ tinyi kro nyaara mbe wo. 16 Na tiŋge kre waa to tra, ki tiŋge we ti waŋgrɛ yire seeri. Na ni waa tia ki ku mu mblɛ pee wa kuulo wa kɔŋgɔ ni kre, kre tinyi nyjɛ yii wa Eden kagbla, na tinyi chichiele, na Lebanon tinyi chichiele nyjɛ na praa nyumu woni, a yi ku mu sɛ kuulo wa kre, na yi waa tiŋge kre too loo, yi yiɛ we shɔ wee wa. 17 Leele mblɛ pra tni ki nyimi, na pe nɔɔlɔ mblɛ pra yiri waŋgrɛ nu pre, na tiŋge kre kro pie sɛ kuulo ndoo wa, mbe sɛ ya mblɛ pra gbo brɔfiɛn yiɛshiin ni kre na. 18 Tinyi nyjɛ yii wa Eden kagbla wa kre, yi ŋgi haa ni pie jaa tɛɛ mbe mu yiɛnyiŋge, na mu kpɔɔmu kra hin? A nde ŋu na tinyi nyjɛ yii wa Eden kagbla kre nu yire kro we ku mbe sɛ kuulo ndoo. Leele mblɛ pe n mi Nyiɛkpɔɔ chin, a pra pe gbo brɔfiɛn yiɛshiin ni pre nu ee ku mbe sni. Egypt ŋunu Pharaoh na u leele na yire kee nyjɛ krɛrɛ we tuu. Mi e Tafun Nyiɛkpɔɔ Jaŋgafun wre ni ki yo.”