Ezekiel Na Pe Nyina Imi Pie Jerusalem Pe
4
Nyiɛkpɔɔ na yo Ezekiel pan mbo, “Ŋu lewo na nyjuro, brikisi wru, mu Jerusalem chia kre nyini kaanri ki na. 2 Mbe mu yirɛ pe mbe yi pe na leele pe paan mbe wi na chia ŋga mu kaanri brikisi na kre ni. Mbe mu nduu yirɛ pe mbe sɛ su ki nyjeeri, kena mbe mu loŋgoolo tnihɛɛ pe mbe ki fɛ mbe kun, mbe yirɛ pe na kɛɛn nyjɛ ni pe lawee jee yi, mbe yi tɛɛ tɛɛ mbe chia kre fɛ mbe kun. 3 Mbe mu tɔɔnrɔ taha kpɛfrɛɛ yire sholo mbe ki pe na mboo yi ŋu na brikisi kre lalaa, mbe mu yiɛ kna mbe kan ki na na wii mu wii na ki ni. Mbe yire kee nyjɛ krɛrɛ pe sɛmbɛɛrɛ mbe Israel leele ŋga.4-5 Kre kɔkro mbe mu sni mu kamɛŋɛ kɛ na ble lafɛɛ taarɛ na fuloe jijirɛ na kɛ, mbe Israel leele pre sisam tio. Kena ble nunu yire mu pe sisam nyjila kre yɛlɛ nunu ŋga.
6 Na mu kre kɔ kre, mbe mu ndru mbe sni mu kalie kɛ na, mbe Judah leele pre sisam tio ma ble fuloe shiin. Kena ble nunu we yire mbe pe sisam nyjila kre yɛlɛ nunu ŋga. 7 Mbe mu yiɛ kna mbe kan Jerusalem ŋga mu kaanri brikisi na, a loŋgoolo ki fɛ mu kun kre na, mbe mu kaŋgro nyini ki na, mbe ti mbe mu ni kee shɔ mbe yo mbe ki taan. 8 Mbe mu pɔ na maŋa ni, mbe mu sni kokoo nunu kre na, ma jaa kna mbe sɛ su na ble nyjɛ nu mu wi na chia kre ni yire nyu we to.
9 Shɔlɔ nyini nyini, na chibi nyini nyini, na fifiire cha mu le yira nu mna paanu pini, yire mu na kaa ble lafɛɛ taarɛ na fuloe jijirɛ na kɛ nyjɛ nu mu sni mu kamɛŋɛ kɛ na yire nu. 10 Blenyini ŋga pie yirɛ yire mimi tɛɛ mbe paanu chiɛri pe mbe mu ka gbee nunu, 11 mbe mu nyjila tɛɛ mbra nyumu gbɔyira fiɛn fiɛn shiin gboo blenyini. 12 Lewo fre ŋga ki yua ni pie tɛɛ mbe kanhun gbɛɛri, mbe paanu fɔ ki naŋgua na, mbe mu ki ka lawee ŋga nu leele we na mu nyaa.” 13 A o Tafun Nyiɛkpɔɔ wre na yo mbo, “Kre kolo ŋga na Israel leele we tro mbe sro ŋga ki n pe cheche li waŋgrɛ nyjɛ nu mbe pe ni mbe pe sɛ yire nu.”
14 A ndaa kna mu yo Nyiɛkpɔɔ pan na, “Jande, maa ti mbe ni kre kee ŋga pe, ŋga pe ni se, ni n da mu sro ŋga kie ti mbe ni le nɛɛrɛ nu le nyuu tun. A ni n da mu yurɔ ŋmba u ku uyɛ, ndee mu yurɔ ŋmba yurɔ sisaa wa gbo mu wa kaara ka tun, a yurɔ ŋmba u n pe cheche kaara n da mu gbun ni nyu na tun.” 15 A Nyiɛkpɔɔ na kna mbo, “Ni loo, mba ti mbe pe mu paanu yire fɔ lewo fre na, la, nafre yua wo ni pie tɛɛ mbe yi fɔ.”