Nyiɛkpɔɔ Paara Mu Israel Leele Taan
6
O Tafun Nyiɛkpɔɔ wre na yo mi Ezekiel pan mbo, 2 “Ŋu lewo na nyjuro, mu yiɛ kna mu tɛɛ Israel nyuɛ yire na mu paara mu yi taan. 3 Yo yi pan na, ‘Yire nyuɛ, na nyambie, na landɛɛ nyjɛ nu pe sɛɛnlɛ sumi Israel tra nu kre, e kee ŋga o Tafun Nyiɛkpɔɔ Jaŋgafun wre yuu loo, ni paan na brɔfiɛn yiɛshiin ni e na, mbe paan e kla kro. 4 Mbe e sragbuɛnlɛɛ nyini nyini yire kro juari mbe wo, a mbe leele mblɛ pe sɛɛnlɛ yire sumi pre gbo mbe wo yi yiɛ. 5 Leele pre gboolo, na pe kajle we nyina mbe sɛɛnlɛ yire, na sragbuɛnlɛɛ yire fɛ mbe kun. 6 Chiɛ nyjɛ na Israel leele nyi mu tni yire kro we kaari kajɛɛ, a mbe lawee nyjɛ nu pe sɛɛnlɛ sumi yire, na pe sragbuɛnlɛɛ yire kro juari mbe wo, a pe yirɛ kro we yili pe kɛɛ. 7 Pie ku pe chiɛ yire kro na, kre pe mblɛ pie kro kre we chin na mi wi pe Tafun Nyiɛkpɔɔ.8 La, na ni pe gbun mu nyina waŋgrɛ yire nu kre, mbe pe plɛ shɔ brɔfiɛn yiɛshiin kre kɛɛ. 9 La, pe mblɛ pie kro waŋgrɛ nyjɛ nu pie pe yii mbe sɛ yire nu kre, pie ni sɔɔnri mbe chin na pra ni yiɛ le nyumu mna yiri mu ni taan, mna sɛ sɛɛnlɛ sumi, a pe jawala we pe tɔɔra pe sisam kee nyjɛ pra pe yire na. 10 Kre pie chin na mi wi pe Tafun Nyiɛkpɔɔ, a ni nsra pe piɛri finfin, kanyana ŋga ndaa yo mbe ti pe nya kre, pie ki nya yɛŋgɛ.’”
11 A o Tafun Nyiɛkpɔɔ wre na ndru mu yo ni pan mbo, “Ezekiel, mu kɛnyi koori, mu mu jele sin tra mu nyɛni fooro ni, ŋgi na hin? Israel leele afunyi kee pe, ki tia pe loŋgoolo we wi na pe ni mbe pe gbo, ndee klo na yira we le pe nu mbe pe gbo. 12 Pe mblɛ pee wa mu tni haalee kre, yira we pe gbo, a pe mblɛ pee wa chia kre we to ŋunɔ, a pe mblɛ pie kro kre klo we pe gbo. Pe kro we ni krɔkuɔn kre nya kro. 13 Na pe waa gboolo nya pe sragbuɛnlɛɛ yire, na nyambie yire, na nyuɛ yire, na tinyi kpɔɛ wrɛ wee nyjɛ jaara pe sɛɛnlɛ sumi na tuwe ndion tɛɛn sroi kre, kre pie chin na mi wi pe Tafun Nyiɛkpɔɔ. 14 Mbe ni jaŋga nyina pe na, a mbe ti mbe pe tra kre sni waara mbe yire tapanhaa tablɔ tra kre na mbe sɛ su chia ŋga pe yeeri Diblah ŋga kii wa na shie nyjeeri haa wa kre na. Mna pe nyi mu tni kpan, mba wa ti. Kre pie chin na mi wi pe Tafun Nyiɛkpɔɔ wre.”