3 “Ezekiel, lewo pɔ, Yo Israel loplombo pre pan na kee ŋga pe Tafun Nyiɛkpɔɔ Jaŋgafun wre yuu yi kre, Mi pan e pan na kee chaa mbe loo ŋgaa? Ŋga nii wa na le ŋga, mba ti mbe e ni wie kala ka. Mi e Tafun Nyiɛkpɔɔ Jaŋgafun wre ni ki yo.

4 Lewo pɔ, kpra yo pe pan, pe yiɛ kee yo pe pan, mu afunyi kee nyjɛ pe tolɛɛlɛ naa pini kre kee yo pe pan. 5 Mu ti mbe pe loo na, kee ŋga mi pe Tafun Nyiɛkpɔɔ Jaŋgafun wre yuu yi kre. Ŋga ble ndaa Israel leele wɔ na ni wolo lɛ kre, ndaa yire ni jaŋga na, mna da mu pre Israel leele mblɛ lɛ Jacob nanae pre ŋga, mna niyɛ wɔ mu pe nyina Egypt tra nu, mna yo pe pan na, Mi wi pe Tafun Nyiɛkpɔɔ wre. 6 Kre ble kre, ndaa da mna pe ŋga na mbe pe wɔ mbe yili Egypt tra nu, mbe sɛ na pe ni tra ŋga mi titi cha mu tɛɛ pe pan nu. Tra taan titi ŋga ki nyu mu wɛ trɛ kro na. 7 Ndaa yo pe pan kro na pe pe sɛɛnlɛ wɛɛ nyjɛ na pe yiɛ taa yire waari, a pia shia Egypt tra sɛɛnlɛ yire tɛɛ mbe peyɛ tɔ nɛɛrɛ ni. A ndaa tia pra chin na mi wi pe Tafun Nyiɛkpɔɔ wre.

8 La, pra je mna yiri mu ni taan, pe nsra ndie tɛɛ ni pan. Pra je pe nsra pe sɛɛnlɛ wɛɛ nyjɛ na pe yiɛ na nyi yire waari. A pe nsra laa Egypt tra sɛɛnlɛ yire kro, a ndaa ni jawala pe na mbe ti pe ni krɔkuɔn, na nyibinyiɛ sisaa nya Egypt tra kre nu wa. 9 La, ni nsra chaa mbe pe ni le kafnu, ŋgi na hin? Ndaa nyu yo Israel leele pre pan waŋgrɛ leele pre yiɛ na na mbe pe wɔ mbe yili Egypt tra nu. 10 Kra tia ndaa pe wɔ mna yili Egypt tra kre nu, mna sɛ na pe ni tablɔ tra kre nu. 11 Ndaa ni nyu kee yo pe pan, mna pe ŋga ni mbra yire, mna yo pe pan na lewo ŋmba we li yi na kre we ŋmaa li. 12 A ndaa ndru mna pe nyina ni Wuuble, mbe ki pe sɛmbɛɛrɛ yira mi na pre lalaa, mbe ki nyina na mi ni pe pe cheche.

13 A nde Israel leele pre na je mna yiri mu ni taan tablɔ tra kre nu wa. Pe nsra taa ni nyu kee yire na, a pra ni mbra yire je. Nde kii wa na pra chin na, lewo ŋmba we taa yi na kre we ŋmaa li. A pra ni Wuuble kre pe na ble waa ka yi. Ki tia ndaa yo na mbe ti mbe pe ni nyibinyiɛ sisaa nya, mbe ni pe kla tablɔ tra kre nu wa. 14 La, imi kie pe mbe ni mɛɛ wa kla waŋgrɛ nyjɛ yiɛ na ndaa pe wɔ mu yili Egypt tra nyu kre ndra na, ni nsra pe kla tablɔ tra kre nu wa. 15 Ndaa yire ni jaŋga kre na, mna da mu pe ŋga tablɔ tra kre nu na, mba le na pe ni tra ŋga ndaa pe ŋga kre nu, tra taan titi ŋga kra nyu mu wɛ trɛ kro na kre. 16 Ŋga pra ni mbra yire je, a pe nsra li ni nyu kee na, mna ni Wuuble kre le fiɛn, mna sɛ na sɛɛnlɛ sumi kre ndra na, kre na ndaa yire kee nyjɛ yo pe pan. 17 La, ndaa pe fooro le, a ni nsra pe gbo tablɔ tra kre nu wa. 18 Ndaa yo pe biile pan tablɔ tra kre nu na, Yaa shia taa kooloe nyjɛ na e tolɛɛlɛ pre na tro yire na, ndee mbe li pe mbra nyjɛ pre titi na le peyɛ pan yire na, ndee mbe pe sɛɛnlɛ yire sumi mbe eyɛ tɔ nɛɛrɛ ni. 19 Mi wi e Tafun Nyiɛkpɔɔ wre, e li ni nyu kee, na ni mbra yire na. 20 E ni Wuuble kre pe cheche, mbe ki pe sɛmbɛɛrɛ yira mi na yire lalaa. Kre ee chin na mi wi e Tafun Nyiɛkpɔɔ wre.

21 La, pe biile pre na yiri mu ni taan. Pe nsra li ni nyu kee yire na, a pe nsra taa ni mbra yire na. A nde pra chin na lewo ŋmba we taa yi na kre we ŋmaa li. Pra ni Wuuble ble kre le na ble waa ka yi. Ki tia ndaa yo pe pan na mbe ti mbe pe ni krɔkuɔn, na ni nyibinyiɛ sisaa nya tablɔ tra kre nu. 22 La, ndaa frɔ ta pe na, imi kie pe mbe ni mɛɛ wa kla waŋgrɛ nyjɛ leele yiɛ na ni pe wɔ mu yili Egypt tra nu kre nu. 23 Ki tia ndaa da mu pe ŋga tablɔ tra kre nu na, mbe pe gbun mbe nyina waŋgrɛ yire nu kro, 24 ŋga pe nsra li ni mbra yire na, mna ni nyu kee je, mna ni Wuuble kre le na ble waa ka yi, mna tia pe tolɛɛlɛ pre sɛɛnlɛ nyjɛ praa sumi yire niŋge na pe yii kre ndra na. 25 Kra tia ndaa pe ti mu mbra fuɛn ŋga, nyjɛ na pie taa mbe ki ti pe ŋmaa yili pe kɛɛ. 26 Ndaa tia praa peyɛ toni nɛɛrɛ na pe sra nyjɛ praa woni yire ni, mna pe bijloe sroi na sra woni. Ndaa ki tɛɛ mna pe ndie tini, mbe ti pe chin na mi wi pe Tafun Nyiɛkpɔɔ Jaŋgafun wre.

27 Kena Ezekiel, lewo pɔ, yo Israel leele pre pan na, kee ŋga e Tafun Nyiɛkpɔɔ Jaŋgafun wre yuu yi kre, yire kee nyjɛ e tolɛɛlɛ pre na pe chɔɔ mna ni yiɛ taan, mna ni je. 28 Ŋga ndaa le na pe ni tra ŋga ndaa da na mbe pe ŋga kre nu kre, nyua gedeŋge ŋga pie nya, na tiŋge wrɛ vuu wo ŋga pie nya kpan, yire lawee praa shie na sra yire woni, na pe tuwe ndiom tɛɛn sroi, na simi woni yi na, mnaa ni krɔ kuun. 29 A ndaa pe wie na lawee nyjɛ nu pe shie nyuɛ na yire mɛɛ yi ŋgi hin? A pra yo yi mɛɛ sumindoe, a praa yi yeeri sumindoe mu pan mu su aŋga na.

30 Kena Ezekiel, yo Israel leele pre pan na, kee ŋga mi pe Tafun Nyiɛkpɔɔ Jaŋgafun wre yuu yi kre, kena e eyɛ tɔ na nɛɛrɛ ni imi na e tolɛɛlɛ pre na pe, mna tia pe sɛɛnlɛ wɛɛ yire niŋge na pe yii kre ra? 31 Na e waa na e sɛɛnlɛ yire peerii, na e bibilɛ sroi na sra woni na sɛɛnlɛ yire kaan, mu kro mu na e sɛɛnlɛ yire teeri na eyɛ toni nɛɛrɛ ni aŋga tɛ kre, kena e jawa na mbe ti mbe yire Israel leele ni wie kee ka na ra? Ŋga mi e Tafun Nyiɛkpɔɔ Jaŋgafun wre wa ŋga, mba ti mbe e ni wie yaka.”

32 E yuu na, “O chaa mbe pe na waŋgrɛ yire yi, mbe pe na yi leele mblɛ pe tinyi, na dnɛ sumi pre lɛ.” La, kee nyjɛ e jawa kre wa pe fio.

33 Ŋga mi e Tafun Nyiɛkpɔɔ Jaŋgafun wree wa ŋga, mbe pe e ŋunu mbe e le jaŋga, na faŋga, na krɔ ni. 34 Mbe ni jaŋga, na ni faŋga, na krɔ kre tɛɛ mbe e yoori mbe yili waŋgrɛ nyjɛ nu e nyina mu sɛ tni yire nu. 35 Mbe pan na e ni tablɔ tra ŋga waŋgrɛ yire fɛ mu kun kre nu, bawa mi na yire nyiɛlɛ we fni, mbe ni e gbun na pimi ni. 36 Imi na ndaa e tolɛɛlɛ pre ndie tini Egypt tablɔ tra kre nu wa kre, pan chɔɔ mbe e ndie tini. Mi e Tafun Nyiɛkpɔɔ Jaŋgafun wre ni ki yo. 37 Mbe ti e li ni mbra yire na jaŋga na, mbe li ni nyu nunu ŋga ndaa pe na e ni kre na. 38 A e wolo mblɛ pe yiri mu ni taan kre, mbe pe wɔ mbe yili e nu. Kii wa na mbe pe wɔ mbe yili trɛ nyjɛ nu pra nyi mu tni yire nu, nde pia le Israel tra kre nu. Kre ee chin na mi wi e Tafun Nyiɛkpɔɔ wre.

39 Israel leele, kee ŋga o Tafun Nyiɛkpɔɔ Jaŋgafun wre yuu yi kre, “E kro e na e sɛɛnlɛ yire sumi rɛ. La, nyjila ka paan, na ki waa da, kolo kro na ee ndie tɛɛ ni pan. A yaa ni mɛɛ cheche kre kla sɛɛnlɛ nyjɛ e peerii yire ni na. 40 Na kre nyjila kre da, ni nyua cheche ŋga ki gede Israel tra nu kre, bawa Israel leele pre kro we sɛ ni sumi. A bawa ni yiɛ we shɔ pe na. Bawa mbe ti pe paan sra wɔ na pe yirɛ chichiele ni mbe ni ŋga, yire na pe sra cheche nyjɛ pie na woni mbra ni kaan yire ni kro. 41 Na ni waa e yoori mu yili waŋgrɛ nyjɛ nu e nyina mu sɛ tni yire nu, kre ni yiɛ we shɔ e na na tuwe ndiom taan yi. Kre mbe ti mbe e chin na ni pe cheche waŋgrɛ yire leele yiɛ na. 42 Na ni waa ndru mu pan na e ni Israel tra nu, tra ŋga ndaa jaŋga tɛɛ mu da mu e ŋga na mbe e tolɛɛlɛ pre ŋga kre. Na e waa da wa kre ee chin na mi wi e Tafun Nyiɛkpɔɔ wre. 43 Bawa ee e kepele fuɛn nyjɛ e na pe mna eyɛ tɔ nɛɛrɛ ni yire sɔɔnri, eyɛ kee we e bin sisam nyjɛ e naa pini yire na. 44 Na ni waa yila ni mɛɛ kre ndra na mu e dumbrɛ, a ni nsra e le na nyjila ŋga nu e naa kefuɛn pini kre yi, kre yire Israel leele we chin na mi wi e Tafun Nyiɛkpɔɔ wre. Pan mi e Tafun Nyiɛkpɔɔ wre yo.”

45 O Tafun Nyiɛkpɔɔ Jaŋgafun wre na paara ni pan mbo, 46 “Ezekiel, lewo pɔ, yiɛ kna mu tɛɛ tapan haa, mu kee yo mu pe taan, mu kee nya mu yo mu klɔ nyjɛ yii wa wa yire taan. 47 Yo tapanhaa klɔ kre pan na ki ndie tɛɛ mbe loo kee ŋga o Tafun Nyiɛkpɔɔ Jaŋgafun wre yuu, ‘Ni paan mbe kanhun le mu na, mbe ki mu tinyi nyinyi, na yua wee yire kro shɔ. Kie yire tapan haa wa mbe shɔ mbe sɛ su nyjeeri haa wa, yaka wa ja mbe ki fii, a ki gbɛŋgɛ we wo ndro kro na. 48 Ndro kro we chin na mi e Tafun Nyiɛkpɔɔ wre ni kanhun kre le, a ndro wa jaa ki fii.’”

49 A ndaa yo na, “Ni Tafun Nyiɛkpɔɔ Jaŋgafun, leele pre yuu ni pan na, ‘Ni pe gbuun yomini nyjila kro nu.’”