Tyre Kprakuɔn
26
Ŋga pra o yii mu sɛ Babylon tra nu kre yɛlɛ kɛmbɔnunu wo kre ble ŋga kra yiɛ klu na, kre o Tafun Nyiɛkpɔɔ wre na yo ni pan na, 2 “Ezekiel, lewo pɔ, Tyre kakpɔɔ kre leele yiɛ shɔ, a pra yuu na, pe Jerusalem ŋga na waŋgrɛ hɛnyi yire leele shie na jafa lii kre ja, a ki krɔɛ nyaala mu tni, ŋga pe ki ja ŋga, fuŋga oo nyu. 3 Ki tia kee ŋga o Tafun Nyiɛkpɔɔ Jaŋgafun wre yuu yi kre, yire Tyre leele kee ni bin, mbe yila ki na mbe ti waŋgrɛ tataara pan mbe yirii e taan, pan pie e pe imi na epo nyumu kani na paan na woni fimi na kre yi. 4 Pie pan mbe Tyre kakpɔɔ mboe yire juari mbe wo, mbe ki nyinyi gedenyi nyjɛ na pe yire na chia kre sri yire juari, mbe ni ki juaraa yire pɔ mbe sɛ wo, mbe ki kro dnɛ yire waara. 5 Bawa mbroe wɔfɛɛnlɛ we na shie mbra pe asau chali, ŋgi na hin? Pan mi e Tafun Nyiɛkpɔɔ Jaŋgafun wre yo. Waŋgrɛ yire we pan mbe e foolo mbe sɛ. 6 A pie leele mblɛ pee wa pe chiɛ hɛnyi yire na, a yi n wa epo nyu na pre kro gbo brɔfiɛn yiɛshiin ni. Kre pie chin na mi wi pe Tafun Nyiɛkpɔɔ wre.7 Kee ŋga o Tafun Nyiɛkpɔɔ Jaŋgafun wre yuu yi kre, Babylon ŋunu Nebuchadnezzar, ŋmba wi ŋunu kpɔɔ wre we yiri nyjeeri haa mbe pan na u soolo, na u sookɛɛ, na wifɛɛnlɛ tataara ni mbe wi na Tyre kakpɔɔ kre ni. 8 We chiɛ hɛnyi nyjɛ yii wa epo nyu na kre leele gbo. We tra ble ble yi mboe krɔ mbe yi fɛ mbe kun, mbe nduu na pe wiyirɛ ni mbe paan wi na pe ni. 9 We ti mbe u wifɛɛnlɛ pre plɛ kɛɛn badɛnyi tɛɛ mbe e mboe yire gbun mbe juari, mbe plɛ tɔɔnrɔ tɛɛ mbe e nyinyi gedenyi nyjɛ na e ndru na chia sri kre juari mbe wo. 10 U soolo pre nɛɛmu we ti mbe bloŋgo jaa mu tɔ. Na soolo pre waa na pe trogo, na pe sookɛɛ yire tini na paan mbe le gbuntitirem ni chia ŋga mboe yi juari mu wo kre na, pe tiŋge we ti mbe mu mboe yire na seeri. 11 Soolo pre we kakpɔɔ kre lete taanla kro mbe tro, we ti mbe pe mu leele pre kro gbo brɔfiɛn yiɛshiin ni. A pie chia kre pilaasi nyjɛ nu faŋga nyi yire juari mbe wo tra. 12 Pie e krɔyirɛ foolo, mbe e mboe yire gbun mbe juari, mbe e nyinyi chichiele nyjɛ e sin yire kro juari, mbe e dnɛ, na e kɛɛn, na e mboe juaraa yire koli mbe sɛ yi wo epo nu. 13 Mbe ti mbe mɛɛ nyjɛ e koni yire nyu to, a ndro wa juru nyjɛ e gbuun kre tiŋge loo na. 14 Mbe ti e kakpɔɔ kre kro dnɛ, mbe mbroe wɔfɛɛnlɛ na pe asau chali wa. A ndro wa jaa ki sin na. Mi e Tafun Nyiɛkpɔɔ Jaŋgafun wre ni ki yo.
15 Kee ŋga o Tafun Nyiɛkpɔɔ Jaŋgafun wre yuu Tyre leele pan yi kre, Na pe waa na Tyre kapɔɔ kre jee, na leele pre kuu, a pra jiin kre, na chiɛ nyjɛ epo nyu na wa kre leele waa pe tiŋge loo, fiɛrɛ we ti mbe pra seeri. 16 Kie ti mbe ŋulo mblɛ pee wa epo nyu na wa pre tii pe ŋujɔɔn na, mbe pe dodonyi chichiele nyjɛ nu pe nyunɔ mu le yire wɔ mbe waari, mbe fiɛrɛ kpɔɔ ti pe tni tni tra mbra seeri. 17 Bawa pie tni mbra kumu mɛɛ koni mbra yuu na,
kakpɔɔ ŋga kii mɛɛ ni kre,
pe mu kla.
Leele mblɛ e naa wa mu tni epo nyu na,
mnaa leele kro piɛri wa kre,
pe e kla aŋga.
18 Fuŋga rɛ, Tyre kakpɔɔ kre ja,
a ki tia fiɛrɛ kpɔɔ epo nyu tnifɛɛnlɛ pre yii,
a kuyɔɔsu chiɛ hɛnyi yire leele,
pre na seeri.
19 Kee ŋga e Tafun Nyiɛkpɔɔ Jaŋgafun wre yuu yi kre, Na ni waa tia e kakpɔɛ yire sni waara, a leele kɔ yi na, a ndaa tia epo nyumu pan mu tra kre tɔ kre, 20 mbe ti mbe e sɛ kuulo ndoo, ee fawolo mblɛ chiɛ pra ja, mu pe gbo pre kɔŋgɔ ni. Kuulo ndoo wa ee kro, a leele wa ja mbe kakpɔɔ kre nyi na. 21 Mbe ti mbe e kumu fɔɔn kun. Leele we na e chaa mbe nya, a pia e nya na fio. Pan mi e Tafun Nyiɛkpɔɔ Jaŋgafun wre yo.”