2 Kre nyjila kre nu, na nii wa na fooro lii na nyɛni ma kranu taarɛ. 3 Ni nsra sro chichie ka li, a ni nsra kaara ka, ndee mu simi gbɔ, a ni nsra niyɛ gbeele kolo ka na mna sɛ su na kranu taarɛ yire na tro.

4 Kre yɛlɛ kre nyiɛpɔ ŋga ki yiɛklu kre ble fulo na jijirɛ wo na, na nii wa mu yire lɔɔ kpɔɔ Tigris mbɛɛ na. 5 Bawa ndaa yiɛ yire mna nya na ndro wa yirɛ finyi prupru le, mu swanyiɛ titi greree pɔ. 6 U wejiŋge naa chiɛnri na swanyiɛ jlɔnyi yi. U yiɛ na fniŋge na chiɛnri na nyiɛ ki nyini, a u nyiɛlɛ naa nyini na kanhun yi. U jeelee na u kɛnyi naa chiɛnri na pe swanyiɛfre le kanhun nu mu ki je, a u mana naa tini na lenɛɛmu fni na paara pe yɛ yɛ.

7 Mi Daniel nunu ndaa kre kee ŋga nya nyiɛlɛ na. Leele mblɛ mi na pre naa wa wa kre nsra ki nya, la fiɛrɛ na pe yii kpɔɔ, a pra fɛ mu sɛ ndra. 8 Mi nunu ndaa kro wa na kawako kee nyjɛ ndaa nya nyiɛlɛ na yire le. Ndaa pe fɔnkɔm ni yɛ nu, a ni yiɛ na chinɛ mna pe fwaa, a ni nsra ja mbe yaka pe. 9 Ŋga ndaa u mana loo kre, ndaa to mu yiɛ juule tra mna jire.

10 A kɛ ka na pan mu ni yire, a ndaa kɛnyi na kosie kan na seeri. 11 Bawa nyjeeri bituŋu wre na yo ni pan mbo, “Daniel, Nyiɛkpɔɔ mu kori. Yiri mu yire mu kee ŋga mbe yo ŋga loo chiriri. Ŋu pan pe ni tun kre.” Ŋga wra yo ma kre, ndaa yiri mu yire, a na nii wa na seeri tɛ.

12 A wra yo mbo, “Daniel, maa fiɛ, Nyiɛkpɔɔ mu nyiɛtalaa loo, mu yire ki ble ŋga mna mu yɛ nyjii, imi kie pe mbe u mu ŋga kee nɔɔloo ŋumu kre. Ki tia mu nyiɛtalaa kre nyu wɔɔ ni ni pan kre. 13 Persia ŋunumu bituŋu wa ni tɔ kolo ble fulo na nunu. A Michael, nyjeeri bitumblɔ loplombo pre wa na pan mu ni shɔ Persia tra kre ŋunu wre kɛɛ, ŋgi na hin? Wre wra ni yii mu tɛɛ. 14 Ni pan mbe mu nyina kee nyjɛ yie pan mu leele pre na mbakɔ, kee nyjɛ mna nya nyiɛlɛ na yire nyjilaa wa yiɛ mbe pan.”

15 Ŋga wra kee ŋga yo ma kre, a ndaa ndra soo tra, na mba jaa paara. 16 Na mu nyjeeri bituŋu wre nya to, pan wra pe na lewo wi, a wra kɛ tini mna pan mu taa ni nyu na. A ndaa yo, “Ni tafun, kee ŋga ni nya kre tia ni pe sɔplɛ, a nii wa na seeri. 17 Pan ni nyi na sumifun ŋmba uu wa mu yire u tafun yiɛ na wi, kena mni mbe pee paara na mu ni hin? Na kree ŋga ni faŋga kɔ ni nu, a ndaa ŋuni na kloi.”

18 Bawa wra ndru mna kɛ taa ni na na, a ndaa faŋga ta. 19 A wra yo mbo, “Nyiɛkpɔɔ mu kori, kena maa ti mbe fiɛrɛ mu yii, ti mbe gbun nyii mu na, mu faŋga ta.”

Ŋga wra yo ma mu kɔ kre, faŋga fɔŋgɔ na le ni nu mu ya, a ndaa yo, “Ni tafun, paara ni pan, fuŋga rɛ, mu tia ni faŋga ta.”

20 Nyjeeri bituŋu wre na yo mbo, “Mu chin ŋga ki tia ni pan mu paan? Mbe ndru mbe sɛ wi na ŋumu ŋmba u Persia le wre ni, a kre kɔkro ni na, mbe ndru mbe sɛ wi ŋmba u Greek ŋunumu le wre ni na. 21 La, ki fna mbe ni mu nyina kee nyjɛ pe nyunɔ Kpra Hlɛ kre nu kre mbe chiin sɛ, ni wiire ŋga ni shie sɛ wi kre, ndro n wa mbe ya ni na, na Michael, Nyjeeri bituŋu ŋmba u Israel leele le kre bɔkɔ.”