Nyiɛkpɔɔ Yɛnyiŋge Yili Suminyuŋgo Wa
10
Ndaa wa mu yire na ŋujɔɔn ŋga pe pe na sapphire dnɛ ni, a kraa wa yira ŋga kra Cherubim pre ndrɛ tɔ kre nyjeeri kre, le. 2 A o Tafun Nyiɛkpɔɔ wre na yo blɔ ŋmba wra yoŋgo fiŋge tɔ kre pan mbo, “Sɛ tro sakri jeelee yire lalaa Cherubim pre tapan, mu sɛ kanhun naŋgua kre ka ko na kɛ ni, mu sɛ ki nyina Jerusalem na.” Ndaa wa mu yire na u le a wra sɛ le lawee kre nu.3 Na Cherubim pre wa mu yire na shie Suminyuŋgo kre tapan haa, a blɔ wre na tro mu le wa, a tlo na pan mu lawee vankam lam wo kre nyi. 4 A o Tafun Nyiɛkpɔɔ wre yɛnyiŋge na yiri Cherubim pre ndra na, mna sɛ yire Suminyuŋgo jlonwee nyu na wa. Tlo kre na Suminyuŋgo wa nyi, a o Tafun Nyiɛkpɔɔ yɛnyiŋge naa chiɛnri lawee vankam kre nu poŋgo. 5 Cherubim pre kuɛn naa tini kpɔɔ na o Tafun Nyiɛkpɔɔ Jaŋgafun wre mana yi, hali na mu yire Suminyuŋgo lawee vankam fimi wo kre nu, mu yi tiŋge loo.
6 Ŋga o Tafun Nyiɛkpɔɔ wre na yo blɔ ŋmba wra yoŋgo fiŋge tɔ wre pan na u sɛ kanhun wɔ sakri jeelee yire lawee Cherubim pre lalaa kre, a blɔ wre na sɛ le wa mna sɛ yire sakri jeelee yire ka jaara. 7 A Cherubim pre nunu na kɛ le kanhun ŋga kraa wa pe lalaa wa kre nu, mna ka wɔ mu le u kɛɛ, a wra yili na ki ni fimi na. 8 Ndaa yirɛ nyjɛ yira pe na lewo kɛnyi yi, a yiraa wa Cherubim pre kuɛn yire tapan yire nya na.
9 Ndaa sakri jeelee jijirɛ nyjɛ yira wa Cherubim jijirɛ pre tapan yire nya na yi chiɛnri na dnɛ chichiele nyjɛ pe yeeri chrysolite yire yi. 10 Sakri jeelee yire nyini naa nunu, a yira le le yi yɛ nu. 11 Kena na sakri jeelee yire shie, mna yi chaa kpan, yie jaa sɛ mbe yia vile mbe kna. 12 Ndaa nya na nyiɛlɛ yurɛ pre wejinyi tɔ poŋgo, yɛ naa wa wa pe kukrɔɛ na, a yɛ naa wa pe pe kɛnyi na, a yɛ naa wa pe kuɛn na, imi na yira sakri jeelee yire tɔ kre. 13 Ndaa loo na mana ka sakri jeelee yire yeeri mbo, “Sakri jeelee nyjɛ yi vile na kuun.” 14 Cherubim pre kro yiɛ naa jinyjirɛnyjirɛ, yiɛ nunu na pe na nablɛm wi.a Cherubim nunu pe yeeri Cherub, a ka na pe lewo yiɛ, a ka na pe jira yiɛ, a ka na pe nyuu yiɛ. 15 Cherubim pre na yiri nyjeeri. Pre chɔɔ na lɛ yurɛ mblɛ ndaa nya Kebar lɔɔ mbɛɛ na kre. 16 Na ki pan na pe nyaari tra na shie, pe shie na sakri jeelee yire ni, a na kuɛn pe nyaa mbe yiri nyjeeri naa, pe yiri na yi ni. 17 A na yurɛ pre yire titɛɛ, mbe yi yire na, a na pe yiri nyjeeri naa, mbe pe yiri na yi ni, ŋgi na hin? Yurɛ pre ŋumu naa wa sakri jeelee yire nu.
18 Ndaa o Tafun Nyiɛkpɔɔ wre yɛnyiŋge kre nya na ki flo Suminyuŋgo kre jlonwee nyu na wa, mna sɛ yire Cherubim pre ndra na. 19 Ndaa wa mu yire na pe le, mna nya na Cherubim pre pe kuɛn nyaala mna yiri nyjeeri na sakri jeelee yire ni kro mna sɛ yire Suminyuŋgo kre jlonwee nyu ŋga ki shie yilafinhaa wa kre nyu na. Kre nyjila kre na Israel Nyiɛkpɔɔ wre yɛnyiŋge kre wa pe nyjeeri.
20 Pre yurɛ jijirɛ mblɛ ndaa nya Israel Nyiɛkpɔɔ wre tapan Kebar lɔɔ kre mbɛɛ na kre, pre Cherubim pre chɔɔ na lɛ. 21 Yurɛ pre kro naa yiɛ ni jinyjirɛnyjirɛ, na kuɛn ni jinyjirɛnyjirɛ, a yirɛ yɛ naa wa pe kuɛn yire kro tapan na lewo kɛnyi yi. 22 Pe yiɛ yire na mblɛ ndaa nya Kebar lɔɔ kre mbɛɛ na yire wru, a na pe shie, titɛɛ pe kro we yiɛ tɛɛ.