5 Wre nyuu wre chɔɔ na yira luuro ka wru Israel tra nu mna sɛ ki luu tra taan ka nu. Wra ki luu lawee ŋga nu nyumu na nyi nu. 6 A kra ŋɔɔ mna lɛ mna kaari tre tiŋge mna fo mu tra kre shɔ mu ta. Ki klɛ yire na lɛ, mna yiɛ tɛɛ mna nyuu wre na nyi, na nyi, a ki didinyi le tra kpɔɔ, a wrɛ na tiŋge kre klɛ tɔ.

7 La, nyuu kpɔɔ faŋgafun wa naa wa, a faŋga naa wa u kuɛn nu na, a u sinyi na nɛɛ. A tre tiŋge kre na yire tra ŋga nu pra ki luu kre nu mna didinyi wɔ fimi na mu yiɛ kan mna nyuu wre na nyi kre, na nyumu chaa u pan. 8 La, tre tiŋge kre naa wa na lee tra taan ŋga nu nyumu na nyi nɛɛrɛ kre nu, a kra tia ki klɛ na nɛɛ, mna ja na sɛni, mna yire tre tiŋge badaaŋga.’

9 Ezekiel, yo pe pan na, kee ŋga mi pe Tafun Nyiɛkpɔɔ Jaŋgafun wre yuu yi kre. Kena kre tre tiŋge ŋga we ŋmaa ta mbe lɛ ŋgaa? Nyuu jle wre wa ki tini mbe kɔ, mbe ki sɛnyi yire mbru ki na mbe ki ti wa mbe ki yuwa? Ki wrɛ kro we yua ki na. Wifɛɛnlɛ faŋgafɛɛnlɛ, ndee lenɛɛmu plɛ ma we shian mbe jaa kre tre tiŋge kre kɔ ki didinyi ni. 10 Hali na pe ndru mu ki jɛnwi kia yiri. Na yilafinhaa fuflɛ gbun, kie yua mbe nyaara ki titɛɛ wa.”

11 O Tafun Nyiɛkpɔɔ wre na ndru mu yo ni pan mbo, 12 “Israel leele mblɛ pe yiri mu ni taan pre wie na, pe kre yomini ŋga nɔɔ chiin? Ki nɔɔ yi na, Babylon ŋunu wra sɛ Jerusalem ŋunu na u loplombo yii, mna sɛ na pe ni Babylon tra nu. 13 Wra Jerusalem lebiile pre wa wɔ mna tia pra yira ka, a Judah lepɔɔ wre na da mu u ŋga. A Babylon ŋunu wre na tra kre loplombo titie plɛ yii mna sɛ, 14 imi kie pe mbe waŋgra kre wa jaa pe waŋgra na, a na waŋgra kre we jaa yiri na kre, fɔna pe li yira ŋga pe ka kre mbra na. 15 Praa wa wa ki ble ka, a Judah ŋunu wre na yiri mu Babylon ŋunu wre taan, a wra u loplombo plɛ wɔ mna tun Egypt ŋunu pan na u u ŋga soolo, na ŋunɔwifɛɛnlɛ tataara. Kena we ja mbe kɔ yira ŋga pe ka mu le peyɛ lalaa kre na, mbe kre kee ŋga pe, mbe uyɛ shɔ, mbe ki nyu mbe u ŋgaa?

16 Ŋga mi u Tafun Nyiɛkpɔɔ Jaŋgafun wre wa ŋga, ni yuu na Babylon tra nu wa Judah ŋunu wre we ku, ŋgi ndra na hin? Wra yira ŋga wre na Babylon ŋunu wre na ka, na u danyi yire kla. A wre wra u tɛɛ jɔɔn na. 17 Hali na ki pan na Babylon ŋunu pan na u ŋunɔwifɛɛnlɛ faŋgafɛɛnlɛ ni, mu pan mu tra fa mu ble Judah kakpɔɛ mboe na, mu kakpɔɛ yire fɛ mu kun, na yi leele chaa mbe gbo kuraa kre, Egypt ŋunu Pharaoh ŋunɔwifɛɛnlɛ faŋgafɛɛnlɛ pre wa jaa u shɔ. 18 Judah ŋunu na danyi, na yira ŋga wre na Babylon ŋunu na ka mna le peyɛ lalaa kre kla, mna yire kee nyjɛ krɛrɛ pe, ki tia wa shɔ.”

19 Ki tia kee ŋga u Tafun Nyiɛkpɔɔ Jaŋgafun wre yuu yi kre, “Ŋga mi Nyiɛkpɔɔ wre wa ŋga, mbe u ndie tini, ŋga wra ni mɛɛ tɛɛ mna yira ka, mna da na we li ki na, a u nsra li ki na kre ndra na. 20 Mbe ni asau wa mbe u yii, mbe sɛ na u ni Babylon tra nu, mbe sɛ u gbun na pimi ni wa, ŋgi na hin? U n kpra wru na ni ni. 21 U ŋunɔ wifɛɛnlɛ mblɛ pie na feni mbe shɔ pre kro we to ŋunɔ, a pe mblɛ pie jaa shɔ kre we nyina lawee kro nu. Kre ee chin na mi e Tafun Nyiɛkpɔɔ wre ni paara.”

22 Kee ŋga e Tafun Nyiɛkpɔɔ Jaŋgafun wre yuu yi kre, “Mi titi we cedar tiŋge ndra lalaa kaan ŋga ki fun na paan kun mbe sɛ ki luu nyua gedeŋge ka ndra na. 23 Israel nyua ndra na mbe sɛ ki luu, kie klɛ ta, mbe sɛ, mbe kaari cedar tiŋge ŋga ki nyu. A hanyiɛlɛ nyini nyini we sɛ zeere le ki na, mbe ki klɛ yire nyimi wo pe na. 24 Kie ti mbe tinyi nyjɛ yii wa nyaa kro chin na mi wi yi Tafun Nyiɛkpɔɔ Jaŋgafun wre, mi ni tii mbe tinyi gedenyi to tra, mbe ti nyjɛ yi pe gbru gbru kre lɛ mbe gede. Mi ni tii mbe tinyi wrɛ nyinyi yua, a mbe ti nyjɛ wrɛ yi yua yire ndru mbe wrɛ nyinyi fun. Mi e Tafun Nyiɛkpɔɔ Jaŋgafun wre ni ki yo, a mbe ki pe.”