5 Kraa wa na ni chɔ na wi Oholah, a nde wraa tiɛri, a u niŋge na tia wra sɛ Assyria ŋunɔwifɛɛnlɛ wru nyanyjɛɛlɛ. 6 U nyanyjɛɛlɛ pre na pe Assyria waŋgra kre loplombo, na ŋunɔwifɛɛnlɛ yɛkulo, mblɛ praa dodonyi mbruku wee leni. Pe kro na nyu, na jiin soolo na. 7 Wra tia Assyria loplombo titie pre kro na sni na u ni, hali mnaa pe afunyi sɛɛnlɛ yire sumi, mna uyɛ tɔ nɛɛrɛ ni. 8 U nsra laa u tiɛrɛɛ ŋga nɔɔ wra hle Egypt tra nu kre kro, bawa pra u cha mu u kla. Mu yire u bichabim nyjila, kre bilɛ naa sni na u ni, na tɛtiɛrɔɔ wi.

9 Ki tia ndaa u wru mu le u korifɛɛnlɛ Assyria leele mblɛ niŋge kraa wa u na pre kɛɛ. 10 A pra u yirɛ tini mu laala u na, mna u biile pre yii mu sɛ, mna wre titi gbun pimi ni, mna u gbo brɔfiɛn yiɛshiin ni. A kra tia chiɛlɛ kro na kee ŋga kra u da kre kee ta na yuu.

11 Oholibah na kee nyjɛ u nyjɔ Oholah naa piin yire nya, a nde wre niŋge, na u tiɛrɛɛ na wɛ u nyjɔ wre na. 12 Assyria waŋgra kre loplombo, na pe ŋunɔwifɛɛnlɛ yɛkulo, na pe wifɛɛnlɛ mblɛ praa dodonyi mbruku wee leni, na jiin soolo na, mna nyu nyu kre chɔɔ niŋge na Oholibah yii na. 13 Ndaa nya na wre chɔɔ uyɛ tɔ nɛɛrɛ ni, ŋgi na hin? Kolo nunu na pe kro shiin naa tro.

14 Oholibah na tiɛri kuraa mu wɛ Oholah na. Wra Babylon bilɛ nya, na pe pe nyunɔ mu mbra mboombɛɛ na yirɛ nyiɛ ni, 15 mna pe pɔ greree ni sɛlɛ, mna nam badɛnyi pɔ pe ndrɛ na, a kra tia wra Babylon ŋunɔwifɛɛnlɛ soolo nduufɛɛnlɛ pre sɔɔnri. 16 Ŋga wra pe nya mboombɛɛ kre na kre to, a pe niŋge na u yii, a wra leele tun pe pan Chaldea tra nu. 17 Babylon bilɛ pre na pan u pan, mna sni na u ni mna u tɔ nɛɛrɛ ni, ŋga pra u tɔ nɛɛrɛ ni mu kɔ kre, a pe kee na u bin. 18 Wra tia ndro kro na u fɛɛrɛ nya, a u nsraa nyifɛɛrɛ piin na u pe tɛtiɛrɔɔ, kre ki tia ndaa krɔ kna mu wa u na, na u nyjɔ wre wi. 19 Oholibah nsra u tiɛrɛɛ kre ti ma, fuŋga wraa ki pini kuraa na shie yiɛ na yaa, mnaa sɔɔnri imi na wraa ki pini u bichabim nyjila Egypt tra nu kre. 20 U niŋge sisaa na tia wra kro na shie u nyanyjɛɛlɛ mblɛ blɛm yira pe na bubunlɔ lɛ, a pe blɛnyi na pe na soo wee yi pre pan. 21 Oholibah niŋge naa wa nyjila ŋga nu wra pe bichable na tiɛri Egypt tra nu, a bilɛ naa u chaa kre na. Kre nyjila kre na bilɛ u nyinimi taala na u lɛɛ tali.

22 Oholibah, kee ŋga o Tafun Nyiɛkpɔɔ Jaŋgafun wre yuu mu pan yi kre, mbe kanyaa le mu korifɛɛnlɛ mblɛ kee ki mu bin pre nu, mbe pe paan mu fɛ mbe kun, mbe yiri mbe mu taan. 23 Mbe ti mbe Babylon, na Chaldean leele, na Pekod, na Shoa, na Koa bilɛ, na Assyria leele pre kro pan mu pan. Pe yirifumblɔ mblɛ pe nyu, na waŋgra kre loplombo pre, na pe wifɛɛnlɛ pre yɛkulo, na sookɛɛ nduufɛɛnlɛ, na pe loplombo titie pre kro ni, soolo na pie nduu mbe pan mu pan. 24 Pie yire nyjeeri haa wa mbe paan wi na mu ni. Pie pan wifɛɛnlɛ tataara ni, na pe sookɛɛ ni, mbe pe trogo pe wiyirɛ tio. Pie ŋunɔwiyirɛ nyjɛ ni lewo uyɛ toni le le, mbe ŋunɔ juulee le le, mbe paan mu fɛ mbe kun kokoo kro na. Mbe ni mu wru mbe le pe kɛɛ, mbe pe yire pre titi mbra na mbe mu ndie tini. 25 Mbe ti mbe mu ni yenyjam krɔ nya, mbe ni ti pe krɔkuɔn tɛɛ mbe mu pe imi na ki fna. Pie mu mana, na mu ndiile knumu mbe wa, mbe pe e mblɛ pie kro kre gbo brɔfiɛn yiɛshiin ni. Pie mu biile pre plɛ yii mbe sɛ, mbe pe kanhun le e hamblɛ mblɛ pie kro pre na. 26 Pie mu yonyi kro laala mu na, mbe mu swa yirɛ chichiele nyjɛ ni mu muyɛ sani kre wru. 27 Kena kre kolo ŋga na mbe tro mbe ti mu niŋge sisaa kee nyjɛ mnaa pini Egypt tra nu kre nyu to. Yire kee yire la wa pe mu na, ndee mbe mu Egypt tra kre sɔɔnri na kple.

28 Kee ŋga o Tafun Nyiɛkpɔɔ Jaŋgafun wre yuu yi kre, ni paan mbe mu wɔ mbe le leele mblɛ kee ki mu bin, a mu pe fun pre kɛɛ. 29 Pie tro na mu ni ndra shelee kolo na, mbe mu yirɛ nyjɛ mu fna mu ta kro koli mbe sɛ. Pie mu ti wejinwaara, mbe ki ti leele mu nyifɛɛrɛ, na mu tiɛrɛɛ kre nya, 30 mbe ki ti mu chin na kre sisam kre ki mu le yire kee nyjɛ nu. Ŋgi na hin? Waŋgrɛ yire niŋge naa wa mu na, a mna pe sɛɛnlɛ yire tɛɛ mna muyɛ tɔ nɛɛrɛ ni. 31 Mu mu nyjɔ wre kolo wru, kena kolo ŋga na ndaa tro na u ni kre chɔɔ na mbe tro na mu ni. 32 Kee ŋga o Tafun Nyiɛkpɔɔ Jaŋgafun wre yuu yi kre,

35 Kena kee ŋga o Tafun Nyiɛkpɔɔ Jaŋgafun wre yuu yi kre, ŋga mu ni kee fɛɛ, mu krɔ kna mu wa ni na ŋga, mu mu niŋge tiɛrɛɛ kre kanyana nya.”

36 O Tafun Nyiɛkpɔɔ wre na yo ni pan mbo, “Ezekiel, lewo pɔ, Oholah, na Oholibah yeeri mu pe kpra kun, pe yiɛ kee yo pe pan, pe afunyi kee nyjɛ pe piin yire na. 37 Ŋgi na hin? Pe leŋgeere kla, mu li mu ku. Sɛɛnlɛ sumiɛ tia pe leŋgeere kla, hali mu pe biile mblɛ mi na pre se pre sro mu sra wɔ mu sɛɛnlɛ yire pɛɛri. 38 A kre chiin ma pe piin ni na, pan chɔɔ pe ni Suminyuŋgo kre tɔ nɛɛrɛ ni, mu ni Wuuble kre kla. 39 Ŋga ble pie pe biile pre pɛɛri pe sɛɛnlɛ yire na kre, kre ble kre chɔɔ pie sɛ ni Suminyuŋgo wa mbe ki tɔ nɛɛrɛ ni. Yire kee yire praa pini.

40 Hali praa leele tuni mbe pe sɛ bilɛ wru haalee mbe paan pe ŋga. Na bilɛ pre waa le, pre chiɛlɛ lobiile shiin pre we weli, mbe pe nyisinyi wro, mbe swa yirɛ le peyɛ na. 41 Kena pe sɛ tni tni bambae chichiele na, mbe tebru tɛɛ pe yiɛ, mbe yirɛ chichiele chan yi na, mbe tuwe ndion tɛɛn, na olive simi nyjɛ ni pe ŋga yire taa taa yi na. 42 Nyjila kro nu praa paan na gbɔgbɔɔlɔ tataara mblɛ pra yiri tablɔ tra nu ni pe nyinyi nu, mbe praa gble. Praa paan na pre chiɛlɛ shiin pre kaan kɛgbrɛ, na ŋujuulee chichiele. 43 A ndaa yuu ni jawala nu na, tiɛrifɛɛnlɛ leŋgeere klafɛɛnlɛ ni pe pna ma kre. A na pe tnumu ŋga pe tuni yi. 44 Praa paan na sni na Oholah na Oholibah tɛtiɛrɔɛ pre ni nyjila nyjila gbee tataara. 45 La, brikana leele mblɛ pe fraka we paan pre chiɛlɛ mblɛ pe leŋgeere kla, mu linku ŋga gbun pimi ni, mbe pe ndie tini.

46 Kee ŋga e Tafun Nyiɛkpɔɔ Jaŋgafun wre yuu yi kre, mbe ti mbe lenɛɛrɛ paan pe tɔ, mbe pe tɔɔra mbe pe yirɛ foolo. 47 Lenɛɛmu pre we pe waari na dnɛ ni, mbe pe gbo brɔfiɛn yiɛshiin ni, pie pe biile gbo na, mbe kanhun le pe kalonyi na.

48 Kre kolo ŋga na mbe tro mbe pe tiɛrɛɛ sisam kre nyu to tra kre nu. Mbe chiɛlɛ kro pe nya mbe peyɛ jaari, mbe pia pe le mbe twan. 49 Yire chiɛlɛ shiin mblɛ we e tiɛrɛɛ, na e sɛɛnlɛ nyjɛ e sumi yire sisam fɔtɔɔrɔ ta. Kre ee chin na mi wi e Tafun Nyiɛkpɔɔ Jaŋgafun wre.”