Ezekiel Na Ndra Klu
5
O Tafun Nyiɛkpɔɔ wre na yo Ezekiel pan mbo, “Lewo na nyjuro, brɔfiɛn yiɛshiin ŋga nyu ki tna cha mu mu ndra na mu nyutan yooro klu na ki ni. Na mu kɔ, mu nyjure yire kra na krayira ni, mu yi yɔ taarɛ mbe yi yila. 2 Na wiire ŋga mu wii na Jerusalem chia ŋga mu kaanri brikisi na kre ble yire nyu waa to, mbe mu nyjure yire yɔm nunu sro brikisi kre na. Mbe yi yɔm shiinwo yire chile na brɔfiɛn yiɛshiin ni mbe wo brikisi kre na mbe fɛ mbe kun, mbe yi yɔm taarɛ wee yire nyina fuflɛ na, mi titi we ni brɔfiɛn yiɛshiin tɛɛ mbe yi chile mbe wo. 3 Mbe mu nyjure yire chiɛri wɔ mbe yi fo mu dodoŋgi nyu na. 4 Mbe mu nyjɛ mu fo yire chiɛri wɔ mbe wa kanhun kre nu mbe yi shɔ. Kre kanhun kre we shɔ mbe sɛ le Israel leele pre kro nu mbe pe kla.”5 Kee ŋga o Tafun Nyiɛkpɔɔ wre na yo yi kre mbo, “E le, mi ni Jerusalem tɛɛ waŋgra ŋga kro lalaa, mu tia waŋgrɛ ki fɛ mu kun. 6 A nde ki leele yiri mu ni taan, mu je na pia li ni mbra na, pe sisam kpɔɔ mu wɛ waŋgrɛ nyjɛ yi pe fɛ mu kun yire leele na.
7 Kena Jerusalem leele, e loo kee ŋga mi e Tafun Nyiɛkpɔɔ Jaŋgafun wre yuu, ŋga e je na yaa li ni mbra yire na, mu sɛ taa waŋgra yire paala kee na kre ndra na, ki tia e kepele peere mu wɛ waŋgrɛ nyjɛ yi e fɛ mu kun kre na.
8 Ki tia kee ŋga o Tafun Nyiɛkpɔɔ Jaŋgafun wre yuu yi kre mbo, ‘E ni kaari loŋgo, a mbe e ndie tini kpɔɔ waŋgrɛ yire yiɛ na.’ 9 E sɛɛnlɛ nyjɛ kee ni fun yire ndra na, kee ŋga mbe taa e na kre ka n da mu pe tun, a ka waa da mbe pe ma na fio. 10 Klo sisaa ŋga kie to kre ndra na, sefɛɛnlɛ we pe biile yii mbe ka, mbe biile pe sefɛɛnlɛ yii mbe ka. A e mblɛ ee kro kre, mbe e ndie tini mbe e gbun mbe nyina lawee kro nu. 11 Kpra na, ŋga mi e Tafun Nyiɛkpɔɔ wre wa, a e sisam kee tɛɛ mu ni Suminyuŋgo kre tɔ nɛɛrɛ ni, na e sɛɛnlɛ nyjɛ e sumi, na e kepele fuɛn nyjɛ e pini yire ndra na, mbe krɔ kna mbe wa e na, a mba e fooro le mbe e wa ti. 12 Na pe e yɔ taarɛ, yira ndee klo we e yɔm nunu gbo Jerusalem na, mbe yɔm nunu to ŋunɔ chia kre mbookrɔ, a mbe e yɔm taarɛ wo kre gbun mbe nyina lawee kro nu mbe e kɔŋgɔ ni mbe sɛ e gbo brɔfiɛn yiɛshiin ni wa.
13 Mbe ti mbe e ni krɔkuɔn kpɔɔ kre nya, mbe sɛ su na mbe fɔlɔ tɔ e na. Kre ee chin na, ŋga e n kpra li na ni ni ki tia mi e Tafun Nyiɛkpɔɔ wre na paara e pan na krɔkuɔn sisaa ni.
14 Ndro ŋmba we na tro kpan we na e pini mbra tɛɛ, ŋga ni e kla kre ndra na. 15 Kee ŋga mbe krɔkuɔn tɛɛ mbe pe e na kre we waŋgrɛ nyjɛ yi e fɛ mu kun yire fo, mbe fiɛrɛ pe yii. Pie na e pini kplɛndɛlɛ kee, mbra e tɛɛlɛ. 16 Mbe e sro nyjɛ e luu kro kla, mbe ki ti klo e gbo, pan e kanyana we pe na snimi ni pe e suulo mbe e kla. 17 Mbe ti mbe klo to e na, a nyaalam yurɛ sisɛɛ we le e nu, mbe e biile yii mbe ka. Mbe ti mbe yira sisaa le e nu, a e loŋgoolo we e gbo na brɔfiɛn yiɛshiin ni. Mi e Tafun Nyiɛkpɔɔ wre ni ki yo.”