5 “Kee ŋga o Tafun Nyiɛkpɔɔ Jaŋgafun wre yuu yi na, kanyana kpɔɔ ŋga ka e n da mu loo tun we taala mbe e nya. 6 Yire kanyana yire mbra e na, yi da e na kuraa mu kɔ. 7 Yire Israel leele e wo kɔ, a nyjila kre da e na, yɛshɔɔrɔ kee n wa nyuɛ yire na na, na fiɛrɛ kee bɔkɔ. 8 Ki kro chiɛri mbe ni ti e ni krɔkuɔn kpɔɔ kre nya, mbe ni yire e kepele na mbe e kpra kun, mbe e fɔlɔ tɔ afunyi kee nyjɛ e pini yire ndra na. 9 Mba wa wɔ mbe wa, a mba wa fooro le, e kepele mbe le mbe e fɔlɔ tɔ, e afunyi kee nyjɛ e pini yire ndra na. Kre ee chin na mi wi e Tafun Nyiɛkpɔɔ ŋmba u e ndie tinii.

10 Ble kre da mna, kpralie n wa, a yɛkpɔɔmu lawee kro shɔ mu ta. 11 A pɔɔrɔfɛɛnlɛ na sisam nyjɛ pe chaa pini, e wa n wa mbe uyɛ ndra ta ndie tinɛɛ kre kɛɛ, a e yirɛ nyjɛ na e yiɛ nyi titi yire kro we kla. 12 Ble kre na nyjila kre da mna, kena mblɛ pe prɛ kre waa ti mbe pe yiɛshɔ, a mblɛ pe loni kre waa ti mbe pe yiɛ je, ŋgi na hin? Nyiɛkpɔɔ krɔkuɔn paan leele pre kro na. 13 Mblɛ pe pe trɛ prɛ kre wa yi ta na. Ŋgi na hin? Nyiɛkpɔɔ we pe kro kla, a wa u jawala chinɛ pe klaa kre na. 14 Na pe bnɔ fɔ na pe peyɛ kna mbe sɛ ŋunɔ kre ndro wa sɛ, ŋgi na hin? Ni krɔ kun na leele pre kro ni.

15 Ŋunɔ, na yira, na klo we pe lawee kro nu. Leele mblɛ pe n wa chia kre lam kre we to ŋunɔ, a mblɛ pee wa chia lam kre, klo na yira kie pe gbo. 16 Pe mblɛ pie kro kre we fɛ mbe nyuɛ nduu, a pe sisam ndra na, pie na nyɛni mbra jiin na kotro wa nyuɛ landɛɛ nu. 17 Pe kɛnyi we na seeri, mbe pe kosie na gbnɔ pe na. 18 Pie kumu yonyi tɔ, mbe fiɛrɛ pe yii kpɔɔ. Nyifɛɛrɛ we pe gbo, mbe pe pe ndrɛ klu mbe ki nyina na pe dankna kro kɔ. 19 Pie pe swanyiɛ na pe swafinyi kro wɔ mbe wo lete na na nɛɛrɛ yirɛ yi. Ŋgi na hin? Yire yirɛ shiin yire yira sɛ na pe ni sisam nu, a yia jaa pe shɔ mbe yili o Tafun Nyiɛkpɔɔ wre krɔkuɔn kre kɛɛ, a pia jaa yi ka mbe yɔɔ. 20 Praa peyɛ kpɔɔri na pe lagboe jlɔnyi chichiele yire ni, a yire ni pra tɛɛ mna pe sɛɛnlɛ wɛɛ nyjɛ Nyiɛkpɔɔ fun yire pe. Ki tia mbe ti mbe yi kaari yirɛ wɛɛrɛ pe pan. 21 Mbe ti mbe waŋgra ka leele ndrashelifɛɛnlɛ paan yi foolo, mbe sɛ yi tɔ nɛɛrɛ ni. 22 Mbe yiɛ wɔ mbe pe ni keshian lawee kre tɔ nɛɛrɛ ni, juolo we le wa mbe ki tɔ nɛɛrɛ ni.^a

23 Leele gboo, na pɔɔrɔ kee bribri yi tra kre na kakpɔɔ kre shɔ mu ta, kena jlɔnyi cha nyjɛ ni mu mu leele pre gboolo pre tini mbe sɛ wo. 24 Waŋgrɛ nyjɛ leele ndra yi sheli, mbe ti pe paan pe kalonyi yire wru mbe tni, mbe pe sumi lawee yire tɔ nɛɛrɛ ni. Mbe ni ti pe jaŋgafɛɛnlɛ yɛkpɔɔmufɛɛnlɛ pre nyu to. 25 Na fiɛrɛ sisaa kee waa pe da, kre pie na wejinyiŋge haa chaa, la, pia ki ta na. 26 Kanyana kee we taala pe na, mbe praa mandiɛ nyjɛ yi n tna ndie ndru. Pie na keenyanyofun chaa mbe u nyaa yo pe pan, a kre nyjila kre na mbra nyjɛ srawɔfɛɛnlɛ pe nyina yire fun, a na loplombo kachimblɛ pre wa jaa pe ŋga jawala na. 27 Pe ŋulo, na pe loplombo kro kaanhaa we kɔ, mbe praa nyɛni mbra fooro lii, mbe fiɛrɛ ti mbe leele pre kɛnyi na seeri. Mbe pe ndie tini pe sisam kee nyjɛ pe pe yire na, kee nyjɛ pe pe yire mbe le mbe pe kpra kun, kre pie chin na mi wi pe Tafun Nyiɛkpɔɔ.”