Nyiɛkpɔɔ Paara Ezekiel Pan
2
Nyiɛkpɔɔ na paara ni pan mbo, “Ezekiel, lewo na nyjuro, yire sholo mbe ni paara mu pan.” 2 Ŋga Nyiɛkpɔɔ naa paara ni pan kre, a u ŋumu na pan mu le ni nu, a ndaa yiri mu yire sholo, a wraa paara ni pan.3 Mbo, “Ŋu lewo na nyjuro, ni mu tuni Israel leele pan, waŋgra ŋga leele pe yiri mu ni taan kre. Pan pe nyi na pe tolɛɛlɛ mblɛ pra yiri mu ni taan fa pre lɛ, a pe yiri mu taa pe kro. 4 Pre leele mblɛ pan ni mu tuni ŋga, pe ndra sheli, a pe ndie kan. Kena sɛ yo pe pan na, ‘E kee ŋga o Tafun Nyiɛkpɔɔ Jaŋgafun wre yuu loo.’ 5 Ŋga pe pe ndikambla ŋga, na pe ndie tɛɛ o, na pe n ndie tɛɛ o, pie chin na Nyiɛkpɔɔ kee nyanyofun waa wa pe nu. 6 A ŋu Ezekiel, lewo na nyjuro, maa shia pe fiɛ, ndee mbe pe kee nyjɛ pie yo yire fiɛ. Kii wa na pie mu kee yire je, mbe mu le fiɛn, pan kie mu pe na naala nu mu nyi mu tni, nde maashia ti mbe gbun yɔ mu na, ndee mbe ti mbe fiɛrɛ mu yii kpɔɔ pe kee nyjɛ pie na yuu yire na. 7 Pe yiri mu ni taan fa, kena na pe ndie tɛɛ o, na pe n ndie tɛɛ o, ni kee kre yo pe pan. 8 La, ŋu lewo na nyjuro, kee ŋga ni yuu mu pan kre loo, maashia yiri mbe ni taan na pre lɛ, nyu nyaa mbe ni kee le mu nyuu.”