Daniel Yirɛ Nya Nyiɛlɛ Na Mna Mbaplɔ Na Kaplɔ Nya
8
Ŋga Ŋunu Belshazzar na jɔɔn li ki yɛlɛ taarɛwo na kre, ndaa kee nya nyiɛlɛ na shiinwo na. 2 Ŋga ndaa nya yi na nii wa kakpɔɔ ŋga pra mboo sin mu fɛ mu kun, a pra ki yeeri Susa, a kra wa Elam tra nu kre na. Kre nyjila kre na nii wa mu yire lɔɔ ŋga pe yeeri Ulai kre mɛɛ na, 3 a ndaa yiɛ yire mna mbaplɔ wa nya na uu nyamblɛ gedenyi shiin ni, a nyamblɛ yire nunu na pe fɔŋgɔ mu gede mu wɛ nunu na. 4 Ndaa yire na mbaplɔ wre le a wraa yurɛ sini na shie yila tohaa, na nyjeeri haa, na tapan haa. A yurɔ wa nsra wa mbe jaa u tɔ kolo ndee mbe jaa fɛɛ shɔ u jaŋga kɛɛ. Kee ŋga u chaa wraa pini, a ka na ya u jaŋga kre na.5 Ŋga ndaa kawa kre kee ŋga ni kre, ndaa nya na kaplɔ wa yiri yila tohaa tafɛŋgɛ ni, imi na wraa feni nyaanyaa kre, na tia u jele nsraa dani tra. Nyambɛ badaaŋga ka naa wa u nyiɛlɛ shiin yire lalaa. 6 A wra yiɛ kan mbaplɔ ŋmba ndaa nya lɔɔ kre mbɛɛ na wre na, mna sɛ u fa na u faŋga kro ni. 7 Ndaa nya na u wii mbaplɔ wre ni, a imi na u krɔ na kun mu tro kre, wra u sin mu u nyamblɛ shiin yire kuari. Mbaplɔ wre nsraa faŋga ni mbe jaa yire u yiɛ. A wra u ŋunɔ mu wa tra gbɔfu, mnaa u taanla, a ndro nsraa wa mbe u shɔ.
8 Kaplɔ wre na uyɛ kpɔɔ mu tro. La, ŋga wra jaŋga ta kpɔɔ mu ya kre, u nyambɛ kre na ka. A nyamblɛ fɔnyi nyjɛ yira sheli jijirɛ na fin fin ki titɛɛ. Nunu na yiɛ tɛɛ nyjeeri haa, a nunu na yiɛ tɛɛ yila fin haa, a nunu na yiɛ tɛɛ tapan haa, a nunu na yiɛ tɛɛ yila tohaa. 9 Nyambɛ fiɛn ka na fin mu yili yire nyamblɛ jijirɛ nyjɛ ka nu, a ki jaŋga na sɛ su tapan haa, na yila fin haa, mna sɛ su tra ŋga Nyiɛkpɔɔ na nyu yo mna Israel leele ŋga ki yi kre na. 10 Kre nyambɛ ŋga na faŋga ta mna sɛ nyjeeri mna wɔɛlɛɛ knumu mu wa tra, mna yi taanla. 11 Kra sɛ nyjeeri wifɛɛnlɛ lopom wre nyu kaanri, mna sɛ blenyini sra nyjɛ praa woni na Nyiɛkpɔɔ kaan kre tɔ kolo, mna Suminyuŋgo kre tɔ na nɛɛrɛ ni. 12 Leele nsraa blenyini sra woni wa na, na sisam pee bɔkɔ, a pra kpra sumiɛ kolo kre wa. A kee ŋga nyambɛ kre naa chaa mbe pe kpan kra ja mu ki pe.
13 Bawa ndaa nyjeeri bitumblɔ pre wa loo na u u ŋmbrɔ wie mbo, “Nyjila ŋgi nu yire kee nyjɛ nyu we to hin? Nyjila ŋgi nu sisam ŋga nyini we tni blenyini sra wɔɔ yire titɛɛ mbe sɛ su hin? A nyjila ŋgi pie nyjeeri wifɛɛnlɛ pre, na Suminyuŋgo kre taanla mbe sɛ su hin?”
14 Bawa nyjeeri bituŋu nunu wre na kna mbo, “Kee nyjɛ mu nya ŋga we kro ma mbe sɛ su ble kagbeŋge na lafaa na fuloe shiin na kɛ nyu na, a yire ble yire nu bnimi na lafo sra wɔɔ yire krɛrɛ ka wa na pini. Na kre nyjila kre waa tro pie ndru mbra sra yire woni Suminyuŋgo wa na.”
Daniel Naa Kee Yire Nɔɔ Chaa Mbe Chin
15 Ŋga ndaa chaa mbe yirɛ nyjɛ ni nya nyiɛlɛ na yire nɔɔloo kre, titɛɛ kre nu to, ndaa ndro nya na uu wa mu yire ni yiɛ. 16 A ndaa lewo mana loo Ulai lɔɔ kre mbɛɛ na, a kra yo mbo, “Gabriel, u nyina yire nyjɛ u nya nyiɛlɛ na yire nɔɔ.” 17 Bawa Gabriel na pan mu yire ni mɛɛ na, a fiɛrɛ na ni yii kpɔɔ, a ndaa yiɛ juule tra!
A wra yo ni pan mbo, “Lewo na nyjuro wi ŋu, ande ki shian na mu yirɛ nyjɛ mu nya nyiɛlɛ na yire nɔɔ chin. Waŋgra nyukɔɔrɔ kee mu nya kre.” 18 Ŋga wraa paara ni pan kre, ndaa foli mu to tra mu jre. La, wra ni yire sholo, 19 mna yo mbo, “Imi na Nyiɛkpɔɔ krɔkuɔn we pe ni mu nyina kre. Kee nyjɛ mna nya nyiɛlɛ na kre, nyjila ŋga Nyiɛkpɔɔ wɔ mu tɛɛ mbe ti yira kro nyu to ni mu nyina.
20 Mbaplɔ nyamblɛ shiin fun ŋmba mu nya kre yire mu Mede na Persia ŋunumu ŋga. 21 Kaplɔ wre yire mu Greek ŋunumu ŋga, a nyambɛ badaaŋga ŋga kii wa u nyiɛlɛ lalaa kre wi ŋunu ŋmba u yiɛ klu. 22 A ŋga nyambɛ jle wo kre na ka kre, jijirɛ nyjɛ yira fin yire yire wa mu imi na pie tra kre ŋunumu yɔɔlɛ jijirɛ ŋga, a yia faŋga ta na jle wo kre yi.
23 Na yire ŋunumu nyjɛ paan mbe to kre, pe ŋulo pre ndra we sheli titi, kre nyjila kre ŋunu ŋmba ndie ki kan we yiri, a we u kachindɛ tɛɛ mbe leele fana. 24 We faŋga ta titi, ande wre titi jaŋga ni ma. A we yirɛ kla titi mbe ki leele fo, a kee ŋga u chaa mbe pe kpan, we jaa ki pe. We mblɛ pee jaŋga ni, na Nyiɛkpɔɔ wre titi leele pre kla. 25 We leele fana mbe yire ki na mbe uyɛ ta, a we uyɛ jawa na u wɛ ndro kro na, a we uyɛ kpɔɔ, mbe yire ki na mbe lenɛɛrɛ kla nyjila ŋga pe n na kra nu. Hali we yiri mbe Nyiɛkpɔɔ ŋulo kro Ŋunu wre taan, a kre nyjila kre nu we u kla. 26 Bnimi, na yilakɔŋgɔ sra wɔɔ nyjɛ mu nya nyiɛlɛ na, a ni mu nyina yi nɔɔ kre, yie pan ma yɛŋgɛ. La, ti mbe ki kro ŋu nunu chom ndra. Ŋgi na hin? Kie mu mbe kre kee ŋga chiin pe.”
27 Ŋga ndaa kee nyjɛ nya ma mu kɔ kre, wejiŋge na juari ni na, a ndaa yaa ble chiɛri. A ndaa chin mu yiri mna sɛ na ni tnumu kre tuni ŋunu katoo wa. Yire nyjɛ naa nya nyiɛlɛ na kre na ni jawala tɔɔra kpɔɔ, a ni nsra yi nɔɔloo.