Nyiɛkpɔɔ Pe Jaari Sɛɛn Sumɛɛ Na
14
Ki ble ka Israel loplombo pre plɛ na pan mu tni ni yiɛ. 2 Ŋga praa wa wa kre, a o Tafun Nyiɛkpɔɔ wre na yo ni pan mbo, 3 “Ezekiel, lewo pɔ, pre leele mblɛ pe tni ŋga sɛɛnlɛ pe sumi, nde pe chin na yie sɛ na pe ni sisam nu kpɔɔ. Kena yira ŋgi kee pe chaa mbe ni yo pe pan hin? 4 Kena yo pe pan na, Kee ŋga pe Tafun Nyiɛkpɔɔ Jaŋgafun wre yuu yi kre mbo, ‘Na Israel leele waa sɛɛnlɛ kori, a yi waa sɛ na pe ni sisam nu, kre kɔkro a pe waa sɛ Nyiɛkpɔɔ keenyanyofun wa pan, mu sɛ na ni wie kee ka kre, mbe ti mbe pe chin sɛɛnlɛ tataara nyjɛ pe sumi. 5 Na pe waa kee ŋga mbe yo pe pan kre loo kre, aada kie ti mbe pe chinɛ mbe laa sɛɛnlɛ yire kro mbe ndru mbe pan mi Nyiɛkpɔɔ pan.’6 Kena Ezekiel, yo Israel leele pre kro pan na kee ŋga mi pe Tafun Nyiɛkpɔɔ wre yuu yi kre, ‘E e jawala chinɛ, e laa e sɛɛnlɛ, na afunyi kee nyjɛ e pini yire kro, e pan ni pan.’
7 Na ki pan na Israel ndro, ndee fuŋu ŋmba u yiri waŋgra ka nu mu pan mu tni Israel tra nu, mu uyɛ kun mu laa ni na, maa sɛɛnlɛ kori, a yi waa sɛ na u ni sisam nu, a ufun wre waa sɛ Nyiɛkpɔɔ keenyanyofun wa pan maa sɛ na ni nyu kee chaa mbe loo kre, mi Nyiɛkpɔɔ titi mbe paara ufun wre pan. 8 A mbe ni nyibie sisaa kna u na, mbe ki ti mblɛ pe yire sisam kee yire pini kre u nya mbe peyɛ jaari, a ufun wre wa pe Israel ndro na. Kre ee chin na mi wi e Tafun Nyiɛkpɔɔ wre.
9 Na pe keenyanyofun wa fana mu tia u kafinɛ kee ka nya mu yo kre, kena mi e Tafun Nyiɛkpɔɔ wre ni tia u kala fnɛ, a mbe u wɔ mbe yili Israel leele pre nu. 10 Na ki pan ma, keenyanyofun wre, na ndro ŋmba we sɛ u pan kala ka na kre kro, mbe pe gbun pimi nunu ni. 11 Na ni pe pe ma kre, kie ti mbe Israel leele pre wa fɛ mbe laa ni na mbe sɛ pe sisam yire tɛɛ mbe peyɛ tɔ nɛɛrɛ ni na. Na pe n peyɛ tɔ nɛɛrɛ ni, kena pie pe ni leele, a mbe pe pe Nyiɛkpɔɔ. Mi e Nyiɛkpɔɔ Jaŋgafun wre ni ki yo.”
Noah, Na Daniel, Na Job
12 O Tafun Nyiɛkpɔɔ wre na paara ni pan mbo, 13 “Ezekiel, lewo pɔ, na ki pan na waŋgra ka leele ni pe sisaa, a pe n kpra wru na ni ni, mbe pe ndie tini, mbe ti klo ki leele na ki yurɛ gbo. 14 A na ki pan na Noah, na Daniel na Job wa mu chaa pe nu kuraa kre, pe frakaa we jaa pre chiin ŋmaa shɔ, la, pia jaa waŋgra kre leele hamblɛ pre ŋmaa shɔ. Mi pe Tafun Nyiɛkpɔɔ Jaŋgafun wre ni ki yo.
15 Ndee na ki pan na ni tia nyaalam yurɛ sisɛɛ le pe nu mu pe gbo pei, a tra kre tni waara, a tra kre troo pe fiɛrɛ ni kre, 16 kpra na, mi pe Tafun Nyiɛkpɔɔ Jaŋgafun wre yiɛ ŋga na, na pre bilɛ taarɛ mblɛ wa wa kre, pre we ŋmaa ta, la, pia jaa pre titi biile pre ŋmaashɔ, a mbe ti mbe tra kre sni waara.
17 Ndee na ki pan na ni tia ŋunɔ to waŋgra ka nu, mu tia pe ki leele na ki yurɛ gbo pei kre, 18 ŋga mi pe Tafun Nyiɛkpɔɔ wre wa ŋga, hali na pre bilɛ taarɛ mblɛ wa tra kre nu kuraa kre, pre titi we peyɛ ndra ta, la, pia jaa pe biile pre ŋmaa shɔ.
19 Ndee na ki pan na krɔ ni kun na waŋgra ka leele ni, a ni tia yira sisaa le pe nu, mu ki leele na pe yurɛ kro gbo kre, 20 ŋga mi pe Tafun Nyiɛkpɔɔ Jaŋgafun wre wa ŋga, hali na Noah, na Daniel, na Job wa pe nu kre, pre chiin we yire pe frakaa na mbe peyɛ ndra ta, la, pia jaa pe biile pre ŋmaa shɔ.
21 Kee ŋga mi pe Tafun Nyiɛkpɔɔ Jaŋgafun wre yuu yi kre, mbe ŋunɔ, na klo, na yurɛ sisɛɛ, na yira sisaa tɛɛ mbe Jerusalem ndie tini, mbe ki leele, na ki yurɛ kro gbo. 22 Ezekiel, lewo pɔ, mbe ti pe plɛ na pe biile kro, a pie pe wɔ mbe yili tra kre nu. Pie pan mu pan, na maa pe kepele nya, kre mu chin na pe sisam kra tia ndaa yire kee nyjɛ krɛrɛ pe pe na Jerusalem na. 23 A mu chin na, mi pe Tafun Nyiɛkpɔɔ wre fna mbe yire kee yire pe pe na.”