3 O Tafun Nyiɛkpɔɔ Jaŋgafun wre yo mbo, “Ndro wa kre yomini kre gbun Israel waŋgra nu na, ŋga mi Nyiɛkpɔɔ wre wa ŋga wala. 4 Ŋgi na hin? Ni wo wi lewo na nyjuro kro, loolo na lɛɛlɛ na pe biile pre kro ni wolo lɛ. Kena lewo ŋmba u sisam pe, wre we u sisam kumu ku. 5 Na ki pan na ndro fraka mu na ŋga ki nyu piin. 6 A wa sɛ li sɛɛn nyuŋgo, a wa na yaka chaa Israel leele sɛɛnlɛ yire pan, a wa u tnifun chɔ cha, ndee mbe sni na chlɔ ŋmba u paari ni. 7 A wa ndro fiŋge kolo ka na, a we yira ŋga wa pan mu tle u pan mu swa jin kre ndro mbe ki fun ŋga. A wa ndro ju, la, u mblɛ klo ta pre kaan sro, mu na mblɛ pe tro wejinwaara pre toni yoŋgo. 8 A wa ndro jin swa mbe nyumu le ki nu. A u sisam pee fun, a na kala pan we ki le mbe kpra ŋga ki fraka yo, 9 mu na lii mi Nyiɛkpɔɔ nyu kee, na ni mbra yire na kpra ni kre, kena wre ndro wre fraka, a we ŋmaa li. Pan mi e Tafun Nyiɛkpɔɔ Jaŋgafun wre yo.

10 A na ki pan na kre ndro ŋmbaa wa biblɔ ŋmba u juu, na linkuuro kee pini, mu na yire kee nyjɛ krɛrɛ pini na yaa, 11 la, u lɛ wre n da mu yire kee nyjɛ ka pe tun, a na ki waa pan na u shie na lii sɛɛnlɛ nyinyi nu, mu na u tnifɛɛnlɛ chiɛlɛ chaa, 12 na shiafɛɛnlɛ, na pɔlɛfɛɛnlɛ fiŋge, na juu, a na ndro pan mu yira tle u pan, wa ki ndro mbe u ŋga, mu na shie na tuuri sɛɛnlɛ na, mu na afunyi kee pini, 13 a na u ndro jin swa we nyumu le ki nu nɛɛrɛ, kena kre ndro ŋmba u yire kee nyjɛ pini ŋga we ŋmaa lii? Ɔɔhɔn, wa ŋmaa li. Ŋgi na hin? U yire afunyi kee nyjɛ krɛrɛ pe, ki tia we ki kumu ku, a wre titi u u kumu cha.

14 A na ki pan na kre sisam pefun wre wa na biblɔ ni, a u lɛ wre sisam nyjɛ u pini yire kro nya, a u n yire sisam kee yire ka pe, na u lɛ wre wi. 15 Na wa sɛ sɛɛn nyinyi nyjɛ pe sin sin nyuɛ na yire nu mbe sɛ li wa, ndee mbe sɛ to Israel sɛɛnlɛ nyjɛ pe sumi yire na, a wa u tnifun chɔ cha, 16 a wa ndro fiŋge, a na ndro yira tle u pan we ki ndro mbe ufun ŋga. A wa ndro ju, la, na klo ndro ta we u ŋga sro mbe u li, mbe ŋmba u tro wejinwaara tɔ yoŋgo. 17 A u sisam pee fun, a wa ndro jin swa mbe nyumu le ki nu mbe ndro wre fun waa jaa ki tɔ. U lii ni nyu kee, na ni mbra yire na. Na ki pan ma, wa ku u lɛ wre sisam tlo, we ŋmaa li. 18 La, u lɛ wre we wre titi sisam kumu ku. Ŋgi na hin? Wre wra leele ju, mna plɛ dnumu, mna sisam ŋga mu chin ŋga kro pe u leele nu.

19 A wa we wie na, ‘Yira ŋgi ki tia blɔ wre biblɔ wre wa u lɛ sisam ŋga u pe mu ku kre ka ku hin?’ Ŋga ki tia yi na, ŋga u biblɔ wre fraka, mu kpra li, mu le na we li mi Nyiɛkpɔɔ mbra yire na kre ndra na, we ŋmaa ta. 20 Ndro ŋmba we u sisam pe kre, wrefun we u kumu ku. Pɔ wa ku u lɛ sisam tlo, a pan chɔɔ lɛ wa ku u pɔ sisam tlo. Lewo ŋmba u fraka wre we u frakaa fɔtɔɔrɔ ta, a sisam pefun we u sisam fɔtɔɔrɔ ta.

21 La, na ki pan na sisampefun laa u sisam nyjɛ u piin kro, mu kna mu taa ni nyu kee na, mu na kpra lii, na kee ŋga ki fraka piin kre, we ŋmaa li, wa ku. 22 Mba u sisam nyjɛ u pe fa yire ka sɔɔnri mbe ki tɛɛ mbe u taan. Ŋga u kna mu na kee nyjɛ yi fraka pini kre ndra na, wa ku, we ŋmaa li. 23 Mi e Tafun Nyiɛkpɔɔ Jaŋgafun wre, ni yiɛ n shɔ sisam pefun kumu na. Kee ŋga na ni yiɛ shɔ yi na we laa u sisam nyjɛ u piin kro, mbe ŋmaa ta.

24 La, na lewo frakafun waa laa u frakaa kro, maa sɛ na afunyi kee pini kre, wa ŋmaa ta. A na ki pan ma, kefrakaa nyjɛ u pe kre, mba ka sɔɔnri na. Ŋga u n kpra li na mi Nyiɛkpɔɔ ni kre ndra na, we pimi li, a u sisam nyjɛ u pe kre ndra na, we ku.

25 Nde kee nyjɛ krɛrɛ kɔkro kre, yire Israel leele yuu mi Nyiɛkpɔɔ pan na, ‘Kee nyjɛ mi e Tafun Nyiɛkpɔɔ wre pini yire n fraka.’ Kena yire Israel leele e loo ni pan. Kena ni kee nyjɛ ni pini yire n fraka ra? Yire kooloe nyjɛ na e tro kre yi n fraka. 26 Na ki pan na lewo ŋmba u fraka laa u frakaa kee kro, maa sɛ sisam pe kre, we ku u sisam yire ndra na. 27 La, na sisam pefun waa chinɛ mu laa u sisam kro maa na ŋga ki fraka pini, mu na kpra lii kre, we ŋmaa ta. 28 Na u kee fuɛn nyjɛ u pe yire krɛrɛ jawa, maa chinɛ mu laa yi kro kre, wa ku, we ŋmaa ta. 29 A nde yire Israel leele je na yuu na, ‘kooloe nyjɛ na o Tafun Nyiɛkpɔɔ wre tro yire n fraka.’ Kena mi n na kpra lii ra? O! Israel leele, yire e n na tro kooloe chiriri na.

30 Kena yire Israel leele, mbe e kooloe nyjɛ na e tro yire le eyɛ yɛ, mbe e kpra kun. Pan mi e Tafun Nyiɛkpɔɔ Jaŋgafun wre yo. Kena e e jawala chinɛ, e laa kefuɛn nyjɛ e pini yire kro, mbe e sisam wa ti mbe e to. 31 E eyɛ wɔ e yili sisam nyjɛ e pini yire kro nu, e lolonyi fɔnyi, na ŋumu fɔŋgɔ haa cha. Israel leele, mni a e na e kumu chaa ŋga hin? 32 Ŋgi na hin? Ni yiɛ n shɔ lewo kumu na, mi e Tafun Nyiɛkpɔɔ Jaŋgafun wre ni ki yo. Kena e e jawala chinɛ e ŋmaa ta.”