Kafinɛ Nyiɛkpɔɔ Keenyanyofɛɛnlɛ
13
O Tafun Nyiɛkpɔɔ wre na yo ni pan mbo, 2 “Ezekiel, lewo pɔ, paara mu Israel keenyanyofɛɛnlɛ pre taan, pre pe pe jawala teeri na kee nyaa na yuu. Yo pe pan na kee ŋga mi pe Tafun Nyiɛkpɔɔ wre yuu yi kre. 3 Yire kafinɛ keenyanyofɛɛnlɛ pre, e atɛ, yirɛ titi jaŋga ni e paara, e n na yaka nyaa. 4 Israel leele, pan e keenyanyofɛɛnlɛ pre nyi na ŋmbokuŋmboe wa kajaa na. 5 Mboo ŋga ki juari mu wo kre, e n ki gbeele mu sin, ki tia na o Tafun Nyiɛkpɔɔ ŋunɔ ble kre waa to, yaka n wa mbe e tɔ. 6 Kee nyjɛ pe yo pe nyaa nyiɛlɛ na na yuu yire krɛrɛ pe kafinɛ. Pe yuu mbo, ‘O Tafun Nyiɛkpɔɔ wre paara.’ La, mi ma ni pe tun, a nde pe chaa mbe pe kee nyjɛ pe yuu yire pe yɛŋgɛ. 7 Kee nyjɛ e yo e nyaa nyiɛlɛ na yire, na nyjɛ yi yilii e nyuu yire krɛrɛ pe kafinɛ kee. E yuu na mi ni paara, a nde ni n paara e pan.8 Ki tia kee ŋga mi e Tafun Nyiɛkpɔɔ Jaŋgafun wre yuu yi kre, ‘E kafinɛ kee nyjɛ e nyaa nyiɛlɛ na, na kee nyjɛ e yuu kre ndra na, mbe e ndie tini. Pan mi e Tafun Nyiɛkpɔɔ wre yo. 9 Yire mblɛ chlɛ, na kafinɛ kee nyaa na yuu kre, ni paan e na. Mba ti mbe e pe ni leele na, a pia e mɛɛ nyunɔ mbe chaa Israel leele nu na, a yaa le Israel tra nu na. Kre ee chin na mi wi e Tafun Nyiɛkpɔɔ Jaŋgafun wre.’
10 Pre keenyanyofɛɛnlɛ pre pe ni leele waa na fɔɔn, na yuu pe pan na wejinyiŋgee wa, a nde wejinyiŋge n wa. Pan pe nyi na leele mblɛ pe jawa na pie jaa kaaroo tɛɛ mbe mboo juaraa yurɔ lɛ. 11 Kena yo mblɛ pe kaaroo teeri na mboo juaraa yurɔ kre pan na, mbe ti mbe nyiɛ pan kpɔɔ, mbe nyiɛsubie wo tataara, mbe nyiɛ fuflɛ gbun kpɔɔ mbe mboo kre juari mbe wo. 12 Na mboo kre waa juari mu wo, leele we wie na mni a kaaroo kre n ja mu mboo kre yii hin?
13 Kena kee ŋga o Tafun Nyiɛkpɔɔ Jaŋgafun wre yuu yi kre, ‘Mbe krɔkuɔn sisaa tɛɛ mbe ti fuflɛ kpɔɔ titi gbun, mbe nyiɛ pan kpɔɔ, mbe nyiɛsubie wo tataara mbe mboo kre juari mbe wo.’ 14 Mbe mboo ŋga e fniŋge na kaaroo ni kre juari mbe wo, mbe ki lawee pe mbrɛrɛ, mbe ki nɔɔ kre na nyaa. Na chia kre mboo kre waa juari, kie wo e na mbe e gbo. Kre ee chin na mi wi e Tafun Nyiɛkpɔɔ wre. 15 Mboo kre, na mblɛ pe ki fniŋge na kaaroo ni pre kro we jaŋga ŋga kii wa ni krɔkuɔn nu nya. A mbe yo e pan na, ‘Mboo kre n wa na, a pan chɔɔ leele mblɛ pe ki fniŋge kre n wa na. 16 Pre Israel keenyanyofɛɛnlɛ mblɛ pe Jerusalem kee nyaa nyiɛlɛ na, na yuu na wejinyiŋge wa ki na, a wejinyiŋge n wa ki na pre na ni nyi.’ Pan mi e Tafun Nyiɛkpɔɔ Jaŋgafun wre yo,
17 Ezekiel, lewo pɔ, yiɛ kna mu tɛɛ Israel chiɛlɛ mblɛ pe pre titi jawala teeri na kee nyaa na yuu pre na, mu paara mu pe taan, 18 mu yo pe pan na, Kee ŋga o Tafun Nyiɛkpɔɔ Jaŋgafun wre yuu yi kre, Yire chiɛlɛ mblɛ e dobodobo kɛgbrɛ frai na leni kɛ na, mbe satae titnɔnyi nyini nyini wa ndrɛ na, mbra leele fana mbe pe ta kre, e atɛ. Yire e ni leele pre fana na leni kala nu, na jawa na ee eyɛ ta. 19 E ni mɛɛ gbo ni leele pre nu, shɔlɔ kɛnyini, na paanu knumɛɛ nyjɛ ee ta kre ndra na. E kala fnɛ ni leele mblɛ pe ndie teeri kafinɛ kee na pre pan, mu pe mblɛ pe n fna mbe ku pre gbo, mu mblɛ pe fna mbe ku pre ti.”
20 Ki tia kee ŋga o Tafun Nyiɛkpɔɔ Jaŋgafun wre yuu yi kre mbo, “E kɛgbrɛ yire ni e tɛɛ mu leele pre yii na hanyiɛlɛ e pɛɛri pɛlɛ ni kre kee ni bin. Mbe yi knumu e kɛnyi na mbe wo, a mbe leele mblɛ e yii na yi ni na hanyiɛlɛ lɛ pre, mbe pe shɔ mbe wa. 21 Mbe e satae yire wla mbe wo, mbe ni leele pre shɔ mbe yili e jaŋga jaara. Kre ee chin na mi wi e Tafun Nyiɛkpɔɔ wre. 22 E e kafinɛ kee yire tɛɛ mu frakafɛɛnlɛ sɔɔnrɔ gbo, a pan ma ni chaa mbe ki pe. E yire e kafinɛ kee yire na na sisampefɛɛnlɛ pre leni gbeŋmbaa mbe pia laa pe sisam kro mbe ŋmaa ta. 23 Ki tia yaa e kafinɛ kee yire nya nyiɛlɛ na na, ndee mbe jaa e dobodobo kee yire pe na. A mbe ni leele pre shɔ mbe yili e kɛɛ. Kre ee chin na mi wi e Tafun Nyiɛkpɔɔ wre.”