Nyiɛkpɔɔ We Israel Ndie Tini
2
Nyiɛkpɔɔ na yo Hosea pan na u yo u wolo Israel leele pre pan na,“Mi Nyiɛkpɔɔ leele lɛ yire,
a ni e kori.
2 Ni biile, e e lo yiɛ kee yo u pan,
Ŋgi na hin? Ni chɔ ma na,
a u plɔ ma mi na.
E u yiɛ kee yo u pan,
mbe u u leŋgeere klaa,
na tiɛrɛɛ kee yire ti.
3 Na kre ma, mbe u yirɛ tini
mbe laala u na,
mbe u yire wejinwaara,
na ŋga ble pra u se yi.
Mbe ti mbe u pe na fimi tra,
ŋga ki sni gbeŋglen yi,
mbe gbɔɔ u gbo.
4 Mba u biile kori na,
ŋgi na? Tɛtiɛrɔɔ nyifɛɛrɛ
lafun wre biile lɛ.
5 Pe lo wre na yili u plɔ kro,
mna pe siire ta nyifɛɛrɛ nu.
Wre titi nyu nyaa mu yo mbo,
‘Mbe ni korifɛɛnlɛ kɔŋgɔ ni,
pre pe ni kaan sro, na nyumu,
na mbayooro, na jese chichie,
na olive simi, na simi gbɔwo.’
6 Kre kee ŋga u pe ŋga ndra na,
mi Nyiɛkpɔɔ we wuuro tɛɛ
mbe u tɔ kolo,
a mbe mboo sin mbe u fɛ
mbe kun,
mbe wa kolo nya mbe yili.
7 We u korifɛɛnlɛ pre kɔŋgɔ ni,
mbe pra, wa pe da,
we pe haa cha,
la, wa pe nya.
Kena u kna mbra yuu uyɛ pan mbo,
‘Mbe ndru mbe sɛ
ni plɔ lɔɔ wre pan,
ŋga ndaa wa u pan kre,
na prɔ ni aŋga na.’
8 U n jawa mu chin na
mi ndaa u ŋga shɔlɔ fa,
na simi gbɔwo, na olive simi,
na u swanyiɛ,
na u swafiŋge tataara,
a wra yi tɛɛ
na Baal sɛɛn kre sumi.
9 Kre kee ŋga u pe ŋga ndra na,
mba u ŋga shɔlɔ
na simi gbɔwo na.
Mbayooro, na jese chichiele
nyjɛ ndaa u ŋga,
a wra yonyi tin na toni kre,
mbe yi shɔ u pan.
10 Mbe u yirɛ tini mbe laala u na,
mbe wra tro wejinwaara,
u korifɛɛnlɛ pre yiɛ na,
a ndro wa ja mbe u shɔ ni kɛɛ.
11 U ble kpɔɛ
nyjɛ u lii yire krɛrɛ,
mbe ti mbe yi nyu to,
nyiɛpɔ fɔŋgɔ ble lie,
na Wuuble lie, na wre titi ble
nyjɛ u woni na lii yire kro.
12 U yuu na,
“U korifɛɛnlɛ pre sni na u ni,
mu afoe seele, na fig tinyi tɛɛ
mu u fɔlɔ tɔ.
Mbe ti yi kro nyaa,
mbe nyaa lam yurɛ yi ka.
13 Ble nyjɛ nu u ni fɛɛ,
mu sɛ na tuwe ndiom tɛɛn sroi,
na sɛɛn Baal kaan na ki sumi,
mbe yiri mbe feelee,
na ndiile yirɛ tɛɛ mbe uyɛ san,
mbra u korifɛɛnlɛ
pre kɔŋgɔ nini kre ndra na,
mbe u ndie tini.”
Mi e Tafun Nyiɛkpɔɔ wre,
ni ki yo.
14 “Kre kee ŋga ndra na,
mbe paara na u ni brɛmm,
mbe u jawala kna,
mbe sɛ na u ni fimi tra
kre nu na.
15 Mbe ti mbe u ndru,
mbe u tre seele yire ta na.
Mbe ti landɛɛ ŋga nu
wra kala nya kre kaari
dankna lawee u pan.
Bawa we na mɛɛ koni,
na u bichabim nyjila kre yi,
nyjila ŋga nu wra yili Egypt tra nu kre.
16 Kre nyjila kre nu,
we ndru mbe ni yeeri u plɔ.
Wa ni yeeri u tafun Baal na.
Mi e Tafun Nyiɛkpɔɔ wre,
ni ki yo.
17 A mba ti mbe sɛɛn Baal mɛɛ
yili u nyuu,
a mba ti mbe u sɛɛnlɛ yire
ka mɛɛ sɔɔnri na.
18 Kre nyjila kre nu,
mbe yila Israel na,
mbe mba ti nyaalam yurɛ,
na hanyiɛlɛ,
na yurɛ mblɛ pe fulo
gbun na kro
jaa ni leele pre pe sisaa ka.
A mbe bɛŋɛ, na snimi, na ŋunɔ
kee wɔ mbe yili tra kre nu,
mbe ki ti pe tni wejinyiŋge nu.
19 Na kre nyjila kre waa da,
mbe Israel wru mbe pe ni chɔ
nyjila kro nu,
mbe kpra li na u ni,
mbe u kori, mbe u fooro chin,
mbe u wru mbe pe
ni wo nyjila kro nu.
20 A mbe li ni nyuyoo na,
mbe u yii kɛ shiin,
mbe ki ti u chin, na mi wi
u Tafun Nyiɛkpɔɔ wre.
21 Kre nyjila kre mbe loo pe pan,
mbe ki ti nyiɛ wo tra kre na.
22 Mbe ki ti shɔlɔ, na tre sɛnyi,
na olive tinyi nyjɛ yii wa,
Jezreel landɛɛ nu yire kro nyu.
23 Mbe ni leele pre tɛɛ tra kre nu,
mbe pe kɛ nyu.
Pre leele mblɛ pan ndaa yo na,
‘Ni n pe kori kre.’
Mbe ndru mbe pe kori.
Pre mblɛ pan ndaa yo na,
‘Ni leele ma na kre.’
Mbe ndru mbe yo pe pan na,
‘Ni leele lɛ yire.’
Mbe pe yo na,
‘O Nyiɛkpɔɔ wi ŋu.’”