5 Ethiopia na Put trɛ, na Libya, na Arabia trɛ, na ni leele Israel wolo pre plɛ, na Egypt leele pre kro we chaa mbe ku brɔfiɛn yiɛshiin nyu na. 6 Kee ŋga o Tafun Nyiɛkpɔɔ wre yuu yi kre. Mu yire Migdol ŋga kii nyjeeri haa wa mu sɛ su Aswan ŋga kii wa tapan haa kre na, pre pe yire Egypt leele kro, pe kro we to ŋunɔ. Egypt tra ŋunɔwifɛɛnlɛ mblɛ pe peyɛ kpɔɔri pre kro we kla. Mi e Tafun Nyiɛkpɔɔ Jaŋgafun wre ni ki yo.

7 Egypt tra kre we kla mbe wɛ trɛ nyjɛ yi kla yire na, mbe ki kakpɔɛ yire kro kla poŋgo mbe sni waara, na kakpɔɛ nyjɛ yi kla yire yi. 8 Na ndaa kanhun le Egypt na, maa pre na mblɛ pe yaa pe na pre kro gbo kre, kre pie chin na mi wi pe Tafun Nyiɛkpɔɔ Jaŋgafun wre.

9 Na kre ble kre waa da, a ni Egypt leele kla kre, mbe leele tun mbe pe sɛ epo krɔ ni Ethiopia leele pan, mbe sɛ yo pe pan na ni paan mbe pe kla. Pie na jawa na pe shɔ, la, fiɛrɛ kpɔɔ we pe yii.”

10 O Tafun Nyiɛkpɔɔ wre yo mbo, “Mbe Babylon ŋunu Nebuchadnezzar wɔ mbe u ti mbe Egypt tra yɛtaara kre nyu to. 11 Nebuchadnezzar na u ŋunɔwifɛɛnlɛ mblɛ ndra ki sheli pre we pan mbe pe tɔ, mbe tra kre kla, mbe gboolo bɔ lawee kro nu.

12 Mbe ti mbe Nile lɔɔ kre, na ki lafoelee yua, mbe ni Egypt tra kre wru mbe le ndrashelifɛɛnlɛ kɛɛ. Waŋgra ka leele pie pan mbe Egypt waŋgra kre ja. Mi e Tafun Nyiɛkpɔɔ wre ni ki yo.”

13 Kee ŋga o Tafun Nyiɛkpɔɔ wre yuu yi kre mbo, “Mbe sɛɛnlɛ nyjɛ yii wa Memphis na yire kla. Ŋunu wa pe Egypt tra nu na, a mbe ti mbe fiɛrɛ leele pre yii kpɔɔ. 14 Mbe Egypt tra kre nyjeeri haa kla mbe ki sni waara, mbe kanhun le pe kakpɔɔ Zoan ŋga kii wa nyjeeri haa kre na. A mbe pe kakpɔɔ Thebes kre leele ndie tini. 15 Mbe ti mbe Egypt kakpɔɔ ŋga pe yeeri Pelusium, a pe mboo sin mu ki fɛ mu kun kre ni krɔkuɔn sisaa kre nya. A mbe Thebes ŋunɔwifɛɛnlɛ pre kro kla.

16 Mbe ti mbe kanhun to Egypt tra nu, mbe ki ti Pelusium kakpɔɔ kre kala nya kpɔɔ. Pie mboo ŋga pe sin mu Thebes fɛ mu kun kre kro juari mbe wo. Mbe ki ti fiɛrɛ Memphis leele yii kpɔɔ. 17 Yirifumblɔ mblɛ pee wa Heliopolis, na Bubastis, kakpɔɛ yire na kro we to ŋunɔ, mbe pe pe hamblɛ pre yii mbe sɛ. 18 Na ni waa kakpɔɔ Tahpanhes kre jaŋga, na ki faŋga nyjɛ ni pe peyɛ kpɔɔri kre shɔ pe kɛɛ kre, ki ble kre ndram we wɔ ki na. Tlo kpɔɔ ka we pan mbe Egypt tra kre tɔ kro, a pie kakpɔɛ yire leele yii mbe sɛ. 19 Na ni waa Egypt tra kre ndie tini kre kolo ŋga na, kre pie chin na mi wi pe Tafun Nyiɛkpɔɔ wre.”

20 Ŋga pra o yii mu sɛ Babylon tra nu kre, ki yɛlɛ kɛmbɔnunu wo kre nyiɛpɔ ŋga ki yiɛ klu, ki ble kɔɔnashin ble na, kre o Tafun Nyiɛkpɔɔ wre na yo ni pan mbo, 21 “Ezekiel, lewo pɔ, ni Egypt ŋunu wre kɛ ka, a u n ndro ta mbe u ki pɔ, ndee mbe ki le sɛsɛ nu mbe ki ti mbe ki tra yaari mbe faŋga ta, mbe u jaa brɔfiɛn yiɛshiin yii na ki ni na. 22 Kena kee ŋga mi e Tafun Nyiɛkpɔɔ Jaŋgafun wre yuu yi kre, mi wi Egypt ŋunu wre loŋgo. Ni paan mbe u kɛnyi yire kro shiin gbun mbe kuari na, chichie kre, na ŋga ki klu mu ka kre kro. Mbe ki ti brɔfiɛn yiɛshiin ŋga u kɛɛ kre shɔ mbe to. 23 Ni paan mbe Egypt tra kre leele gbun mbe nyina waŋgrɛ nu kro.

24 A mbe ti mbe Babylon ŋunu wre jaŋga ta, mbe ni ni brɔfiɛn yiɛshiin le u kɛɛ. La, mbe Egypt ŋunu wre kɛnyi gbun mbe kuari, mbe u jiin chiin mbe sɛ ku u loŋgo yiɛ na. 25 Mbe ti u faŋga kre kɔ u nu, mbe ni Babylon ŋunu wre ŋga faŋga. Mbe ni brɔfiɛn yiɛ shiin le u kɛɛ, a na waa ki tini mu le Egypt tra kre nu, kre pie chin na mi wi pe Tafun Nyiɛkpɔɔ wre. 26 Mbe Egypt leele pre gbun mbe nyina waŋgrɛ nu. Kre pie chin na mi wi pe Tafun Nyiɛkpɔɔ wre.”