Ezekiel 12

Ezekiel Uyɛ Kna Mbe Yili Chia Kre Na

O Tafun Nyiɛkpɔɔ wre na paara ni pan mbo, 2 “Ezekiel, lewo pɔ, leele mblɛ pe yiri mu ni taan pre nu mu nyi mu tni kre, pee nyiɛlɛ ni, a nde pe n na nyaa, pee ndiile ni, a nde pe n na ndru, ŋgi na hin? Pe yiri mu ni taan. 3 Kena lewo pɔ, mu yirɛ wru, mu pe na pe shie na mu ni waŋgra fɔŋgɔ ka nu, yili lafo na mbe leele mu nya, aada na pe mu nya mna shie, kie ti mbe pe chin imi na pe peere mu da. 4 Muyɛ kna lafo na, mbe leele mu nya, mbe mu pe na shie pe shie na mu ni waŋgra ka nu. Yili yilakɔŋgɔ mbe leele mu nya, mbe pe mu nya na ndro ŋmba pe yii na shie waŋgra fɔŋgɔ ka nu wi. 5 Nyjila ŋga pee wa na mu le kre, mbe mu mboo kre tuu mbe vru mbe yili wa na mu yirɛ yire ni. 6 Ti mbe leele pre na mu le mbe mu mu yirɛ yire wru mbe taa patia na mbe yili ndram hulo nyjila mbra shie. Na mu shie mbe mu yiɛ tɔ, kena ma na tra nyaa. Yire kee nyjɛ krɛrɛ we pe jaaraa kee mbe Israel leele pre ŋga.”

7 A ndaa pe imi na Nyiɛkpɔɔ na ni nyina kre. Ndaa ni yirɛ le lafo na. Ŋga yila naa koo kre, a ndaa ni kɛnyi tɛɛ mna mboo kre tuu mu vru, mna ni yirɛ yire wɔ wa, kre nyjila kre na ndram hulo, a ndaa yi wru mu taa ni patia na, a praa ni le.

8 Ŋga nyiŋge na se bnimi, o Tafun Nyiɛkpɔɔ wre na ni wie mbo, 9 “Lewo pɔ, kena ŋga mnaa yire kee nyjɛ pini kre, Israel leele mblɛ pe yiri mu ni taan kre nsra mu wie na, ‘Kee ŋgi mu pini ŋga hin?’ 10 Ndru mu sɛ yo pe pan na, ‘O Tafun Nyiɛkpɔɔ wre yo na, kee ŋga shie mu na ŋunu ŋmba uu wa Jerusalem na, na Israel leele mblɛ pee wa wa pre kro kaan. 11 Yo pe pan na kee ŋga mu pini kre pe sɛmbɛɛrɛ kee mu pe ŋga, pie pe yii mbe sɛ waŋgra fɔŋgɔ nu.’

12 Jerusalem ŋunu we u tuuro taa patia na mbe yili chia kre na ndram hulo nyjila, pie wee vru mboo kre nu mbe u tro wa mbe yili fimi na. Na u shie we yiɛ tɔ imi kie pe mbe wa na tra nyaa. 13 Na u yili na shie mi e Tafun Nyiɛkpɔɔ wre we u pɛɛri asau ni mbe u yii na ki ni mbe sɛ na u ni Babylon na Chaldean leele tra nu, a wa tra ŋga nu we sɛ tni kre nya nyini ni, a bawa we ku. 14 A u loplombo mblɛ pe u fɛ mu kun pre, na u shiefɛɛnlɛ pre kro mbe pe gbun mbe nyina, mbe pe kɔŋgɔ ni mbe sɛ pe gbo wa.

15 Na ndaa pe gbun mu nyina waŋgrɛ fɔnyi yire nu kre, kre pie chin na mi wi pe Tafun Nyiɛkpɔɔ wre. 16 La, mbe pe chiɛri plɛ ti, mba ti mbe pe ku ŋunɔ, ndee klo, ndee mbe yira pe gbo, imi kie pe mbe pe tni waŋgrɛ nyjɛ nu pe nyi yire nu mbe afunyi kee nyjɛ pe pe yire nya, kre pie chin na mi wi pe Tafun Nyiɛkpɔɔ wre.”

17 O Tafun Nyiɛkpɔɔ wre na paara ni pan mbo, 18 “Ezekiel, lewo pɔ, na mu lii ti mbe fiɛrɛ mu yii, a na mu gboo ta seeri. 19 Yo leele mblɛ pe wa Israel tra nu pre pan na, ‘Kee ŋga o Tafun Nyiɛkpɔɔ Jaŋgafun wre yuu yi kre, nyjila kaa wa na paan na pe lii pie na fiɛ, a na pe gboo lam wa to pe nu. Leele mblɛ pee wa mu tni Jerusalem na Israel tra nu kre, pe pɔɔrɔ kee nyjɛ pe pini kre we ti mbe waŋgra kre ja. 20 Chiɛ nyjɛ na leele nyji mu nɛɛ yire we ja, mbe tra kre sni waara. Kre ee chin na mi wi e Tafun Nyiɛkpɔɔ wre.’”

21 O Tafun Nyiɛkpɔɔ wre na paara ni pan na mbo, 22 “Ezekiel, lewo pɔ, Israel leele yomɛɛlɛ ka gbuun mbo, ‘Pan ble paan na troi, a nde kee nyjɛ kee nyanyofɛɛnlɛ nyaa na yuu na yie pe yire ka na pe.’ 23 Kena yo pe pan na, ‘Kee ŋga mi pe Tafun Nyiɛkpɔɔ wre yuu yi kre, mbe ti mbe kre yomɛɛlɛ kre nyu to, mbe ndro wa kre yomini kre gbun Israel tra nu na.’ Yo pe pan na, ‘Nyjila da mbe kee nyjɛ keenyanyofɛɛnlɛ pre nyaa na yuu yire pe. 24 Leele wa na kafinɛ kee nyaa mbra yuu, ndee mbra chilɛ kee teeri mbra leele fana tra kre nu na. 25 La, mi e Tafun Nyiɛkpɔɔ wre paara pe pan, a kia mu mbe kee ŋga mbe yo kre pe. Ŋgi na hin? Kee ŋga mbe yo yire ndikambla mblɛ nyjila ŋga nu kro, mbe ti yi pe, pan mi e Tafun Nyiɛkpɔɔ wre yo.’”

26 O Tafun Nyiɛkpɔɔ wre na ndru mna yo ni pan mbo, 27 “Ezekiel, lewo pɔ, Israel leele pre yuu na, ‘Mu kee nyjɛ mu nyaa nyiɛlɛ na, na kee nyjɛ mu yuu yire kro, yie mu mbe chiin pe.’ 28 Kena yo pe pan na, ‘Kee ŋga e Tafun Nyiɛkpɔɔ Jaŋgafun wre yuu yi kre, ni kee nyjɛ ni yuu yire ka haa wa mu, kee ŋga mbe yo kpan, kie pe. Pan mi e Tafun Nyiɛkpɔɔ Jaŋgafun wre yo.’”