Israel Loplombo Kprakuɔn
11
O Tafun Nyiɛkpɔɔ wre ŋumu na ni wru mna sɛ na ni ni Suminyuŋgo kre jlonwee nyu ŋga ki yiɛ kan yilafinhaa kre na. Bawa ndaa bilɛ fulo na kunɔ nya jlonwee nyu na wa, na Azzur biblɔ Jaazaniah wre, na Benaiah biblɔ Pelatiah mblɛ na lɛ waŋgra kre loplombo pre wa mu chaa pe nu. 2 A o Tafun wre na yo ni pan mbo, “Ezekiel, lewo pɔ, pre bilɛ mblɛ pe jawala fuɛn wrui, mu na Jerusalem leele kaan jawala sisaa kre. 3 Pre pe yuu mbo, ‘E ti mbe o kalonyi sin sin mbe ya, pan o kakpɔɔ ŋga nyi na chɔ ŋga ni pe chiin soori yi, a wre lɛ chiin yire kaara, la, chɔ kre o tɔ mbe kanhun kre titi wa da o na.’ 4 Kena Ezekiel, ni nyu kee shɔ mu paara mu pe taan.”5 A o Tafun Nyiɛkpɔɔ wre ŋumu na pan mna le ni nu, mna yo ni pan mbo, “Yo Israel leele pre pan na, mi pe Tafun Nyiɛkpɔɔ wre chin na yire kee nyjɛ pe yuu, a ni chin kee kee nyjɛ yii wa pe jawala nu. 6 Pe lenɛɛrɛ gbo kakpɔɔ ŋga na, a ki tia gboolo chia kre tɔ kro.
7 Ki tia kee ŋga o Tafun Nyiɛkpɔɔ wre yuu yi kre, leele mblɛ e gbo mu wo chia kre lete na pre lɛ kaara yire, a chia kre yi chɔ kre, la, mbe e ni mbe yili chia kre na.” 8 Kee ŋga o Tafun Nyiɛkpɔɔ Jaŋgafun wre yo yi kre mbo, “Brɔfiɛn yiɛshiin kre e fiɛ, a kre ni mbe pan e na. 9 Mbe e ni mbe yili kakpɔɔ kre na mbe sɛ e le waŋgra fɔŋgɔ ka leele kɛɛ, a mbe e ndie tini kpɔɔ. 10 Pie e kpra kun Israel tra sam na, mbe e gbo brɔfiɛn yiɛshiin ni, kre ee chin na mi wi e Tafun Nyiɛkpɔɔ wre. 11 Yire loplombo pre e yuu na pan e nyi na kaara yi sinyjɔlɔ lam kre, la, Jerusalem wa jaa kɛ tɔ e na, mbe e kpra kun Israel tra sam na. 12 Kre ee chin na mi wi e Tafun Nyiɛkpɔɔ wre, ŋgi na hin? E n taa ni mbra, na ni nyu kee na. Waŋgrɛ nyjɛ yi e fɛ mu kun yire mbra nyjɛ pe le na e sɛ taa.”
13 Ŋga ndaa wa na paara kre to, a Benaiah biblɔ Pelatiah wre na to mu ku. A ndaa to mu yiɛ juule tra, mna nyɛni mu gble le mu o Tafun Nyiɛkpɔɔ wre yeeri mna yo na, “Ao! O Tafun Nyiɛkpɔɔ Jaŋgafun, kena mu Israel leele mblɛ pe kro ŋga kla kro ra?”
14 A o Tafun Nyiɛkpɔɔ wre na kna mna yo ni pan mbo, 15 “Ezekiel, lewo pɔ, leele mblɛ pee wa mu tni Jerusalem na kre yuu na ŋu na Israel leele mblɛ pe yii mu sɛ Babylon na kre haa le na ee mi Nyiɛkpɔɔ sumi. A pe ndru na yuu na Israel tra kre, pre chiin wo yi.
Nyiɛkpɔɔ Yo We Israel Nyu Ble Titɛɛ
16 La, kee ŋga ni chaa mbe mu yo Israel leele mblɛ Babylon tra nu kre pan yi kre, ki pe kpra na mi e Tafun Nyiɛkpɔɔ wre ndaa e ni jaŋga na mu yili yire titi waŋgra nu, mu tia e sɛ tni waŋgra yɛ nu. La, fuŋga mbe ti e ni nya waŋgrɛ nyjɛ nu e nyi mu tni yire nu. Kena e ja mbe ni sumi. 17 Ki tia yo pe pan na kee ŋga o Tafun Nyiɛkpɔɔ Jaŋgafun wre yuu yi kre, ‘Mbe e yoori waŋgrɛ nyjɛ nu e nyina mu sɛ yire kro nu, mbe ndru mbe sɛ e ŋga Israel tra kre.’ 18 Pie ndru mbe pan, mbe paan sɛɛnlɛ nyjɛ yi pe afunyi yirɛ yire wɔ tra kre nu. 19 Na pe waa ndru mu pan, mbe pe ŋga lolonyi fɔnyi, na jawala fɔnyi, a mbe pe ndikana lolonyi nyjɛ yi sheli na dnɛ yi yire wɔ, kre kie ti mbe pe li ni kee na. 20 Na ki pan ma, pie taa ni mbra na ni nyu kee na chiriri. Pie pe ni leele, mbe ni pe pe Nyiɛkpɔɔ. 21 La, mblɛ pie jawala pe na pie kro mbra pe sɛɛnlɛ wɛɛ nyjɛ yi pe afunyi yirɛ yire sumi kre, mbe pe ndie tini kee nyjɛ pie na pini yire na. Mi pe Tafun Nyiɛkpɔɔ Jaŋgafun wre ni ki yo.”
Nyiɛkpɔɔ Yɛnyiŋge Na Yili Jerusalem Na
22 Ŋga o Tafun Nyiɛkpɔɔ na paara ma mu kɔ kre, a Cherubim pre na pe kuɛn yire nyaala mna yiri nyjeeri na sakri jeelee yire ni, ŋga praa shie kre na Israel Nyiɛkpɔɔ wre yɛnyiŋge wa pe nyjeeri. 23 Ŋga kra pan ma kre, o Tafun Nyiɛkpɔɔ wre yɛnyiŋge kre na yili Jerusalem na, mna sɛ nyua ka ndra na, Jerusalem yila finhaa wa. 24 Ndaa wa na yirɛ yire nyaa nyiɛlɛ na, a o Tafun Nyiɛkpɔɔ ŋumu wre na ni wru mna sɛ na ni ni Israel leele pre pra yii mu sɛ Babylon na pre lawee. Ŋga ndaa da wa to, a yirɛ nyjɛ ndaa nyaa nyiɛlɛ na yire na kun mu sɛ. 25 A ndaa kee nyjɛ o Tafun Nyiɛkpɔɔ wre na ni nyina yire kro yo leele pre pan.