Jerusalem Sisam
22
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, Jerusalem kpra kun pe linkuuro kee yire na, mu pe yiɛ kee yo pe pan pe afunyi kee yire pe pini kre na, 3 yo pe pan na, kee ŋga mi pe Tafun Nyiɛkpɔɔ Jaŋgafun wre yuu yi kre, ŋga e yire titi leele tataara gbo, mu eyɛ tɔ na nɛɛrɛ ni sɛɛnlɛ nyjɛ e sumi yire ni kre ndra na, e wo kɔ. 4 Mbe e gbun na pini ni, ŋgi na hin? E leele gbo, mu sɛɛnlɛ nyjɛ e pe yire tɛɛ mu eyɛ tɔ nɛɛrɛ ni. Yire titi tia e ble nyu to, a e yɛlɛ nyjɛ ee li kɔ. Mbe ti mbe waŋgrɛ yire na e pini mbra tɛɛ, mbra e tɛɛlɛ. 5 Pe mblɛ pee wa haalee, na mblɛ pe mbra e na kro we e kanyana nya mbra tɛɛ. Ŋgi na hin? Ŋga e chaa e piin e kakpɔɔ kre na.6 E le imi na Israel loplombo pre jaŋga lii, mu na leele kuu. 7 E wa n wa mu u lo, na u lɛ le mu nya. E fumblɔ mblɛ pe yiri waŋgra ka nu mu pan mu tni e nu pre fiŋge, mu na bijile, na lekuchiɛlɛ pini sisaa. 8 E n ni lawee cheche kre le mu nya, a e ni Wuuble kre kla. 9 Leele mblɛ Jerusalem na kre kala fnɛ na taari plɛ na pra pe kuu. A pe shie na lii sɛɛn nyinyi nu. A plɛ na taari pe niŋge kro na sisam pini. 10 Leele pre plɛ pe lɛɛlɛ dɛŋglɛ tɔ nɛɛrɛ ni. A plɛ na sni na chiɛlɛ mblɛ pe paari ni, nyjila ŋga ni pe chin na pe n pe cheche paala kolo na. 11 Plɛɛ wa na sni na pe tnifɛɛnlɛ chiɛlɛ ni, a plɛ na sni na pe biile chiɛlɛ ni, a plɛ na sni na pe jaala titie ni, pre titi lɛ bichiɛlɛ. 12 E plɛɛ wa mu na swa shio dɔlɔɔ kolo na, na leele kuu. A plɛ na swa jini mbe nyumu le ki nu nɛɛrɛ, na pe tnifɛɛnlɛ dnumu na tnu taa. E mi Nyiɛkpɔɔ fɛɛ. Mi e Tafun Nyiɛkpɔɔ Jaŋgafun wre ni ki yo.
13 Ni paan na kaŋgro ni mbe le juolo, na linkufɛɛnlɛ pre nu. 14 Na ni waa pan e na, ee jaa gbun ta, ndee mbe faŋga ta mbe yiree? Mi e Tafun Nyiɛkpɔɔ Jaŋgafun wre ni ki yo, a mbe ki pe. 15 Mbe e gbun mbe nyina lawee kro nu waŋgra ŋga nu, mbe ki ti e nɛɛrɛ kee nyjɛ e pini yire nyu to. 16 Na e waa eyɛ tɔ nɛɛrɛ ni waŋgra leele pre yiɛ na kre, kre ee chin na mi wi e Tafun Nyiɛkpɔɔ wre.”
17 O Tafun Nyiɛkpɔɔ wre na yo ni pan mbo, 18 “Ezekiel, lewo pɔ, Israel leele pre kee n tnu ni, pan pe nyi na swa nɛɛrɛ yi. Pan pe nyi na pe swafre, ndee tɔɔnrɔ, ndee, swanyiɛ, ndee prim le fnunu nu, mu yi fɔ mu yi nɛɛrɛ wɔ mu wo, tnu ka n wa yi nu. 19 Kena kee ŋga mi e Tafun Nyiɛkpɔɔ Jaŋgafun wre yuu yi kre, ‘Ŋga e kro sɛ kaari swa nɛɛrɛ kre ndra na, mbe pan na e ni Jerusalem na. 20-21 Imi fiireefun swafiŋge, na yaawa, na prim, na tɔɔnrɔ leni kanhun mbe yi nya kre, pan mbe krɔ, na nyibinyiɛ sisaa tɛɛ mbe e yoori mbe pan kakpɔɔ kre na, mbe kanhun le e na mbe e nya. 22 Imi na pe swafiŋge leni fnunu nu mbe ki nya kre, pan chɔɔ mbe e le kanhun mbe e nya. Kre ee chin na mi e Tafun Nyiɛkpɔɔ Jaŋgafun wre ni nyibie sisaa kna e na.’”
23 O Tafun Nyiɛkpɔɔ wre na ndru mu yo ni pan mbo, 24 “Ezekiel, lewo pɔ, Yo tra kre leele pan na, sisam kee bribri ki tra kre nyi, ki tia ni paan mbe krɔ tɛɛ mbe pe ndie tini. 25 Pan pe keenyanyofɛɛnlɛ pre koelee nyjɛ pe chaa na leele ni nyi na jira u yurɔ ta na kaa na gnu. Pe leele yiri na kuu, na pe swa yirɛ nyjɛ na pe yiɛ nyi titi kre wrui. Pe bilɛ kuu, mu tia pe chiɛlɛ kaari lekuchiɛlɛ. 26 Pe srawɔfɛɛnlɛ ni mbra yire klai, a pe n yirɛ nyjɛ yi pe cheche yire le mu nya. A pe n yirɛ nyjɛ yi pe cheche, na nyjɛ yi n pe cheche kre lalaa chin. Pre pe leele nyina na yaka n wa yira ŋga ki pe nɛɛrɛ, na ŋga ki n pe nɛɛrɛ lalaa. A pe nyiɛlɛ ka mu wa ni Wuuble kre lie na, mu tia ni mɛɛ kla pe lalaa. 27 Jerusalem loplombo pre pe na komboolo mblɛ pe yurɛ yiri na kaa lɛ. Pe leele kuu na yire ki na na tnu sisaa taa. 28 Ki keenyanyofɛɛnlɛ pre na toni yire sisam nyjɛ na, mu na kafinɛ kee nyaa nyiɛlɛ na na yuu pe pan. Pre pe yuu na kee ŋga o Tafun Nyiɛkpɔɔ Jaŋgafun wre yuu yi kre, a nde ni n paara pe pan. 29 Tra kre leele peyɛ dnumu, na yirɛ juu peyɛ pan jaŋga na. Pe shianfɛɛnlɛ, na foorofɛɛnlɛ fiŋge, na fumblɔ mblɛ pe yiri waŋgra ka nu mu pan mu tni pe nu pre piin ŋga ki n fna, a praa pe kala li mbe pe ŋga tam.