Pe Daniel Wa Jirae Wee Nu
6
Darius na u jawala pe na we loplombo lafaa na fulo wɔ mbe pe yire ŋunu jeelee na mbe pra tra kre le. 2 Wra Daniel wɔ mu ya leele shiin plɛ na mbe pra loplombo pre le, mbe pra kee ŋga ŋunu chaa pini. 3 Ki nsra mu, a Daniel tnumu ŋga wra tun na ŋunu wre yiɛ nyi mu wɛ leele shiin pre na, kra tia ŋunu wre na u jawala pe na we ti u pe waŋgra kre kro lopom. 4 A loplombo mblɛ pra yire ŋunu jeelee na pre, na loplombo shiin mblɛ praa pe le pre na nyu nunu pe mnaa kolo ka chaa mbe yo na Daniel n na tnumu chiriri tuni. La, pe nsra kee sisaa ka ta mbe baa u na. Ŋgi na hin? Wra pe danknafun, na kprafun, a tnumu ŋga ki fna wraa tuni. 5 A pra yo mbo, “Fuŋgaami, waa kee ka ta mbe baa Daniel na, fɔna o tro na u ni u sumi haa bɔkɔ.”6 A pe kro na sɛ ŋunu wre pan mna sɛ yo mbo, “Tolɛɛ, Nyiɛkpɔɔ u mu ndra tun tɔɔnrɔ. 7 Wre mu loplombo mblɛ o mu waŋgra ŋga pre kro, na mu paaranyinafɛɛnlɛ pre kro nyu pe nunu na mu tali mbe mu mbra ka le, mbe ti ki tnumu tun, na ble nununu fulo na kɛ ndro n fna mbe nyiɛtali sɛɛn, ndee ndro wa mɛɛ ni, fɔna ŋu ŋunu chiin pan bɔkɔ. Ndro ŋmba we to kre mbra ŋga nu kre fna pe u wa jirae wee nu. 8 Tolɛɛ, mbra kre le, mu ti mbe pe ki nyunɔ, mbe mu mu mɛɛ le ki jaara, mbe ki tnumu tun, mbe ki pe Mede na Persia kro mbra ŋga ndro wa jaa chinɛ.” 9 A Ŋunu Darius na mbra kre le, mna tia pra ki nyunɔ a wra u mɛɛ le ki jaara.
10 Ŋga Daniel na loo na ŋunu wre u mɛɛ le mbra kre jaara kre, wra sɛ katoo. Bawa wra nduu mna sɛ nyjeeri nyuŋgo ka nu. A imi wraa nyiɛtali gbee taarɛ nyjila kro nu ble nunu kre, wra sɛ suulo tokroe nyjɛ yira yiɛ kan Jerusalem na yire ka nu, mnaa nyiɛtali mbe Nyiɛkpɔɔ ya u na.
11 Ŋga loplombo mblɛ pra sɛ ŋunu pan kre na nya na Daniel nyiɛtali mbe Nyiɛkpɔɔ ya u na kre, 12 a pe kro na taa pe yɛ na, mna sɛ ŋunu wre pan mna sɛ yo mbo, “Tolɛɛ, ŋu ma mu mbra le na mna ble fulo na kɛ, ndro wa n fna mbe nyiɛtali sɛɛ ndee ndro wa mɛɛ ni, fɔna ŋu chiin mɛɛ ni bɔkɔ, a na wa kre mbra ŋga taan, ki fna pe u wa jirae wee kree?”
A ŋunu wre na yo mbo, “Ɛnhɛɛn, mbra ŋga ni le yi, Mede, na Persia kro pan ni ki le, a kia jaa chinɛ na.”
13 A pra yo ŋunu wre pan mbo, “Daniel, Judae leele mblɛ pra yii mu pan mna kre wa, u n mu jaŋga kre le mu nya, a u n na lii mbra ŋga mu le kre na. U nyiɛtali nyjila kro nu gbee taarɛ ble nunu.”
14 Ŋga ŋunu wre na kre kee ŋga loo kre, kra u tɔɔra kpɔɔ, a wraa kolo chaa mbe Daniel shɔ mbe wa, mna ki jawa chiin a yila na pan mu to.
15 A loplombo pre kro na taa peyɛ na mna ndru mu sɛ yo ŋunu pan mbo, “Tolɛɛ, sɔɔnri na na mu mbra le Mede na Persia pan kre, mbra ka n wa mbe jaa ki kna fio.”
16 Ŋga kra pan ma kre, ŋunu wre na tia pra Daniel yii mna sɛ wa jirae wee kre nu. Bawa wra yo Daniel pan mbo, “Mu Nyiɛkpɔɔ ŋmba mu sumi nyjila kro nu kre u mu shɔ.” 17 A pra dnɛ tɛɛ mu wee kre nyu tɔ, a ŋunu wre na u loplombo pre na pe feelee nyjɛ ni pe yirɛ tnɔ yi wɔ mu ki nyu yii, imi kie pe mbe ndro wa jaa Daniel wɔ. 18 A ŋunu wre na ndru mu sɛ u katoo, ki ble kre u n na li, a u nsra tia ndro na pan mu yɛshɔɔrɔ kee ka pe u lawee, a u nsra ja mu ŋunu.
19 Ŋga nyiŋge na se bnimi pupu, a ŋunu wre na gbolo mu yiri nyaanyaa mna sɛ jirae wee kre lawee. 20 Ŋga wra da wa kre, a wra Daniel yeeri fooro ni mbo, “Daniel, Nyiɛkpɔɔ ŋmba uu ŋmaa ni wre sumifun, mu Nyiɛkpɔɔ ŋmba mu sumi nyjila kro nu wre, u ja mu mu shɔ jirae pre kɛɛ ree?”
21 A Daniel na kna mbo, “Tolɛɛ, Nyiɛkpɔɔ u mu ndra tun tɔɔnrɔ. 22 Ni Nyiɛkpɔɔ na u bituŋu tun, a wra pan mu jirae pre nyu tɔ tɔ, a pe n ja mu ni pe yaka. Ŋgi na hin? Nyiɛkpɔɔ chin na ni n pimi li u yiɛ, a ni n sisaa ka pe mu na.”
23 Ŋga ŋunu wre na kee kre loo ma kre, u yiɛ na shɔ kpɔɔ, a wra yo pe sɛ Daniel wɔ mbe yili jirae wee kre nu. Ki tia pra sɛ u tini mu wɔ jirae wee kre nu, mna nya na yaka n tɔ mu laa u na kuraa. Ŋgi na hin? Wraa kaan Nyiɛkpɔɔ na. 24 A ŋunu wre na tia pra sɛ loplombo mblɛ pra kala fnɛ mu taa Daniel na, mna tia pra u wa jirae wee pre yii, pre na pe chiɛlɛ, na pe biile ni mna sɛ pe wa jirae pre nu. Hali pe nsra ta mu to wee kre lam, na jirae pre pe wla mu pe yɛ ŋga. 25 A Ŋunu Darius na nyunɔ mu sɛ leele pre kro, na waŋgrɛ, na yolo nyininyini yofɛɛnlɛ pre kro ŋga mbo,
“Nyiɛkpɔɔ wra ka yaa e wejinyiŋge na!
26 Ni mbra le na ndro ŋmba uu wa ni ŋunumulie ŋga jaara kpan fna mbe Daniel Nyiɛkpɔɔ wre fiɛ, mbe u ŋga mɛɛ.
Wre uu ŋmaa ni,
a wre u ŋunumu lii
nyjila kro nu,
yaka wa jaa u ŋunumu kla fio,
a u jaŋga n nyukɔɔrɔ ni.
27 Wre u kawako kee pini,
nyjeeri na tra yiɛ na,
mbe yi tɛɛ mbe leele shɔ,
mbe ki ti pe peyɛ ta.
U Daniel shɔ jirae kɛɛ,
a pe n ja mu u gbo.”
28 Kee kro naa nyɔɔ na Daniel kaan Ŋunu Darius na Persia Ŋunu Cyrus nyjila.