Daniel Nyiɛtali Mu U Leele Ŋga
9
Ahasuerus pɔ na wi Darius, a wra pe Mede wo mna ŋunumu li Babylon na. 2 Ŋga wra ŋunumu li kre, yɛlɛ ŋga kra yiɛ klu kre nu, mi Daniel ndaa wa na Hlɛ Cheche yire tuan, na yɛlɛ fuloe taarɛ na kɛ nyjɛ nu Jerusalem we kla mbe kro ma mbe ndro wa pe ki na kre kee jawa, imi na o Tafun Nyiɛkpɔɔ wre na ki yo u keenyanyofun Jeremiah pan kre. 3 A ndaa blefun, mna nyiɛtali nyibinyiɛ ni, mna kumu yoŋgo tɔ, mna tni tɔɔnrɔ nu, na fooro lii.4 Ndaa ni Tafun Nyiɛkpɔɔ wre tali, mna ni leele pre sisam yo u pan. Ndaa yo na,
“O Tafun Nyiɛkpɔɔ, mu kpɔɔ, a o mu fiɛ na mu kaan buuro kpɔɔ. Mu pe kprafun mu mu nyu nunu ŋga mu pe kre ŋga, a mu mu koroo woni na mblɛ pe mu kori na lii mu nyu kee na kre nyina. 5 O sisaa pe kpɔɔ, mu keesɛɛ pe, mu punu mu na. O yiri mu mu taan, mu laa kefrakaa ŋga mu o nyina kre na. 6 O nsra ndie tɛɛ mu sumifɛɛnlɛ, mblɛ na lɛ mu keenyanyofɛɛnlɛ a praa paara o ŋulo, na o lefɛɛnlɛ, na o tolɛɛlɛ, na leele pre kro pan mu mɛɛ nu kre pan.
7 Ŋu Nyiɛkpɔɔ, mu ŋga ki fraka pini nyjila kro nu, la wre rɛ, yɛkuuro kee o pini nyjila kro nu. Kre kee ŋga pe kpra mu wru wre mblɛ oo wa Judah tra nu, na Jerusalem, na Israel leele mblɛ mna tia pra nyina mu sɛ waŋgrɛ nyjɛ yi mbra o na, na nyjɛ yii wa haalee na, ŋga pe nsraa kpra lii na mu ni kre ndra na. 8 O Ŋulo, na o lefɛɛnlɛ, na o tolɛɛlɛ na yɛkuuro kee, na sisaa pe mna ŋu Nyiɛkpɔɔ taan. 9 Yɛŋgɛ yi na mu pe foorochinfun na sisam tinkɛfun, ande o yiri mu mu taan. 10 O Tafun Nyiɛkpɔɔ, o n na ndie tɛɛ mu pan, a o n na li mu mbra nyjɛ mu sumifɛɛnlɛ, mblɛ na lɛ mu keenyanyofɛɛnlɛ pre na. 11 Israel leele kro na mu mbra yire kla, mu yi je. O na sisaa pe mu na, a ki tia mna tia suŋgɔ nyjɛ yii wa mu sumifun Moses mbra yire nu kre na o yii. 12 Kee ŋga mna yo mu pe, wre na o lefɛɛnlɛ pre na kre, kre mna pe kre. Mna Jerusalem leele ndie tini kpɔɔ mu wɛ kakpɔɛ nyjɛ yii wa tra na kro na. 13 A ndie tiniɛ nyjɛ yii wa Moses mbra yire nu kre, ka n o wa mu la. O Tafun Nyiɛkpɔɔ, hali mu pan mu su aŋga, o n yaka pe a ki mu yiɛ nyi mbe ki nyina na o laa o sisam kro mbe taa mu kekpra kre na. 14 O Tafun Nyiɛkpɔɔ, mnaa chaa mbe o kala nya, a mna ki pe ma. Ŋgi na hin? Ŋu mu kefrakaa pini nyjila kro nu, la, o je a o n ndie tɛɛ mu pan.
15 O Tafun Nyiɛkpɔɔ, fa kre mna mu jaŋga kpɔɔ kre tɛɛ mna mu leele wɔ Egypt tra nu, a oo wa na ki sɔɔnri tɛ, a nde o je mu sisam pe, mu punu mu na. 16 Mu da mu o shɔ fa, kena maa ti mbe mu krɔkun na mu kakpɔɔ Jerusalem ŋga kii wa mu Nyua Cheche kre na kre ni. Leele mblɛ pee wa waŋgrɛ nyjɛ yi mbra o na kre kro n Jerusalem le mu nya, a pan chɔɔ pe n mu leele pre le mu nya, o sisam, na keesɛɛ nyjɛ o tolɛɛlɛ na pe kre na.
17 Nyiɛkpɔɔ! Jande ni nyiɛtalaa, na kee ŋga ni waa mu yiɛ ŋga loo ni pan. Mu Suminyuŋgo ŋga ki juari ŋga fooro le, mu ki yire mu yire na, mbe ndro kro chin na ŋu wi Nyiɛkpɔɔ yɛŋgɛ. 18 Nyiɛkpɔɔ! Ndie tɛɛ mu loo o pan, kna mu o le, mu le tɔɔra ŋga nu o nyi, na kanyana ŋga nu kakpɔɔ ŋga na mu mɛɛ taa kre nyaa. Chichie ka ma o pe a ki tia o na mu tali, la, ŋga mu pe foorochinfun kre ki tia. 19 O Tafun! Ndie tɛɛ o pan. O Tafun! O sisam ti mu o kɛ. O Tafun! Ndie tɛɛ mu loo o pan. Yiri mu kala ka pe ɛ, mbe ndro kro chin na ŋu wi Nyiɛkpɔɔ. Jande, maa ti mbe ki mu kuraa! Ŋgi na hin? Kakpɔɔ ŋga na ki leele kro, mu wolo lɛ.”
Gabriel Na Kee Yire Nɔɔ Nyina
20 Ŋga ndaa wa na nyiɛtali na ni sisam, na ni leele Israel leele pre sisam tali o Tafun, ni Nyiɛkpɔɔ wre pan mbe u Suminyuŋgo kre sin na kre. 21 Ŋga ndaa nyiɛtali kre, Gabriel ŋmba ndaa nya ŋunɛ nu jle kre, na yiri mu pan mna ni nyi. Kre nyjila kre, na yilakɔŋgɔ sra wɔ nyjila yi. 22 A wra yo mbo, “Daniel, ni pan mbe mu nyina kee nyjɛ mna nya nyiɛlɛ na yire nɔɔ. 23 Nyjila ŋga mna nɔɔhle na Nyiɛkpɔɔ tali kre, wra shɔ mu pan. U mu kori, ki tia ni pan mbe yi nɔɔ nyina mu pan. Kena ndie tɛɛ mbe ni mu nyina yi nɔɔ. 24 Yɛlɛ lafɛɛ jijirɛ, na fuloe jijirɛ na kɛ Nyiɛkpɔɔ tɛɛ mbe ti mu leele pre peyɛ ta, mbe e Kakpɔɔ cheche kre wɔ sisam, na kefuɛn nu. We e sisam ti mbe e kɛ, mbe kpra lie ŋga ki n nyukɔɔrɔ ni pan kre nyjila kre nu, mbe ki ti mu ŋunɛ yire, na wɔnyinakee yire pe kpra. A pie ndru mbe Suminyuŋgo cheche kre wruu le Nyiɛkpɔɔ kɛɛ na.
25 Kee ŋga dɔɔta mu ki nɔɔloo. Mu yire nyjila ŋga nu pe yo pe Jerusalem sin na, mbe Nyiɛkpɔɔ yɛklo ŋmba u wɔ wre chin mbe pan kre, yɛlɛ fuloe shiin na kɔɔnanyjirɛ we tro. Kre nyjila kre nu pie ndru mbe Jerusalem sin na, mbe ki lete yire gbeele, mbe mboo sin mbe ki fɛɛ kun, mbe ki yire yɛlɛ lafɛɛ jijirɛ na fulo na kɛmbɔjijirɛ, la, kre nyjila kre we pe nyjila ŋga ki sheli. 26 Yɛlɛ lafɛɛ jijirɛ na fulo na kɛmbɔjijirɛ yire nyu to haa kre, pie Nyiɛkpɔɔ yɛklo ŋmba u wɔ wre gbo finfin. Ŋunu faŋgafun wa na u ŋunɔwifɛɛnlɛ we paan kakpɔɔ kre, na ki Suminyuŋgo kre tɔ mbe ki kla. Imi na lɔɔ nyini mbe fo mbe ndoo kla kre, pan ki kla nyjila kre we pe, a ŋunɔ na lawee kla kee ŋga Nyiɛkpɔɔ yo mu tɛɛ kre we pe ma. 27 Kre ŋunu wre we nyu nunu ŋga ki sheli pe na lenɛɛrɛ ni yɛlɛ kɔɔnashin. A na yire yɛlɛ yire waa yɔ, we sra wɔɔ na yirɛ nyjɛ pe kee Suminyuŋgo yire tɔ kolo. A we ti pe afuŋgo kee ŋga ki lawee jee kre nya Suminyuŋgo wa, mbe sɛ su na ŋmba u tia afuŋgo kee kre na pini wa kre, Nyiɛkpɔɔ we u kla.”