6 Kre ndaa tro mna mu nya, na muu wa na gbila mu nyimi nu. Ŋga ndaa mu nya nyimi yire nu ma kre, a ndaa yo na mba mu ti mbe mu ku. 7 Ndaa mu le a mna lɛ imi na tiŋge lee nyaa. Mna lɛ mna yire chlɔ mu nyu, mna nyinimi kpolo, a mu nyjure na lɛ kama, a nde na wejinwaara mu tro.

8 Ŋga ndaa kɔ na tro mna mu nya kre, na mu lɛ mbe jaa leŋge. A ndaa ni dodoŋgi kokoo yii mna mu fɛɛrɛ tɔ. A ndaa da mu mu ŋga, mna nyu nunu pe na mu ni, a mna pe ni wo. Pan mi mu Tafun Nyiɛkpɔɔ Jaŋgafun wre yo.

9 Ndaa mu weli mna nyimi yire laa mu na, mna mu fa simi. 10 A ndaa mu tɔ na yoŋgo ŋga nu pe yirɛ tin mu le ni, mna mu le yurɔ hlɛ kpawrɛ. Ndaa mu san na yirɛ finyi ni, yire na dodonyi ndrɔ shelee ni. 11 Ndaa mu san swa yirɛ ni, mna mu le kɛgbrɛ, na lagboe jlɔnyi, 12 mna feelee le mu mana, mna mu le ndiile yirɛ, mna mu le ŋujuulee chichie ka. 13 Swanyiɛ, na swafiŋge yirɛ ni ndaa mu san, a dodonyi finyi chichiele, na yonyi nyjɛ ndrɔ yira sheli, a pra yirɛ tin mu le yi nu mnaa toni. A mimi chichie, na srɛ, na olive simi ni praa mu sro piin. A mna nyu titi, mna yiri mu pan mu pe ŋuchlɔ. 14 Mu nyumu na tia mu mɛɛ na yili waŋgrɛ nu, ŋgi na hin? Imi na ndaa mu san kre na tia mnaa mu nyumu kre na chiɛnri titi. Mi mu Tafun Nyiɛkpɔɔ Jaŋgafun wre ndaa ki pe.

15 La, mu yiɛ na shɔ mu nyumu kre na, a mna taa mu mɛɛ ŋga kra yili kre na mna kaari tɛtiɛrɔɔ. Kena ndro ŋmba mu nya to, mbe mu muyɛ wru mbe u ŋga, kre kee ŋga n fna mbe mu ki pe. 16 Mna mu yonyi yire yɛ tɛɛ mna lawee san a yira nyu, a mnaa tiɛri wa. Yire kee nyjɛ n fna mbe pe fio. 17 Swanyiɛ, na swafinyi lagboo jlɔnyi chichiele nyjɛ ndaa mu ŋga yire, mna yi tɛɛ mna sɛɛnlɛ bilɛ pe na sumi, mna yili ni kro na chlɔ yili u plɔ kro. 18 Mna mu yonyi nyjɛ nu pe yirɛ tin mu le yire tɛɛ mna yi tɔ tɔ. Mna simi fa wo, na tuwe ndiom tɛɛn nyjɛ ndaa mu ŋga yire wru mu yi ŋga. 19 A paanu mimi chichie, na olive simi, na srɛ nyjɛ ndaa mu ŋga mbe yi pe mu sro kre, mna yi tɛɛ na sra woni na sɛɛnlɛ yire kaan, yire kee yire mnaa pini. Mi mu Tafun Nyiɛkpɔɔ Jaŋgafun wre ni ki yo.

20 A mu tiɛrɛɛ kre chiin ma mnaa pini kple, mna bibilɛ, na bichiɛlɛ mblɛ mi na ŋu na se pre wru mna sɛ sra wɔ mu sɛɛnlɛ yire ŋga. 21 Mna ni biile pre plɛ yulɔ knumu na brɔfiɛn ni, mna pe sro mu sra wɔ mu sɛɛnlɛ yire ŋga. 22 Mu afunyi kee nyjɛ mnaa pini yire, na mu tiɛrɛɛ kre krɛrɛ nu kre, mu nsra mu bimi sɔɔnri, nyjila ŋga ni mna sni wejinwaara, na gbila nyimi nu kre.

23 Mi mu Tafun Nyiɛkpɔɔ Jaŋgafun wre yo, ‘Mu atɛ.’ Mu sisam kee nyjɛ krɛrɛ kɔkro kre, 24 mna sɛɛn nyinyi sin lenɛɛmu fni ndoe nu lete na, 25 a bawa mnaa sni na bilɛ mblɛ mu nya na pe tro kro ni, blenyini ŋga kre mnaa pini na yaa. 26 Egypt leele mblɛ lɛ mu chamnae, a mu niŋge naa wa pe na kre praa paan na sni na mu ni, a kra tia mu tiɛrɛɛ kre na wɛ. Mnaa yire kee yire pini na ni krɔ kuun. 27 Ki tia mbe nyini sisaa kna mu na, mbe ka kun mu tra ŋga ni mu ŋga kre na. Mbe mu wru mbe le Philistine leele jajaarafɛɛnlɛ mblɛ lɛ mu loŋgoolo pre kɛɛ. Ŋga pre kuraa afunyi kee nyjɛ mu pini yire kee loo kre ki pe fo. 28 Ŋga leele mblɛ ni mu tiɛri kre n mu nyu da kre ndra na, mu sɛ tiɛri na Assyria leele ni na, hali kre kɔkro kuraa kre, ki n mu nyu da. 29 A ki tia mu flo mu da Babylon jafalifɛɛnlɛ pre na, a nde tiɛrɛɛ kre n mu nyu da tun.

30 O Tafun Nyiɛkpɔɔ Jaŋgafun wre yo mbo, ‘Mni a mu niŋge wɛ mu na ma hin?’ A mna yire kee nyjɛ pini na tɛtiɛrɔɔ nyifɛɛrɛ lafun wi. 31 Ŋga mna sɛɛnlɛ nyinyi sin sin lenɛɛmu fni ndoe yire nu na tiɛri wa kre, mnaa mu fɔtɔɔrɔ jee, mu nsra pe na ŋmba u tiɛrɛɛ wru mu pe tnumu wi. 32 Pan mu nyi na chlɔ tɛtiɛrɔɔ titi wi, u fumblɔ chaa mu wɛ u plɔ na. 33 Chlɔ tiɛrifun kro swa shio, la, bilɛ ŋu dɔli yirɛ ni, pra yiri lawee kro nu na paan na sni na mu ni. 34 Pan ma mu nyi na tiɛrifɛɛnlɛ hamblɛ pre lɛ, bilɛ ma pe paan na ŋu chaa sinlɛ na, la, ŋu mu paan na pe ni, na pe fɔlɔ toni.”

35 Kena ŋu tɛtiɛrɔɔ wre, kee ŋga o Tafun Nyiɛkpɔɔ wre yo loo. 36 O Tafun Nyiɛkpɔɔ Jaŋgafun wre yo mbo, “Mu yirɛ laala muyɛ na, mu mu fɛɛrɛ wɔ fimi na, a ŋu na mu nyanyjɛɛlɛ na tiɛri. Mu afunyi sɛɛnlɛ yire mu sumi, na mu biile teeri na sra woni na yi kaan kre ndra na, 37 mbe mu nyanyjɛɛlɛ mblɛ ŋu na pre yɛshɔɔrɔ lii pre kro nyu ble titɛɛ, pe mblɛ mu kori, na pe mblɛ kee ki mu bin pre kro, mbe ti mbe pe pan mbe mu fɛ mbe kun, mbe ni mu yirɛ tini mbe laala mu na pe yiɛ na, mbe pe kro mu fɛɛrɛ nya. 38 Mbe mu gbun pimi ni na mu leŋgeere kla, mu nyimi kna mu wo, a mbe krɔ sisaa tɛɛ mbe mu gbun kumu pimi ni. 39 Mbe mu wru mbe le mu korifɛɛnlɛ pre kɛɛ, mbe pe sɛɛnlɛ nyinyi nyjɛ mu sin yire juari mbe wo. Pie mu yonyi yire laala mu na, mbe mu swa yirɛ nyjɛ mu le yire wɔ mu na, mbe mu ti wejinwaara. 40 Pie kanyaa le lenɛɛrɛ nu mbe pe paan mu waari dnɛ ni mbe gbo, mbe pe brɔfiɛn yiɛshiin tɛɛ mbe mu gboo kre kunumu bujibuji. 41 Pie kanhun le mu kalonyi nyjɛ mu sin yire na, mbe mu ndie tini chiɛlɛ tataara yiɛ na. Mi Nyiɛkpɔɔ we ti mbe mu tiɛrɛɛ kre nyu to. A ma tiɛri mbra bilɛ kaan swa na. 42 Na ki pan ma kre ni krɔ ŋga ki kun na mu ni kpɔɔ kre we nyjii, a mba yenyjam wi mu na na.

43 Ŋga mna mu bimi nyjila kre fɛɛ, mna yire tiɛri kee nyjɛ krɛrɛ pe mu ya afunyi sɛɛnlɛ yire kee na, mna ni krɔ kun kre, ki tia mbe mu ndie tini. Mi mu Tafun Nyiɛkpɔɔ wre ni ki yo.

44 Jerusalem, leele we kre yomini ŋga gbun mbe wo mu na mbo, ‘Imi na chlɔ nyi, pan u pɔ chlɔ nyi.’ 45 Jerusalem, mu lo wre bichlɔ kain wi ŋu, mu lo nsra u plɔ na u biile le mu nya, a pan mu nyi na mu lo bichiɛlɛ mblɛ pe nsra pe pilɛ na pe biile le mu nya pre lɛ. Jerusalem, Hittite ndro na wi mu lo, a mu lɛ na pe Amora ndro. 46 Mu nyjɔ chlɔ lopom na wi Samaria chia kre, wre wraa wa mu tni na shie mu nyjeeri haa wa na u bichiɛlɛ ni, a mu chunu chlɔ ŋmba na u bichiɛlɛ praa wa mu tni na shie mu tapan haa kre wi Sodom chia. 47 Mu pe kooloe nyjɛ na pe tro yire, na pe afunyi kee nyjɛ pe pini yire kro twan, kolo kro na. Mu kee nyjɛ mu pini kre wɛ pe wee yire na. 48 Jerusalem, ŋga mi mu Tafun Nyiɛkpɔɔ Jaŋgafun wre wa ŋga, ni chaa mbe mu chin na, mu lo bichlɔ Sodom wre na u bichiɛlɛ pre nsra kee sisaa pe mu da na nyjɛ ŋu na mu bichiɛlɛ pe ŋga ni.

49 Sodom na u bichiɛlɛ pre sisam nyjɛ pra pe yire ni praa peyɛ kpɔɔri. Ŋga sro na bɔ pe na kre ndra na, pe kee ka na ma yaka ni, a pe nsraa yaa shianfɛɛnlɛ, na foorofɛɛnlɛ na. 50 Praa kpoŋmbooro kee pini, na afunyi kee pini ni yiɛ na. A kra tia ndaa pe kla. 51 E sisam nyjɛ e pini ŋga, Samaria nsra yi yɔɔ kuraa pe. E afunyi kee pe mu wɛ pe na, a ki tia ki sɛ pe na Sodom na Samaria kuraa n sisaa ka pe. 52 E ti mbe nyifɛɛrɛ e gbo, yaa shia jawa na e nyu mu wɛ Sodom na Samaria na. Ŋga e sisam kpɔɔ kre ndra na, ki tia Sodom na Samaria nyu mu wɛ e na. Kena e ti mbe nyifɛɛrɛ e gbo, ŋgi na hin? E sisam yire tia ki sɛ pe na Sodom na Samaria kna mu prɔ e na.

53 Ki blee wa na paan mbe ni Sodom na Samaria na pe bichiɛlɛ pre kro dwan, a mbe ŋu Jerusalem dwan na. 54 Na ki pan ma, kie ti mbe nyifɛɛrɛ mu gbo, mbe gbun nyjii Sodom na Samaria na, na pe sisam prɔ e wee na. 55 Na kre ble kre da kre, ŋu na Sodom, na Samaria we ndru mbe eyɛ ta, yire na e bichiɛlɛ pre kro we ndru mbe e yire haa lɛɛ kre ta. 56 Jerusalem, ble nyjɛ nu mnaa muyɛ kpɔɔri kre, mnaa Sodom pini na tɛɛ. 57 La, fuŋgaami pe mu sisam nyjɛ mu piin yire kro wa kagba na, a ki tia Syria, na Philistine waŋgrɛ yire, na waŋgrɛ nyjɛ yi mu fɛ mu kun kre, mu kee pe bin, a pra mu tɛɛlɛ. 58 Mu tiɛrɛɛ, na mu afunyi kee nyjɛ mu pe yire krɛrɛ kanyana we tuu mu na. Mi mu Tafun Nyiɛkpɔɔ wre ni ki yo.

59 Kee ŋga mi e Tafun Nyiɛkpɔɔ Jaŋgafun wre yuu yi kre, mbe yili mu yiɛ na imi na ki fna, ŋgi na hin? Mu ni danyi, na ni nyu nunu ŋga ndaa pe na mu ni kre le fiɛn. 60 Mbe nyu nunu ŋga ndaa pe na mu ni mu bimi kre sɔɔnri, mbe nyu nunu fɔŋgɔ ŋga kia jaa kun fio pe na mu ni. 61 Na mu nyjɔ chlɔ Samaria na mu chunu chlɔ Sodom waa ndru mu pan, a ni pe wru mu mu ŋga na mu bichiɛlɛ lɛ kre, kie ti mbe mu mu kooloe fuɛn nyjɛ na mnaa troi kre sɔɔnri, mbe nyifɛɛrɛ mu gbo. La, kii wa na pe kɛ nsra chaa nyu nunu ŋga mi na ŋu na pe kre nu. 62 Mbe ndru mbe faŋga le nyu nunu ŋga ndaa pe na mu ni kre nu, kre mu chin na mi wi mu Tafun Nyiɛkpɔɔ wre. 63 Na ni waa mu sisam yire kro ti mu mu kɛ kre, kre mu yi sɔɔnri mbe nyifɛɛrɛ mu gbo, a ma jaa nyu nyaa mbe paara. Mi mu Tafun Nyiɛkpɔɔ Jaŋgafun wre ni ki yo.”