Ammon Leele Kprakuɔn
25
O Tafun Nyiɛkpɔɔ wre na yo ni pan na, 2 “Ezekiel, lewo pɔ, yiɛ kna mu kan Ammon leele pre haa, mu ni kee shɔ mu yo mu pe taan. 3 Yo pe pan na, ‘E Tafun Nyiɛkpɔɔ Jaŋgafun wre kee ŋga u yuu yi kre, ŋgi na hin? Ŋga pra ni Suminyuŋgo kre kla kre, e yiɛ na shɔ, a ŋga pra Israel tra kre kla mna Judah leele yii mu sɛ kre, kra tna e pan. 4 Ki tia mbe e wru mbe le leele mblɛ pee wa na shie tablɔ lawee yila finhaa wa pre kɛɛ. Pie pan mbe pe yonyi nyinyi sin mbe tni mbe chaa e nu. E tinyi sɛnyi pie na kaa, mbra e nɔnɔ gboo. 5 Mbe e kakpɔɔ ŋga pe yeeri Rabbah kre kaari nyuuma kahaa, mbe Ammon tra kre haŋa kaari mbaala wuuhaa, na ki pan ma kre ee chin na mi wi e Tafun Nyiɛkpɔɔ wre.’ 6 Kena kee ŋga o Tafun Nyiɛkpɔɔ Jaŋgafun wre yuu yi kre, ŋga e naa jele sini tra, na kɛnyi koori, na yɛshɔɔrɔ lii, mna Israel tra kre le fiɛn kre ndra na, 7 mbe yiri mbe e taan, mbe ti waŋgrɛ yire e foolo, mbe e kla, a yaa jaa pe waŋgra na, kre ee chin na mi wi e Tafun Nyiɛkpɔɔ wre.”Moab Kprakuɔn
8 Kee ŋga o Tafun Nyiɛkpɔɔ Jaŋgafun wre yuu yi kre, “Ŋga Moab leele yuu na, ‘E le, Judah waŋgra kre kna mu pe na waŋgrɛ hɛnyi yire yi.’ 9 Kee nyjɛ pe yuu kre ndra na, mbe ti leele pan mbe wi na kakpɔɛ nyjɛ Moab sam na yire ni, yire yi Beth-Jeshimoth, na Baal-Meon, na Kiriathaim. Yire chiɛ yire yi tra kre yɛnyiŋge. 10 Leele mblɛ pie yiri yila finhaa tablɔ tra kre nu mbe pan kre chɔɔ we pan mbe wi na Moab, Ammon leele pre ni mbe pe ja. Mbe ki ti ndro wa Ammon waŋgra kre sɔɔnri na. 11 Mbe Moab leele ndie tini, mbe leele mblɛ pee wa wa pre chin na mi wi e Tafun Nyiɛkpɔɔ wre.”
Edom Kprakuɔn
12 Kee ŋga o Tafun Nyiɛkpɔɔ Jaŋgafun wre yuu yi kre, “Ŋga Edom leele na fɔlɔ tɔ Judah leele na kre ndra na, ki tia pe pimi li.” 13 Kena kee ŋga o Tafun Nyiɛkpɔɔ Jaŋgafun wre yuu yi kre, “Mbe Edom leele ndie tini. Mbe ti mbe pe leele, na pe yurɛ kro ku, mbe tra kre sni waara, mu yire Teman na mu sɛ su Dedan na, pie yi leele gbo brɔfiɛn yiɛshiin ni. 14 Mbe ti mbe ni leele Israel wolo pre sɛ fɔlɔ tɔ Edom leele pre na, pie ti mbe Edom leele pre ni krɔ fiɛrɛ wo kre nya, mbe chin na mi ni fɔlɔ toni pe na. Pan mi e Tafun Nyiɛkpɔɔ Jaŋgafun wre yo.”
Philistine Leele Kprakuɔn
15 Kee ŋga o Tafun Nyiɛkpɔɔ Jaŋgafun wre yuu yi kre, “Ŋga Philistine leele na ndrashelee tɛɛ mna loŋgooro jawala le na Judah leele ni, maa pe chaa mbe fɔlɔ tɔ pe na, mbra pe kla kre ndra na, 16 ki tia kee ŋga mi e Tafun Nyiɛkpɔɔ Jaŋgafun wre yuu yi kre, ni paan mbe yiri mbe Philistine leele pre taan, mbe leele mblɛ pee wa Kereth na kre gbo, a mbe ki leele hamblɛ mblɛ pee wa mu tni epo nyu na pre kla. 17 Mbe fɔlɔ tɔ pe na kpɔɔ, a krɔ ni mbe pe ndie tini. Na ni waa fɔlɔ tɔ pe na ma kre, kre pie chin na mi wi pe Tafun Nyiɛkpɔɔ wre.”