Pe Nyɛni Mu Tyre Ŋga
27
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, kumu mɛɛ kɔ mu wo Tyre na. 3 Yo Tyre kakpɔɔ ŋga kii wa epo nyu na, na jafa lii na chiɛ nyjɛ yii wa epo nyu na kro ni kre pan na. Kee ŋga o Tafun Nyiɛkpɔɔ Jaŋgafun wre yuu yi kre,ŋu Tyre, mu yuu muyɛ pan na,
mu nyu titi,
4 Ŋu jaŋga kraa wa epo na,
a mu sinfɛɛnlɛ mu pe
a mna nyu na epo krɔ yi.
5 Kɛɛn nyjɛ ni pra mu sin yire kro,
Hermon nyua na pra yiri na yi ni,
mna sɛ cedar kaan kun
Lebanon tra nu,
mu ki tɛɛ mu kaan prɔɔrɔ pe,
mu kan epo krɔ kpɔɔ kre lalaa.
6 Bashan tiŋge shelee ni pra tɛɛ mu,
kɛɛn nyjɛ ni pe krɔ kre bri kre pe.
A tiŋge shelee ŋga ki yiri
Cyprus na ni pra tɛɛ
mna yi lam pe,
mna hlo ŋgaala tɛɛ
mna ki lam san.
7 Egypt yoŋgo chichie ŋga nu
pra yirɛ tin mu le,
kre pra kan mu mbra krɔ kre na,
na fuflɛ gbuun mbe kraa shie
na ki ni, a kre na yi ki flaŋgaa.
Mbruku yoŋgo, na yoŋgo
nyiɛ duu, nyjɛ yira yiri
lɔɔ nyu chia Elishah na,
kre pra wo krɔ kre na,
mbe nyimi wo ki na.
8 Sidon, na Arvad leele
praa krɔ kre bri,
a ŋu titi leele mblɛ pe kɛnyu
tnumu chin,
praa tnumu tuni ki nu,
9 Mu krɔ kre gbeelefɛɛnlɛ
mblɛ pe tnumu chin,
na yiri Gebal na,
a pre praa yi lawee
nyjɛ nu nyumu troi yire yurɔ.
Krɔɛ tataara, na yi tnumu tunfɛɛnlɛ,
naa paan na mu krɔ kre fni
pra jafa lii,
10 Bilɛ mblɛ pra yiri Persia,
na Lydia, na Put na,
na chaa mu ŋunɔwifɛɛnlɛ nu,
Praa pe ŋunɔ wiyirɛ nyjɛ ni
praa peyɛ toni,
pe ŋunɔ wi juulee hlu mu mboe na,
mna tia mna yɛnyiŋge ta.
11 Arvad, na Helech bilɛ praa mu sri,
a mblɛ pra yiri Gammad na
praa yire mu nyinyi gedenyi
yire na na chia kre sri,
mnaa pe ŋunɔ wiyirɛ nyjɛ ni
praa peyɛ toni yire hlu
mu mboe na,
a kra tia mna nyu titi.
12 Tarshish leele naa jafa lii
na e ni, ŋga mna muyɛ ta kpɔɔ,
a yirɛ na bɔ mu pan kre ndra na,
praa paan na swafiŋge,
na tɔɔnrɔ, na prim,
chinɛ mu jafalifɛɛnlɛ pre pan.
13 Greece, na Tubal, na Meshech leele naa jafa lii na e ni, na tinlɛ, na yirɛ nyjɛ pe swafre teeri na piin chinɛ e pan.
14 Beth-Togarmah leele naa paan na soolo mblɛ ni pe tnumu tuni, na ŋunɔ wi soolo, na bubunlɔ chinɛ mu jafalifɛɛnlɛ pan.
15 Yire na Rhodes waŋgra kre, na lɔɔ nyu chiɛ yire leele naa fni na jafa lii, praa hlo ŋgaala, na kɛɛn wɔɛ yɛ teeri na e fɔlɔ toni.
16 A yire na Edom leele naa fni na jafa lii, ŋga yirɛ na bɔ mu pan kre ndra na, praa paan na dnɛ chichiele nyjɛ pe yeeri turquoise, na coral, na rubies, na yonyi nyiɛ duu, na yirɛ nyjɛ praa tini kɛnyi ni, na yirɛ chinɛ mu pan.
17 Judah, na Israel leele naa jafa lii wa na, praa paan na shɔlɔ, na fig sɛnyi, na srɛ nyumu, na simi li wo, na simi fa wo ni na yirɛ chinɛ.
18 Damascus leele naa jafa lii wa na, ŋga mna nyu, a yirɛ na bɔ mu pan kre ndra na, praa paan na yirɛ chinɛ na simi gbɔ wee nyjɛ yira yiri Helbon na ni, yire na mbayooro nyjɛ yira yiri Zahar na ni.
19 Dan leele, na Greek leele mblɛ pra yiri Uzal tra nu kre naa paan na yirɛ chinɛ tɔɔnrɔ, na tuwe ndiom tɛɛn ni.
20 Dedan leele naa paan na sniyirɛ nyjɛ ni pe soo krɛgɛ sani ni, na yirɛ chinɛ e pan.
21 Arabia leele, na Kedar ŋulo kro naa paan na mbaala biile, na mbapilɛ na sikaala ni na yirɛ chinɛ e pan.
22 Yire na Sheba, na Raamah leele naa fni na jafa lii, a praa tuwe ndiom tɛɛn nyininyini, na dnɛ chichiele, na swanyiɛ teeri na yirɛ chinɛ e pan.
23 Pan mu leele naa jafa lii na Haran, na Canneh, na Eden, na Sheba, na Asshur, na Kilmad leele ni. 24 Praa paan na dodonyi ndrɔshelee ni, na yonyi nyjɛ pra tin jese nyiɛduu ni, na nyjɛ nu pra nyunɔ mu le ni, na yonyi nyjɛ na pe jiin, a yi nyunɔmu na nɛɛ ni, na mɛnyi nyjɛ nu faŋga nyi ni na prɛ e pan.
25 Tarshish krɔɛ yiraa
mu tuuro tru na shie,
a pan mna nyi na krɔ ŋga ki tuuro
snam wee tru epo yiɛ na,
26 a mu krɔ ŋmaafɛɛnlɛ
na shie na mu ni, epo yiɛ na.
La, yila finhaa fuflɛ we gbun kpɔɔ,
mbe mu kuari bujibuji,
epo yiɛ na.
27 Yirɛ nyjɛ yii wa krɔ kre nu
kro we fun, mbe yi ŋmaafɛɛnlɛ,
na yi tnumutunfɛɛnlɛ, na jafalifɛɛnlɛ,
na ŋunɔwifɛɛnlɛ mblɛ pee wa
yi nu kro fun.
28 Na leele mblɛ pee wa krɔɛ yire
nu kre waa na gble leni,
eponyufɛɛnlɛ pre we ki loo
mbra seeri.
29 Krɔɛ hɛnyi yire ŋmaafɛɛnlɛ,
we tii mbe yi ti,
yi tnumu tunfɛɛnlɛ pre kro,
we tii yi nu mbe sɛ yire
epo nyu na wa.
30 Pie gble le kpɔɔ,
mbra nyɛni kpɔɔ mbra mu kaan.
Pie na bloŋgo gbuun mbra leni
pe ndrɛ, mbra gbila tɔɔnrɔ nu.
31 Mu ndra na,
pie pe ndrɛ klu,
mbe kumu yonyi tɔ,
Pie fooro kpɔɔ tɛɛ
mbe nyɛni mbe mu ŋga.
32 Imi na pie na nyɛni kpɔɔ
mbra mu kaan kre,
pan pie na kumu mɛɛ koni
mbra mu kaan,
mbo, Tyre kakpɔɔ,
mu ŋmbrɔ nsraa wa,
mna wɛ kakpɔɛ kro na,
a epo na mu fɛ mu ku,
la, aŋga mu nyu ku.
33 Na mu yirɛ prɛfɛɛnlɛ sɛ na
mu yirɛ ni krɔ ni waŋgra ka nu,
ki taan ki leele pan.
Yirɛ nyjɛ yii wa mu pan mu nɛɛ
kre ndra na, ŋulo plɛ naa
yire yi na na peyɛ taa.
34 La, epo mu krɔɛ yire kuari,
a yi tii mu sɛ tapan,
mu yirɛ prɛ wee,
na mu tnumu tunfɛɛnlɛ,
kro fun epo nu.
35 Leele mblɛ pee wa
mu tni epo nyu na pre kro,
mu kee pe fo.
A ki tia fiɛrɛ pe ŋulo yii kpɔɔ,
a pe yiɛ je.
36 Ŋga mu fun, a ndro wa mu nya
na kre tia jafalifɛɛnlɛ
mblɛ tra ŋga nu kro na fiɛ,
pe jawa ŋga ki mu da kre
we pe nya na.”