Fooro Mɛɛ
19
O Tafun Nyiɛkpɔɔ wre na yo ni pan mbo, “Ezekiel, lewo pɔ, kumu mɛɛ kɔ mu Israel loplombo pre shiin ŋga. 2 Mɛɛ yire kɔ mu yo na,‘Mu lo na pe na jira chlɔ wi,
a wra u biile pɔɔri jirae bilɛ
mblɛ kee kii fiɛrɛ ni lalaa.
3 Wra u biile pre nunu pɔɔri,
a wra faŋga ta
na jira faŋgafun wi,
wra u nyina kolo ŋga na we tro
mbe yurɔ yii,
a wra ja na leele yiri na kaa.
4 Waŋgrɛ yire na u kee loo,
a pra wee tuu mna u pɛɛri pɛlɛ.
Pra drawa tɛɛ mna u yii,
mna u tini mu sɛ Egypt tra nu.
5 U lo wre na u shie,
na we ndru mbe pan,
la, u dankna kro na pan mu kɔ.
A wra u biile pre wa yii na,
mna u pe a wra faŋga ta,
na jira faŋgafun wi.
6 Ŋga wra lɛ kre,
wra kaara cha mu chin,
mna faŋga ta,
mna chaa u wolo nu, mna chin
imi na pe leele yiri na kaa.
7 Wra ja na lawee nyjɛ nu
leele shie na ndra yire jee,
mbe chiɛ juari mbe wo.
Na u gble le, fiɛrɛ naa leele yiri
tra kre nu kpɔɔ.
8 Ki tia waŋgrɛ nyjɛ yira pe fɛ
mu kun kre,
naa u chaa mbe gbo,
mna pe asau wa mna u pɛɛri pɛlɛ,
mna u yii na ki ni.
9 Pra u tini na drawa ni
mna sɛ u le buo nu, mna sɛ
na u ni Babylon ŋunu pan.
A pra u le nyuŋgo.
Ki tia ndro nsraa u gblee kre ndru,
Israel nyuɛ yire na na.
10 Pan mu lo na nyi na afoo tiŋge wa kagbla,
mna pe na lɔɔ mbɛɛ na pe ki luu.
Ki klɛ na nɛɛ, a pan kraa sɛni.
Ŋga kraa nyumu taa nɛɛrɛ
kre ndra na,
11 Faŋga naa wa ki klɛ yire nu,
mbe jaa ŋunu kayie pe.
Afoo kre na lɛ mu sɛ nyjeeri,
Ndro kro na ki nya
na ki nyu, mu lɛ mu gede.
12 La, pra krɔkuɔn tɛɛ
mna ki tini mu kɔ, mna wa tra.
A yila finhaa fuflɛ na gbun,
mna tia ki sɛnyi yire na yua.
A ki klɛ nyjɛ yira sheli yire na yua,
a kanhun na pan mu yi shɔ.
13 Fuŋgaami ŋga tablɔ tra nu
pe sɛ ki luu, tra ŋga nu
nyumu n wa nu pe sɛ ki luu.
14 Kanhun na to ki klɛ ka na,
mna nyi mu ki sɛnyi yire shɔ.
Hali, ki klɛ nyjɛ yira sheli
yire ka n kro ki na,
hali mbe jaa ŋunu kanyie pe.’
Kumu mɛɛ ŋga ni yo
mna koni fooro ni kre yi kre.”