Ezekiel 29

Egypt Kprakuɔn

Ŋga pra o yii mu sɛ Babylon na kre, ki yɛlɛ kɛ wo kre, nyiɛpɔ kɛ kre ble kɛmbɔshiin na, kre o Tafun Nyiɛkpɔɔ wre na yo ni pan mbo, 2 “Ezekiel, lewo pɔ, yiɛ kna mu tɛɛ Egypt ŋunu Pharaoh na, mu ni kee shɔ mu yo mu ŋunu wre, na Egypt tra kre kro taan. 3 Yo u pan na, Kee ŋga mi e Tafun Nyiɛkpɔɔ Jaŋgafun wre yuu yi kre, Ŋu Egypt ŋunu Pharaoh mbe mu ndie tini, pan mu nyi na dɛnkɛ ŋmba u sni lafoelee nu wi. Ŋu mu yuu na, Ni wo yi Nile lɔɔ kre, mi ndaa ki wa niyɛ pan. 4 La, mi Nyiɛkpɔɔ we mu yii na drawa ni gbekɛɛn kajle nu, mbe mbroe mblɛ mu lafoelee yire nu kre paan mbra mbra mu wejiŋge na. 5 Mbe ŋu na mbroe mblɛ pee wa mu lafoelee yire nu kro wɔ mbe wa tablɔ tra kre na. Fimi gbeŋglen na mu sɛ to, a ndro wa kɛ taa mu na, ndee mbe mu wru. Yurɛ mblɛ pe kila na tro pie mu ka, mbe hanyiɛlɛ mu kaara haŋa li. 6 Kre leele mblɛ pee wa mu tni Egypt tra nu kre we chin na mi wi pe Tafun Nyiɛkpɔɔ wre.

Israel leele naa jawa na mu jaa pe shɔ, jaa na pan mu nyi na braŋgɔ kaan yi, faŋga ka nsraa wa mu nu. 7 Pra kɛ wa mu mu yii, a mna pe patiɛ suulo mu wla, pra gbun mu na, a mna tia pra to kanyjuula.

8 Ki tia kee ŋga o Tafun Nyiɛkpɔɔ Jaŋgafun wre yuu yi kre, mbe pan na brɔfiɛn yiɛshiin ni mu na, mbe mu leele na mu yurɛ kro gbo. 9 Egypt tra we sni waara gbeŋglen. Kre pie chin na mi wi pe Tafun Nyiɛkpɔɔ wre. Ŋgi na hin?

Ŋu mnaa yuu na, ‘Ni wo yi Nile lɔɔ kre, mi ndaa ki wa.’ 10 Ki tia ni yiri mu ŋu na mu lafoelee yire taan, a mbe Egypt tra kre ja, mbe ki sni waara kpokpo mbe yire Migdol na, mbe sɛ yili Aswan na, hali mbe sɛ su Ethiopia sam na. 11 Ndro, ndee yurɔ wa tro kre tra kre nu, a yɛlɛ fuloe shiin na ndro wa jaa tni tra kre nu. 12 Mbe ti mbe Egypt tra kre kla mbe wɛ trɛ nyjɛ yi kla mu sni waara yire na, a pan mbe ti ki kakpɔɛ yire kla yɛlɛ fuloe shiin mbe wɛ kakpɔɛ nyjɛ yi kla yire na. Mbe Egypt leele pre gbun mbe nyina waŋgrɛ nu.

13 Kee ŋga o Tafun Nyiɛkpɔɔ Jaŋgafun wre yuu yi kre. Na yɛlɛ fuloe shiin yire nyu waa to, mbe ndru mbe Egypt leele pre yoori mbe yili waŋgrɛ nyjɛ nu pe nyina mu sɛ tni yire nu. 14 Mbe pe shɔ leele mblɛ pe pe yii mu sɛ pre kɛɛ, mbe ti pe ndru mbe paan tni Egypt tra kre nyjeeri haa wa, pe tolɛɛlɛ tra kre nu. La, pia faŋga ta na. 15 Pia faŋga ta mbe jaa jaŋga li waŋgrɛ hɛnyi yire na imi na pra piin fa kre. 16 Na ki pan ma, Israel waŋgra wa na kaan pe na na, na Israel leele pre waa kee nyjɛ yi Egypt tra leele pre da yire sɔɔnri, kre pie chin na ŋga pra sɛ pe pan na pe ya pe na kre, na pra sisaa pe ni na. Kre Israel leele pre we chin na mi wi pe Tafun Nyiɛkpɔɔ wre.”

17 Ŋga pra o yii mna sɛ Babylon tra nu kre, ki yɛlɛ fulo na kɔɔnashin wo kre nyiɛpɔ jle kre ble ŋga kra yiɛklu na, kre o Tafun Nyiɛkpɔɔ Jaŋgafun wre na yo ni pan mbo,

18 “Ezekiel, lewo pɔ, Babylon ŋunu Nebuchadnezzar na sɛ na u ŋunɔwifɛɛnlɛ ni mna sɛ wi na Tyre ni. Wra tia u ŋunɔwifɛɛnlɛ pre na tuuro nyjɛ yi sna ta mna tio, a pe ndrɛ pɔ, a pe patiɛ na laala mna pe klɛ. Ande wre na u ŋunɔwifɛɛnlɛ pre nsra fɔtɔɔrɔ chichie ka ta ŋunɔ kre nu.

19 Kena kee ŋga o Tafun Nyiɛkpɔɔ Jaŋgafun wre yuu yi kre, ni paan mbe Egypt tra kre wru mbe le Babylon ŋunu Nebuchadnezzar kɛɛ, mbe u pe krɔyirɛ koli mbe sɛ. We tra kre yirɛ kro foolo mbe ta, mbe yi tɛɛ mbe u ŋunɔwifɛɛnlɛ pre fɔlɔ tɔ, ŋga pra sɛ wi Tyre leele ni kre ndra na. 20 Egypt tra kre ni mbe u fɔlɔ tɔ, kee ŋga wre na u ŋunɔwifɛɛnlɛ na pe mu ni ŋga kre ndra na. Mi e Tafun Nyiɛkpɔɔ Jaŋgafun wre ni ki yo.

21 Kre ble kre mbe ti mbe Israel leele faŋga ta, a mu yire pe lalaa mbe paara. Kre pie chin na mi wi pe Tafun Nyiɛkpɔɔ wre.”