3 A wra yo ni pan mbo, “Lewo pɔ, yurɔ hlɛ ŋga ni mu kaan ŋga ka mu yɔɔ.” A ndaa ki ka, a kra tna nyuu na srɛ nyumu yi.

4 A o Tafun Nyiɛkpɔɔ wre na ndru mu yo ni pan mbo, “Lewo na nyjuro, sɛ kee nyjɛ mbe yo mu pan nyjɛ kro yo Israel leele pre pan. 5 Ŋu titi wolo Israel leele pre pan ni mu tuni, lefumblɔ mblɛ pe yolo fɔŋgɔ yuu, a ma yi nɔɔ loo pan ma ni mu tuni. 6 Na kra pe na waŋgra kpɔɔ ŋga leele yolo mu n na ndru pan ndaa mu tuni kre, pie na mu kee kre loo. 7 La, Israel leele pre wa ndie tɛɛ mu pan, ŋgi na hin? Pe n na chaa mbe ni kee kre loo, pe ndie kan, a pe ndra sheli. 8 Kre ndra na mbe ti mbe mu ndie kan na pre lɛ. 9 Mbe ti mbe mu yire mbe sheli na chirɛbɔ yi, kii wa na pe yiri mu ni taan, nde maa shia ti mbe mu gbun yɔ, ndee mbe ki ti mbe mu pe fiɛ.”

10 A Nyiɛkpɔɔ na yo mbo, “Lewo na nyjuro, ndie tɛɛ chiriri, mu ti mbe kee nyjɛ mbe yo mu pan ŋga kro le mu jawala nu. 11 Sɛ yo Israel leele mblɛ pe yii mu ya mu na mu pan Babylon tra nu mna pre pan na, ‘Kee ŋga mi e Tafun Nyiɛkpɔɔ Jaŋgafun wre yuu yi kre,’ na pe ndie tɛɛ mu pan o, na pe n ndie tɛɛ mu pan o, kee kre yo pe pan.”

12 A Nyiɛkpɔɔ ŋumu wre na ni yire nyjeeri, a ndaa mana kpɔɔ ka loo ni kro na ki yuu mbo, “E o Tafun Nyiɛkpɔɔ wre yɛnyiŋge kre ŋga mɛɛ, u tni haa wa nyjeeri.” 13 Ndaa loo na yurɛ pre pe kuɛn gbuun yiyɛ na, a yira tini, a yirɛ nyjɛ yira pe na sakri jeelee yi yire naa tini kpɔɔ pe jaara. 14 O Tafun Nyiɛkpɔɔ ŋumu wre na ni wru jaŋga ni na shie, a kra ni bin, a ni krɔ na kun. 15 A ndaa sɛ yili Israel leele mblɛ pra yii mu sɛ chia ŋga praa yeeri Tel-Abib kre na, chia kre naa wa Kebar lɔɔ kre mbɛɛ na. A ndaa sɛ tni pe nu ble kɔɔnashin, a kee nyjɛ ndaa nya yire kro na ni fo.

16 Ble kɔɔnashin yire kɔkro kre, o Tafun Nyiɛkpɔɔ wre na paara ni pan mbo, 17 “Ezekiel, lewo na nyjuro, ni mu wɔ mbe mu pe Israel waŋgra kre lefun, ki tia kee ŋga mbe yo ŋga loo, mu sɛ pe jaari ni pan. 18 Na ni yo sisam pefun pan na we ku u sisam ndra na, a mu nsra u jaari a u sisaa pee ti mbe yire ki na mbe ŋmaa ta kre, na ki pan na sisam pefun wre ku u sisam nu kre, ŋu mu u kumu kre mapini tio. 19 La, na mu sisampefun wre jaari, a u je u n laa u sisam kro kre, we ku u sisam nu, la, mu muyɛ ndra ta.

20 A na ki pan na lewo frakafun laa u frakaa kro mu sɛ sisam pe, a ndaa gbronto dnɛ tɛɛ u yiɛ kre, we ku. Ŋga mu n u jaari kre ndra na, we ku u sisam nu. A na ki pan ma, fraka kee nyjɛ u pe fa kre, mba yi sɔɔnri na, a ŋu mu u kumu kre mapini tio. 21 La, na maa paara mu lewo frakafun jaari na waa shia sisam pe, a u n sisaa pe kre, we ŋmaa li. Ŋga u mu jaaraa kre loo kre ndra na, mu muyɛ ndra ta.”

22 O Tafun Nyiɛkpɔɔ wre jaŋga naa wa ni na, a wra yo ni pan mbo, “Yiri mu sɛ landɛɛ kre nu wa mbe ni sɛ paara mu pan.” 23 A ndaa yiri mna tii landɛɛ kre nu, bawa ndaa o Tafun Nyiɛkpɔɔ wre yɛnyiŋge nya na ki chiɛnri imi na ndaa ki nya Kebar lɔɔ kre mbɛɛ na wa kre, a ndaa to mna yiɛ juule tra.

24 A Nyiɛkpɔɔ ŋumu na pan mu le ni nu, a ndaa yiri mu yire ni jeelee na, a wra paara ni pan mbo, “Sɛ katoo, mu sɛ le nyuŋgo mu krɔ tɔ muyɛ na. 25 Ŋu Ezekiel, lewo na nyjuro, pie mu pɔ na mɛnyi ni mbe tɛɛ titɛɛ mbe ma jaa yili leele nu. 26 Mbe ti mbe mu ndile kna, mbe maa jaa paara mbe leele mblɛ pe yiri mu ni taan pre jaari na. 27 La, mbe paara mu pan, mbe ni ti mu nyu saan, kre mu ja mbe yo pe pan na, ‘Kee ŋga o Tafun Nyiɛkpɔɔ Jaŋgafun wre yuu yi kre.’ Mblɛ pie ndie tɛɛ kre, ti mbe pe ndie tɛɛ mbe loo, a mblɛ pie je kre, ti mbe pe je, ŋgi na hin? Ndikambla lɛ.”