Israel Leele Sɛɛn Sumi Jerusalem Na
8
Ŋga pra Israel leele yii mna sɛ na pe ni Babylon na kre, ki yɛlɛ kɔɔnanu kre nyiɛpɔ kɔɔnanu wo kre ble kunɔ na, na nii wa mu tni ni katoo, na Judah loplombo pre wa mu tni ni yiɛ, a o Tafun Nyiɛkpɔɔ Jaŋgafun wre jaŋga na pan mu le ni nu. 2 A ndaa yira ka nya na lewo wi. Mu yire u sɛlɛ haa mu tii u tapan kre, na pe na kanhun yi, a mu yire wa na shie u nyjeeri haa kre naa chiɛnri na yaawa yi. 3 A kra pe na kɛ u tini mu ni ndra nyjure yii, a ndaa nya na Nyiɛkpɔɔ ŋumu ni kɔ nyjeeri mna sɛ na ni ni Jerusalem na. Ŋumu wre na sɛ na ni ni Suminyuŋgo kre jlonwee lam wo ŋga kii wa na shie nyjeeri haa kre nyu na, bawa sɛɛn ka na nyi mna pe afuŋgo yira, na krɔ kun kee o Tafun Nyiɛkpɔɔ wre pan. 4 Bawa ndaa Israel Nyiɛkpɔɔ wre yɛnyiŋge nya ni yɛsimi imi na ndaa ki nya Kebar lɔɔ kre mbɛɛ na kre.5 A Nyiɛkpɔɔ na yo ni pan mbo, “Ezekiel, yiɛ kna mu tɛɛ nyjeeri haa.” Ŋga ndaa yiɛ tɛɛ wa kre, ndaa nya na sɛɛn ŋga ki tia Nyiɛkpɔɔ krɔ kun kre wa sragbunu kre mbɛɛ na, mu mbra jlonwee kre na. 6 A Nyiɛkpɔɔ na yo ni pan mbo, “Ezekiel, mu kefuɛn nyjɛ Israel leele pini nya ŋgaa? Afunyi kee nyjɛ pe pini yire tia ni Suminyuŋgo cheche kre n fna mbe pe ni sumi wa na. Le, mu afunyi kee nyjɛ yi wɛ ŋga na kuraa nya na.”
7 A wra sɛ na ni ni Suminyuŋgo lawee vankam kre jlonwee nyu kre na, a ndaa vromboo ka nya mboo kre nu. 8 A Nyiɛkpɔɔ na yo ni pan mbo, “Ezekiel, vromboo kre vala mu ya.” A ndaa ki vala a kra pe na krɔ nyu yi. 9 A wra yo ni pan mbo, “Le lam wa, mu afunyi kee nyjɛ leele pre pini yire nya.” 10 Ŋga ndaa le wa kre, ndaa yurɛ nyininyini mblɛ pe fulo gbun na kro nyunɔmu nya mboo kre na, pre na yurɛ mblɛ pe n pe cheche, na sɛɛnlɛ nyjɛ Israel leele pre sumi yire ni. 11 Ndaa nya na Israel loplombo fuloe taarɛ na kɛ wa mu yire yi yiɛ, na Shaphan biblɔ Jaazaniah wa mu chaa pe nu. Na kotie nyjɛ nu pe tuwe ndiom tɛɛn sroi wa pe kro kɛɛ, a tuwe yire ndiom na nyuŋgo kre tɔ kro. 12 A Nyiɛkpɔɔ na yo ni pan mbo, “Ezekiel, mu kee nyjɛ Israel loplombo pre pini wɔmu nu nya ŋgaa? Pe kro wa sɛɛnlɛ nyinyi nu na yi sumi na yuu mbo, ‘O Tafun Nyiɛkpɔɔ wre n na o nyaa.’ Ŋgi na hin? Pe jawa na ni laa pe kro.” 13 A Nyiɛkpɔɔ na ndru mu yo ni pan mbo, “Mu afunyi kee nyjɛ pe pini a yi wɛ nyjɛ na kuraa nya.”
14 A wra ni wru mna sɛ o Tafun Nyiɛkpɔɔ Suminyuŋgo kre jlonwee ŋga kii wa na shie nyjeeri haa kre nyu na, bawa ndaa chiɛlɛ nya na pe pe sɛɛn Tammuz kre nyɛni. 15 A Nyiɛkpɔɔ na yo ni pan mbo, “Ezekiel, lewo pɔ, mu kee nyjɛ pe pini ŋga nyaa? Mu afunyi kee yɛ nya mbe yi wɛ nyjɛ na.”
16 A Nyiɛkpɔɔ na sɛ na ni ni Suminyuŋgo kre lawee vankam lam wo kre nu, bawa ndaa bilɛ fulo na kunɔ plɛ nya na pee wa mu yire bamba kre, na sragbunu kre lalaa mu mbra jlonwee kre nyu na. Pra yire mna krɔ kna mu wa Suminyuŋgo kre na, mu yiɛ kan yila finhaa na lɛɛlɛ na yila sumi. 17 A Nyiɛkpɔɔ na yo ni pan mbo, “Lewo pɔ, mu kre kee ŋga nyaa? Ki pe kefɔɔn titi mu Judah leele ŋga na pe kre afuŋgo kee ŋga nyini pini mna. Kena ki fna mbe pra pɔɔrɔ kee pini tra kre nu poŋgo ma na mbra ni krɔ kuun suwi ra? Le imi na pe kɛɛn le le maalɛɛ pe sɛɛnlɛ paala kolo na. 18 Yire kee nyjɛ ndra na, mba pe fooro le, mbe krɔkuɔn tɛɛ mbe pe ndie tini, hali imi nyini pie nyɛni kpɔɔ mbe ni yeeri mbe da kpan, mba ndie tɛɛ pe pan.”