Chɔ Sɔɔ Wo
24
Ŋga pra Israel leele yii mu sɛ Babylon tra nu kre, ki yɛlɛ kɔɔnanyjirɛ wo kre, nyiɛpɔ kɛ wo kre ble kɛ na, o Tafun Nyiɛkpɔɔ wre na yo ni pan mbo, 2 “Ezekiel, lewo pɔ, kre ble ŋga nyunɔ mu tɛɛ. Ŋgi na hin? Kre ble ŋga na Babylon ŋunu le Jerusalem na mu ki fɛ mu kun, na wii na pe ni. 3 Kena kre yomini ŋga gbun Israel leele mblɛ pe yiri mu ni taan kre pan na, kee ŋga o Tafun Nyiɛkpɔɔ Jaŋgafun wre yuu yi kre,‘E chɔ kre taa kanhun na, e ki taa,
e nyumu kna e le ki nu.
4 Mbe e kaara knumu mbe le ki nu,
e yurɛ pre jeelee,
na pe puɛ tɛɛn yire knumu e le,
e kajle chichiele yire chaa yi nu.
5 E yurɛ mblɛ pe nyu kre wɔ nagbɛɛ,
e kejenyi le chɔ kre na,
mbe kaara yire sɔɔ,
e yi sɔɔ yire
na kajle yire ni chichie.’”
6 Kee ŋga e Tafun Nyiɛkpɔɔ
Jaŋgafun wre yuu yi kre,
“Linkufɛɛnlɛ kakpɔɔ kre, mu atɛ,
Pan mu nyi na chɔ sɔɔ wo
ŋga nu sepe u chɔ gbo mu le yi,
a ki lam wa jaa je mbe yili yi.
Pie kaara nyjɛ pe sɔɔ ki nu
kre wɔ nununu,
a ka wa kro ki nu.
7 Pra leele gbo kakpɔɔ kre na,
mna pe nyimi wo dnɛ na,
pe nsra pe nyimi yire wo tra,
a tra na yi tɔ.
8 Ni nyimi yire nyaa wa,
a yira ni sɔɔnri,
mbe ki ti ni krɔ tɛɛ
mbe linkufɛɛnlɛ pre fɔlɔ tɔ.”
9 Kena kee ŋga e Tafun Nyiɛkpɔɔ
Jaŋgafun wre yuu yi kre,
“Linkufɛɛnlɛ kakpɔɔ kre, mu atɛ!
Mi titi we kejenyi yire ble
mbe yi nɛɛ mbe sɛ nyjeeri.
10 Kena e ti mbe kejenyi yire nɛɛ
mbe ya,
e kanhun kre fɔ mbe ki nyi.
E kaara yire sɔɔ mbe yi be,
e tuwe ndion tɛɛn le yi nu,
mbe kajle yire be mbe shɔ.
11 Mbe e chɔ waara kre ti kanhun
naŋgua kre na,
mbe ki wɛɛri mbe nyina.
Mbe ki ti mbe chɔ kre shɔ
mbe nyina,
mbe ki ti nɛɛrɛ yire yili ki nu.
12 Ni tro kolo kro na mu pra,
hali chɔ kre nɛɛrɛ yire wa jaa kɔ,
ŋgi na hin?
Chɔ kre nɛɛrɛ yire n pe fiɛn,
hali kanhun kre wa jaa yi shɔ
mbe laa.
13 Jerusalem, mu sisam, na mu nɛɛrɛ kee yire nɛɛ, a ndaa chaa mbe yi laa mu na, a yi n ja na laari. Yia jaa laa mu na, fɔna ni krɔ ŋga ki kun na mu ni kre nyjii tun.
14 Mi e Tafun Nyiɛkpɔɔ wre ni paara kre. Nyjila da mbe ni kee ŋga mbe pe kre pe, mba ki pee ti, a mba ndro fooro le, ndee mbe ni jawala chinɛ ki pee na. Mu kee nyjɛ mu pe yire mbe le mbe mu kpra kun. Mi e Tafun Nyiɛkpɔɔ Jaŋgafun wre ni ki yo.”
Ezekiel Chɔ Na Ku
15 O Tafun Nyiɛkpɔɔ wre na yo ni pan na, 16 “Ezekiel, lewo pɔ, churɛ nunu mbe wa mbe ndro ŋmba na mu yiɛ nyi titi wre wɔ mu kɛɛ. Na ki pan ma maashia nyɛni, ndee mbe fooro li, ndee mbe tni mbe yotunyi na woni mu pan. 17 Ta jiin lɛɛ brɛmm, a maashia ŋmba u ku wre kumu pe. A maashia namu laa mu ndra na, ndee mbe kpawrɛ wɔ jeelee na, a maashia yira tɛɛ mbe mu yiɛ tapan haa tɔ, ndee mbe paala sro ŋga kumu pefɛɛnlɛ lii kre ka le nyuu.”
18 A ndaa sɛ paara leele pre pan bnimi, ki yilakɔŋgɔ to, a ni chɔ na ku. Ŋga nyiŋge na se bnimi kre, a ndaa kee ŋga o Tafun Nyiɛkpɔɔ na yo ni pan kre pe.
19 A leele pre naa ni wie mbo, “O nyina yira ŋga ki tia mu n na mu chɔ wre nyɛni?”
20 A ndaa yo pe pan na, “O Tafun Nyiɛkpɔɔ wre na yo ni pan na, 21 yo Israel leele pre pan na, ‘Kee ŋga pe Tafun Nyiɛkpɔɔ Jaŋgafun wre yuu yi kre, ni paan mbe ni Suminyuŋgo kre kla, lawee ŋga na e yiɛ nyi, a ki kee tna e pan, a e na eyɛ kpɔɔri na ki ni, na jawa na e ndra haa yi kre. E bibilɛ, na e bichiɛlɛ mblɛ e ti Jerusalem na kre we to brɔfiɛn yiɛshiin nyu na. 22 Na kre nyjila kre waa da e na, ee kee ŋga ni piin ŋga ka pe. Yaa yira tɛɛ mbe e yiɛ tapan haa tɔ, ndee mbe paala sro ŋga kumu pefɛɛnlɛ lii yire ka le nyuu. 23 Ee e namu yire ti e ndrɛ na, mbe e kpawrɛ ti jeelee na. Yaa kumu pe, ndee mbe nyɛni, la, e sisam yire ndra na, jiin ee na jiin eyɛ nu. 24 Ezekiel we pe sɛmbɛɛrɛ mbe e ŋga. Kee ŋga u pini ŋga chɔɔ, ki ka ee pe na. Na yire kee yire waa pe, kre ee chin na mi wi e Tafun Nyiɛkpɔɔ Jaŋgafun wre.
25 A ŋu Ezekiel, lewo pɔ, ŋga ble mbe pan mbe pe ndra haa, ŋga yi pe yɛnyiŋge lawee ŋga nu pe peyɛ lii, a pe yiɛ wa ki na kre juari, maa pe biile yii mu sɛ kre, 26 kre ble kre, ndro we fɛ mbe shɔ mbe paan mandiɛ kre bɔ mu pan. 27 Kre nyjila kre, mu jaa nyu nyaa mbe paara, a ma pieri na. A mu pe sɛmbɛɛrɛ mbe pe ŋga, kre pie chin na mi wi pe Tafun Nyiɛkpɔɔ wre.’”