Nyiɛkpɔɔ Jerusalem Leele Ndie Tini
21
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, yiɛ kna mu tɛɛ Jerusalem na, mu paara mu ki sumindoe yire taan. Paara mu Israel tra kre taan mu yo na. 3 Kee ŋga o Tafun Nyiɛkpɔɔ wre yuu yi kre, ni yiri mu e taan. A mbe ni brɔfiɛn yiɛshiin tini mbe yili ki afoo nu, mbe e leele mblɛ pe fraka, na sisampefɛɛnlɛ pre kro gbo. 4 Ni brɔfiɛn yiɛshiin kre we ndro kro gbo mbe yire tapan mbe sɛ su nyjeeri. 5 Kre leele kro we chin na mi pe Tafun Nyiɛkpɔɔ wre ni ni brɔfiɛn yiɛshiin tini mu yili ki afoo nu, a kia ndru mbe le ki afoo nu na.6 Kena lewo pɔ, ti mbe fooro mu yii, mbe kee kre keyira ti mbe mna jiin leele pre yiɛ na. 7 Na pe waa mu wie na, ‘Yira ŋgi ki tia mna jiin hin?’ Yo pe pan na, ‘Kee ŋga ki paan kre ki tia. Kie ti mbe ndro kro lɛɛ be, mbe pe kɛ gblɛ, mbe pe nyiɛ fɛ pe kro, mbe praa seeri, mbe pe kosie na gbuun yi yɛ na.’ Kre kee kre paan mbe pe, mi e Tafun Nyiɛkpɔɔ Jaŋgafun wre ni ki yo.”
8 O Tafun Nyiɛkpɔɔ wre na yo ni pan mbo, 9 “Ezekiel, lewo pɔ, paara mu yo na, kee ŋga o Tafun Nyiɛkpɔɔ wre yuu yi kre.
Ni ni brɔfiɛn yiɛshiin liɔ a ki tna,
ni ki liɔ kra tla.
10 Ni ki liɔ a ki tna,
a ndaa paan mbe leele gbo.
Ki tla, na nyini na nyiɛ ki nyini.
Ndro waa ti mbe u yiɛshɔ,
Ŋgi na hin?
Ni leele pre kro jaari, a pe je.
11 Ni ni brɔfiɛn yiɛshiin kre liɔ,
ni ki liɔ mu tɛɛ,
na paan mbe ki le gbofun wre kɛɛ.
12 Kena lewo pɔ,
nyɛni mu gble le fooro ni,
Ŋgi na hin? Ni leele pan ki paan.
Israel loplombo pre kro pan ki paan,
mbe pre na ni leele pre kro ni,
fooro we ti
mbe pe kɛnyi taa gbun na.
13 Ni paan mbe ni leele pre pe
mbe le,
a na pe nsra pe jawala chinɛ kre,
kena yaka wa jaa ti mbe ni pe ti.
Mi pe Tafun Nyiɛkpɔɔ
Jaŋgafun wre ni ki yo.
14 Kena lewo pɔ, ni kee shɔ mu yo.
Kɛnyi koori,
mbe brɔfiɛn yiɛshiin kre leele gbo
imi na ki fna,
brɔfiɛn yiɛshiin ŋga
we leele gbo titi,
kie gbo kokoo kro na.
15 Kie ti mbe ndro kro lɛɛ be,
mbe pe tataara na gbroi
mbra tuuri.
Ni brɔfiɛn yiɛshiin kre gbeele
mu tɛɛ, mbe leele gbo,
kie gbo chiɛ yire jlonwee
yire kro na.
Ki nyini plipli na nyiɛ ki nyini.
A pe ki yii mbe leele yulɔ kun.
16 Brɔfiɛn, kun mu sɛ kalie,
mu kun mu sɛ kamɛŋɛ,
mna mu yiɛ tɛɛ kpan,
kun mu tro wa.
17 Kie ti mbe ni kɛnyi koori,
mbe ni krɔ ŋga ki kun kre nyjii.
Mi e Tafun Nyiɛkpɔɔ wre
ni ki yo.”
18 O Tafun Nyiɛkpɔɔ wre na paara ni pan mbo, 19 “Ezekiel, lewo pɔ, kooloe shiin tnɔ, mna Babylon ŋunu wre we tro na u brɔfiɛn yiɛshiin kre ni mbe pan. Ti mbe koelee shiin yire nɔɔ yire lawee nunu nu. Mbe mu kaan kan kochiɛn yire na, mbe nyunɔ ki na. 20 Nyunɔ kaan kre na mu nyina mna koelee yire yɔ mu sɛ, ti mbe koelee yire nunu sɛ Ammon kakpɔɔ ŋga pe yeeri Rabbah kre na, mbe nunu sɛ Judah, na Jerusalem ŋga pe mboo sin mu fɛ mu kun kre na. 21 Na Babylon ŋunu wre waa da kochiɛnlɛ yire na kre, we yire wa mbe chlɛ, mbe u snimi tɛɛ mbe kɛɛn tɛɛ, mbe u sɛɛnlɛ wie, mbe yurɔ ŋmba pe tɛɛ mu sra wɔ ndɛlɛ le, mbe chin kolo ŋga na we tro. 22 U kalie we snimi ŋga ki yiɛ tɛɛ Jerusalem na wɔ. Kena u paara, mbe ŋunɔ gble le, mbe pe tra fa mbe ble kakpɔɔ kre mboo na, mbe kɛɛn badɛnyi tɛɛ mbe mboo kre, na krɔ ŋga pe le ki na juari mbe wo, mbe le ki na mbe leele pre gbo. 23 Jerusalem leele pre na da mna Babylon ŋunu wre ŋga, na pia u kun denyjuu, ki tia pre leele pre wa wa shɔnlie na kre kee ŋga we jaa pe fio. La, Babylon ŋunu wre we pe sɔɔnri pe sisam koelee nyjɛ na praa tro yire, mbe pe jaari mbe yo pe na pe paan mbe pe yii mbe sɛ.
24 Ki tia kee ŋga mi e Tafun Nyiɛkpɔɔ Jaŋgafun wre yuu yi kre, Kee nyjɛ e pini yire kro pe sisam, a yi nyina imi na e sisam kpɔɔ mu da. Ki tia e pimi li, a pie e yii mbe sɛ. 25 Ŋu Israel ŋunu sisam kpɔɔ pefun, mu ndie tini ble mbra mna. 26 Kee ŋga mi mu Tafun Nyiɛkpɔɔ Jaŋgafun wre yuu yi kre, mu lebiile nam ŋga mu poo, na mu ŋujuulee ŋga mu leni kre laa mu wa. Yaka n wa mbe pe na ki fa yi na. Leele mblɛ pe n jaŋga ni fa kre we jaŋga ta, mbe ŋulo jaŋga yili pe kɛɛ. 27 Mbe ti Jerusalem kaari kajaa, la, kia pe chia na, fɔna ndro ŋmba mi Nyiɛkpɔɔ wɔ wre pan tun, mbe ni ki le u kɛɛ.
28 A ŋu Ezekiel, lewo pɔ, ni kee shɔ mu yo na, kee ŋga e Tafun Nyiɛkpɔɔ Jaŋgafun wre yuu Ammon leele mblɛ pe Israel leele tɛɛlɛ pre pan yi kre,
Pe brɔfiɛn yiɛshiin,
ka tini mbe leele gbo kro,
Pe ki pe kra chiɛnri
mbe paan leele gbo,
ki nyini plipli na nyiɛ ki nyini.
29 Kii wa na pe kafinɛ kee nyaa nyiɛlɛ na na yuu e pan, mu na chilɛ wɛɛ chlɛ e pan. Yire Amon leele sisampefɛɛnlɛ, pie brɔfiɛn yiɛshiin taa e yulɔ na, mbe e gbo. E ble da, a e nyjila ŋga nu pie e ndie tini kre kɔ.
30 E e brɔfiɛn yiɛshiin kre le ki afoo nu. E tolɛɛlɛ tra ŋga nu pra e se kre nu ni paan mbe e ndie tini. 31 Mbe ti mbe e ni krɔ sisaa nya, mbe ki pe na kanhun ŋga ki nyini pe kna mu wo e na, a mbe e wru mbe le leele mblɛ ndra ki sheli kɛɛ, mbe pe e kla. 32 Pan ee pe na kejenyi nyjɛ ni pe kanhun gbeerii yi, pie e gbo e tra nu, a ndro wa e sɔɔnri na. Mi e Tafun Nyiɛkpɔɔ Jaŋgafun wre ni ki yo.”