Tyre Ŋunu Kprakuɔn
28
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, yo Tyre ŋunu wre pan na, Kee ŋga o Tafun Nyiɛkpɔɔ Jaŋgafun wre yuu yi kre.Mu muyɛ kpɔɔri mu loloŋgo nu,
na yuu muyɛ pan na,
sɛɛn wi mi,
a nii wa mu tni sɛɛn ŋujɔɔn na,
epo lalaa.
La, lewo wi ŋu, sɛɛn ma ŋu,
mu jawala pini na mu kala chin
na sɛɛn yi.
3 Mu kala chin mu wɛ
Daniel na ra?
Kala ka n wa mbe jaa ndra
mu na ra?
4 Mu kachindɛ, na mu nɔɔloo
ki tia mu muyɛ ta,
mu swanyiɛ na swafiŋge cha
mu tɛɛ mu swa tɛɛ haa.
5 Ŋga mu jafa li mu chin
kre ndra na,
ki tia yirɛɛ wa mu pan titi,
a mu yɛtaara kre tia,
mna muyɛ kpɔɔri.
6 Kre ndra na kee ŋga o Tafun Nyiɛkpɔɔ Jaŋgafun wre yuu yi kre. Ŋga mu jawa na mu kala chin, na muyɛ wrui na gbuun sɛɛn na kre ndra na, 7 ni paan na waŋgra ka leele ni mbe pe paan yiri mbe mu taan. Pre leele pre ndra sheli, pie paan brɔfiɛn yiɛshiin tini mu na, mbe mu nyumu, na mu kachindɛ, na mu yɛnyiŋge kro kla. 8 Mu kumu sisaa ku epo yiɛ na, a mu sɛ kuulo ndoo. 9 Mu jaa muyɛ pe na sɛɛn wi ŋu mu loŋgoolo mblɛ pe mu kuu kre kɛɛ ra? Lewo wi ŋu, ma jaa muyɛ pe na sɛɛn yi mblɛ pe mu kuu kre kɛɛ. 10 Mu ku fumblɔ kɛɛ na ndro ŋmba u n mi Nyiɛkpɔɔ chin wi. Mi mu Tafun Nyiɛkpɔɔ Jaŋgafun wre ni ki yo.”
Tyre Ŋunu Wre Kumu
11 O Tafun Nyiɛkpɔɔ wre yo ni pan mbo, 12 “Ezekiel, lewo pɔ, nyɛni mu Tyre ŋunu wre ŋga mu yo u pan na, kee ŋga o Tafun Nyiɛkpɔɔ Jaŋgafun wre yuu yi kre, mna nyu kolo kro na, mna pe chasi, a kachindɛ na mu nyi, a leele naa mu ŋai.
13 Mnaa wa Eden kagbla kre nu,
mi Nyiɛkpɔɔ kagbla kre.
Ndaa mu wa a mna swanyiɛ,
na dnɛ chichiele nyjɛ mu chin
ŋga kro tɛɛ mu muyɛ san, ruby,
na topaz, na emerald,
na chrysolite, na onyx, na jasper,
na sapphire, na turquoise,
na beryl, yire ni mna muyɛ san.
14 Mi Nyiɛkpɔɔ ndaa mu wɔ,
mna mu pe Cherub Nyiɛkpɔɔ
bituŋu lopom ŋmba mu lawee sri.
Ni nyua cheche kre na mna nyi,
na nyaari na tro dnɛ nyjɛ yi nyini plipli lalaa.
15 Mu yire mu wa ble,
ndro nsra mu kee sisaa ta,
mu yo mu pan mu su na pe
sisam kee nya mu nu.
16 Mu jafa ŋga mnaa lii lawee
kro nu kre tia mu ndra sheli,
a mna sisam pini.
Kre ki tia ni mu tini mu nyifɛɛrɛ ni
mu yili ni nyua kre na.
Ŋu cherub ŋmba mnaa ni sri,
ndaa mu ni mu flo dnɛ chichiele
nyjɛ yiraa nyini plipli yire lalaa.
17 Mna mu nyumu kre tɛɛ
na muyɛ kpɔɔri,
a mna yila mu yɛnyiŋge kre na
mna mu kachindɛ kre kla.
A ki tia ndaa mu viŋge mu wa tra,
a mna pe jaaraa mu ŋulo ŋga.
18 Mnaa leele mblɛ ŋu
na pre naa jafa lii pre dnumu,
a kra tia mna lawee nyjɛ
praa mu sumi yire tɔ nɛɛrɛ ni.
Kre ki tia a ndaa tia kanhun
na to mu kakpɔɔ kre na,
mna mu yirɛ kro sro.
Leele mblɛ pe mu chin
kre mu nya na mu shɔ
mu kaari tɔɔnrɔ mu wo tra.
19 Waŋgrɛ nyjɛ leele pra mu
chin fa kre kro ki pe fo,
na pe mu kla,
a ndro wa mu nya nyini ni na.”
Sidon Kprakuɔn
20 O Tafun Nyiɛkpɔɔ wre na yo ni pan mbo, 21 “Ezekiel, lewo pɔ, mu yiɛ kna Sidon na, mu ni kee shɔ mu yo mu ki taan. 22 Mu yo ki pan na, kee ŋga pe Tafun Nyiɛkpɔɔ Jaŋgafun wre yuu yi kre, Sidon, mbe mu ndie tini, a kee ŋga mbe mu pe kre we ti mbe leele ni ŋga yɛnyiŋge. Na ni waa mu ndie tini, mu tia ndro kro nya na ni pe cheche kre, kre pie chin na mi wi pe Tafun Nyiɛkpɔɔ wre. 23 Mbe ti mbe yira le e nu, a mbe ti mbe nyimi na foo e lete na. Brɔfiɛn yiɛshiin we le e nu, mbe e gbo mbe sɛ lawee kro nu. Kre ee chin na mi wi e Tafun Nyiɛkpɔɔ wre.”
24 Na ki waa pan ma kre, Israel leele wa chaminae ndrashelifɛɛnlɛ ta mbe praa pe tɔɔra na, na wuuro yi na. Kre pie chin na mi wi pe Tafun Nyiɛkpɔɔ wre. 25 Kee ŋga o Tafun Nyiɛkpɔɔ Jaŋgafun wre yuu yi kre mbo, “Na ni waa Israel leele kro yoori waŋgrɛ nyjɛ nu pe nyina mu sɛ tni yire kro nu, a ndaa pe nyina na ni pe cheche waŋgrɛ yire yiɛ na kre, kre pre titi we pe tra ta mbe tni, tra ŋga ndaa ni sumifun Jacob ŋga kre. 26 Pie tni tra kre nu wejinyiŋge nu, mbe nyinyi sin, mbe tre seele tɛɛ. Na ni waa pe tnifɛɛnlɛ mblɛ lɛ pe loŋgoolo mblɛ pe pe tɛɛlɛ pre ndie tini imi na ki fna kre, Israel leele pre we wejinyiŋge ta. Kre pie chin na mi wi pe Tafun Nyiɛkpɔɔ wre.”