Nyiɛkpɔɔ Jerusalem Leele Ndie Tini
9
Kre kɔkro ndaa loo na Nyiɛkpɔɔ fuu badaaŋga mbo, “Yire bilɛ mblɛ ni wɔ a e na paan mbe Jerusalem kla kre, e pan na e ŋunɔwiyirɛ ni.” 2 A ndaa bilɛ kɔɔnanu plɛ nya na pe yiri Suminyuŋgo kre jlonwee nyu ŋga kii wa na shie nyjeerihaa kre lawee na paan, na pe kro ŋunɔwiyirɛ yii. A blɔ wa na chaa pe nu mu yoŋgo fiŋge prupru tɔ, mu yira ŋga ni we nyunɔ hlu a kra pɛli u mbɛɛ na. A pra sɛ le Suminyuŋgo wa mu sɛ yire swafre sragbunu kre mbɛɛ na.3 A Israel Nyiɛkpɔɔ wre yɛnyiŋge ŋga ki chiɛnri kre na yiri lawee ŋga nu kra nyi Cherubim pre na, mna sɛ yire Suminyuŋgo kre jlonwee nyu na. A o Tafun Nyiɛkpɔɔ wre na blɔ ŋmba wra yoŋgo fiŋge prupru tɔ, mna u nyunɔ yira hlu kre yeeri.a 4 Mna yo u pan mbo, “Nyaari mu tro Jerusalem kakpɔɔ kre na, mu leele mblɛ pe nyɛni na fooro lii afunyi kee nyjɛ pe pini chia kre ndra na pre tnɔ pe nduweele na mu tro.” 5 Ŋga ndaa ndie tɛɛ na kee yire ndru kre, ndaa loo, na Nyiɛkpɔɔ kna na yuu leele hamblɛ pre pan mbo, “E taa u kro e le chia kre lam, e na leele mblɛ nduweele na tnɔmu n wa kre kuu, yaashia pe fooro le mbe wa ti. 6 E pe bilɛ, na chiɛlɛ, na biile kro gbo, la leele mblɛ nduweele na tnɔmu nyi kre, yaashia kɛ taa pre na. E nɔɔhle ni Suminyuŋgo mna e na shie.” A pra yire loplombo mblɛ praa wa mu yire Suminyuŋgo kre yiɛ wa pre na, na kuu na shie.
7 A o Tafun Nyiɛkpɔɔ na yo pe pan mbo, “E leele pre gbo e wo lawee vankam kre nu e Suminyuŋgo kre tɔ nɛɛrɛ ni.” A pra le chia kre lam na leele pre kuu na woni. 8 Ŋga praa leele pre kuu, a mi nunu na kro mu yire wa kre, a ndaa to mna yiɛ juule tra na nyɛni na yuu na, “O Tafun Nyiɛkpɔɔ Jaŋgafun, kena mu krɔ kun na Jerusalem ni mu tro, a ki tia mna chaa mbe leele chiɛri mblɛ pe kro wa pre kla ra?”
9 A o Tafun Nyiɛkpɔɔ wre na kna mna yo ni pan mbo, “Israel na Judah leele sisam ŋga pe pe kre kpɔɔ mu tro. Linkufɛɛnlɛ, na dnumufɛɛnlɛ biribiri lɛ tra kre nu, a pe n na kpra lii Jerusalem na. Pe yuu na mi pe Tafun Nyiɛkpɔɔ wre pe je, a ni n na nyjɛ pe pini yire nyaa na. 10 Ki tia mba pe fooro le, ndee mbe pe wa ti. Sisam nyjɛ pe pe yire ndra na mbe pe ndie tini.”
11 Bawa blɔ ŋmba wra yoŋgo fiŋge prupru kre tɔ, mna nyunɔ yira hlu u mbɛɛ na kre na ndru mna pan mu paara o Tafun Nyiɛkpɔɔ pan mbo, “Ni sɛ kee ŋga mu yo ni sɛ pe kre pe mu kɔ.”