4 Jle wo wre na pe na jira wi, a wraa wa kuɛn ni na nyuu wi. Ŋga ndaa yire na u le kre, ndaa nya na u kuɛn yire wla mu laa u na, a wra yiri mu fraka na ndro wi, mna ndro jawala le.

5 Yurɔ shiin wo wre na pe na sisire kpɔɔ wi, a wra yiri mu yire u jeelee kro wee na. A babaari kajle taarɛ naa wa mu paari u nyu na, a mana ka na yo u pan mbo, “Yiɛ nyina, ta kaa imi na mu ja!”

6 Ŋga ndaa wa mu yire na le kre, yurɔ wa na yili na. Wre na pe na kajinyurɔ wi, a wraa wa kuɛn jijirɛ ni u kukrɔ na na hanyini wi, a u ndrɛ naa jijirɛ. A wra jaŋga kpɔɔ ta.

7 Ŋga ndaa wa mu yire na le kre, yurɔ jijirɛ wo na yili. A wre naa faŋga ni titi, mu pe fiɛrɛ ni, mu na ndro piɛri. A u ŋgaala na pe tɔɔnrɔ ŋgaala mna kpɔɔ kpɔɔ, a yire ni wraa yira ŋga we ta kro kaa, a nyjɛ yie kro kpan mbe u yi taanla. Wre nsra pe na yurɛ jle wolo pre lɛ, nyamblɛ kɛ naa wa u pan.

8 Ŋga ndaa yire na u nyamblɛ le kre, nyambɛ fiɛn ka na fin mu yili nyjɛ yire nu na. Nyambɛ fiɛn kre na nyjɛ yiraa wa wa fa yire taarɛ klɔ yi titɛɛ. Kre nyambɛ ŋga naa wa na ndro nyiɛlɛ ni, a kraa nyu ni, na yɛkpɔɔmu kee bribri yuu.

9 Ŋga ndaa wa mu yire na le kre,

11 Na nii wa mu yire na le tɛ, mna loo na nyambɛ fiɛn kre wa na nyukpɔɔmu kee yuu na ki yɛ kpɔɔri tɛ. Ndaa wa mu yire na le tɛ, mna sɛ su nyjila ŋga nu pra yurɔ jijirɛwo wre gbo, mna u bali mu wa kanhun kre nu, a wraa shio. 12 Pra yurɛ pre hamblɛ pre jaŋga shɔ pe pan, la, pra pe ŋga nyjila ka mbe pe tɛɛ tni chiɛri.

13 Yire yirɛ nyjɛ ndaa nya ki ble kre blee kre, ndaa lewo wa nya na Lewo Pɔ wre wi. A tloe na fɛ mu u kun, a pra sɛ na u ni ŋmba uu wa nyjila kro nu wre yiɛ, mna sɛ u wɔ mu u nyina. 14 A pra u pe ŋunu, mna u ŋga jaŋga, na yɛnyiŋge, imi kie pe mbe leele mblɛ pee wa waŋgrɛ nyjɛ nu kro, na yolo nyininyini yofɛɛnlɛ kro leele u sumi. U ŋunumu, na u jaŋga nyu wa to fio.

15 Yirɛ nyjɛ ndaa nya nyiɛlɛ na yire na ni yii fiɛrɛ, ki tia ni lamu nsra to ni na. 16 A ndaa sɛ leele mblɛ praa wa mu yire wa pre wa wie kee nyjɛ kro nɔɔ.

Ki tia wra ni nyina yi nɔɔ. 17 Wra yo mbo, “Yurɛ kpɔɛ jijirɛ mblɛ mu nya kre yire mu ŋunumulie kpɔɛ jijirɛ nyjɛ yie yiri tra ŋga nu yire ŋga. 18 La, Nyiɛkpɔɔ Jaŋgafun wre leele mblɛ u wɔ pre, we pe ŋga u ŋunumu kre, mbe ki pe pe nyjila kro nu.”

19 A ndaa chaa mbe yurɔ jijirɛwo ŋmba wra yili u yɛ kre kee chin kpɔɔ. Wre wra pe fiɛrɛ ni kpɔɔ, mnaa u swanyiɛfre kajinyi, na u tɔɔnrɔ ŋgaala teeri na yira ŋga we ta wla na kaa, na yi hɛnyi taanla. 20 A ndaa chaa mbe nyamblɛ kɛ nyjɛ u ndra na, na nyambɛ ŋga kra kɔ mu fin yi lalaa, mna tia nyamblɛ yire taarɛ na klɔ mu to yire kee chin kpɔɔ. Kre nyambɛ ŋga kraa wa nyiɛlɛ, na nyu ni, mnaa nyukpɔɔmu kee bribri yuu kre, a ki kee naa fiɛrɛ ni mu wɛ hɛnyi yire na kre. 21 Ŋga ndaa yire na le kre, nyambɛ kre na ŋunɔ kun na Nyiɛkpɔɔ leele ni mna pe ja. 22 A ŋmba uu wa nyjila kro nu kre na pan mna kpra kun mna Nyiɛkpɔɔ Jaŋgafun wre leele mblɛ u wɔ pre ŋga tamu. Ŋgi na hin? Na nyjila kre da mbe u u leele pre ŋga u ŋunumu kre jaŋga.

23 A imi na wra ni nyina kee nyjɛ nɔɔ yi kre mbo, “Yurɔ jijirɛ wo wre wi ŋunumu jijirɛ wo ŋga kie yiri tra ŋga na, a kie yili kiyɛ na ŋunumu hɛnyi yire ni, a kie tra ŋga kro taanla, mbe ki juari. 24 A nyamblɛ kɛ yire yire mu ŋulo kɛ mblɛ pie na kre ŋunumulie kre le. A ŋunu fɔŋgɔ wa we yiri mbe yili u yɛ na mblɛ pe klu mu pan kre ni kuraa, a we ŋulo taarɛ kɔ pe juɛn na. 25 We paara mbe Nyiɛkpɔɔ Jaŋgafun wre taan, mbe Nyiɛkpɔɔ leele fiŋge. A we gbeŋmba na we Nyiɛkpɔɔ mbra yire, na u leele pre ble lie yire chinɛ. A we jaŋga ta Nyiɛkpɔɔ leele na yɛlɛ taarɛ na yɔɔ.

26 A Nyiɛkpɔɔ we u kala li mbe u gbun pimi ni, mbe u jaŋga kre shɔ u pan, mbe u kla peii. 27 A Nyiɛkpɔɔ Jaŋgafu wre we waŋgra ŋga ŋulo pre kpɔɔmu na pe jaŋga kro shɔ mbe le u leele mblɛ u wɔ pre kɛɛ. A pe ŋunumu jaŋga kre wa pe nyukɔɔrɔ ni, a waŋgra ŋga ŋulo kro we pe sumi mbe li pe kee na.”

28 Yirɛ nyjɛ ndaa nya nyiɛlɛ na yire nyu tohaa yi kre. Fiɛrɛ na ni yii titi, a ndaa fniŋge fwaa, a ni nsra ki bɔ ndro pan.