Hosea Na Chlɔ Tɛtiɛrɔɔ Wre
3
O Tafun Nyiɛkpɔɔ na yo mi Hosea pan mbo, “Hosea, ndru mu sɛ nyina mu chɔ wre pan na mu u kori, kii wa na blɔ fuŋu u kori, a ki tia u tiɛri. U kori imi na mi e Tafun Nyiɛkpɔɔ Israel leele kori kre. Kii wa na pe sɛ taa sɛɛnlɛ kro, mu na tinyi sɛnyi wɛɛ teeri na sra woni na yi kaan, nde nii wa mu pe kori tɛ.”2 Ki tia ni swafiŋge kɛmbɔkunɔ, na shɔlɔ nyjɛ snamu yi da kradnɛ fuloe shiin na kɛmbɔkunɔ tɛɛ mu u lɔ. 3 A ni yo u pan na, “Fuŋga rɛ, ni wo wi ŋu. Ki fna mbe mu kpra li mbe ni ŋga, la, kie mu mbe o chin mbe sni mbe mbra.”
4 Kre kee ŋga ndra na, kie mu mbe Israel leele chin mbe ŋunu, ndee yɛklo ta, a pan kie mu mbe pe chin mbra sra woni Suminyuŋgo wa, a srawɔɔ, ndee sumiɛ kolo ka n wa mbe pe tro ki na mbe Nyiɛkpɔɔ wie mbe u nyina kee ŋga u chaa. 5 La, nyjila kaa wa na paan mbe Israel leele pre ndru mbe pan o Tafun Nyiɛkpɔɔ wre, na pe ŋunu David nana wre pan. Na ki waa pan ma, pie o Tafun Nyiɛkpɔɔ wre fiɛ mbra seeri u yiɛ, a we nyu pe na, yire ble hɛnyi yire nu.