Nyiɛkpɔɔ Paara Mu Israel Taan
4
Israel leele, e kee ŋga o Tafun Nyiɛkpɔɔ yuu loo. Nyiɛkpɔɔ wa na kala ni mu yire mblɛ ee wa mu tni tra kre nu kre taan.Kpralie, na koroo,
na Nyiɛkpɔɔ chiŋgɛ n wa
tra kre nu.
2 Suŋgɔ kee, na kafinɛ,
na juuro, na leŋgeere klaa,
na linkuuro kee bribri
yi tra kre shɔ mu ta.
3 Yire kee nyjɛ ndra na,
tra kre yua,
a leele, na nyaa lam yurɛ,
na hanyiɛlɛ, na lɔɔ yurɛ
kro na kuu.
Nyiɛkpɔɔ Paara Mu Pe Srawɔfɛɛnlɛ Taan
4 O Tafun Nyiɛkpɔɔ yo mbo,
“Ndro waashia kala cha
na u ŋmbrɔ ni, ndee
mbe kala taa u ŋmbrɔ na finfin.
Yire Israel srawɔfɛɛnlɛ ni
ni krɔ kun kpɔɔ.
5 Lafo na blee e gbroi.
A pan chɔɔ e keenyanyofɛɛnlɛ
pre gbroi na.
Kre kee ŋga ndra na
mbe e lo Israel wre kla.
6 Ni leele pre we kla
ŋga pe n ni chin kre ndra na.
E srawɔfɛɛnlɛ pre je
na pia ni chin,
mu ni kee nyjɛ ni pe nyina
yire je.
Ki tia ni e je na,
a mba e biile wru
mbe pe ni leele na.
7 Imi na e srawɔfɛɛnlɛ
pre nɛɛi kre, pan e sisaa pini
ni na na yaa,
ki tia mbe buuro ŋga ee ta
kre kaari yɛkuuro.
8 Ni leele pre sisam
nyjɛ pe pini yire na e eyɛ taa,
a ki tia e na pe leni gbeŋmbaa
pra sisaa pini na yaa.
9 Mbe ni srawɔfɛɛnlɛ pre
na ni leele pre kro ndie tini.
E kro we e sisam nyjɛ e pe
yire fɔtɔɔrɔ ta.
10 Ee sra wɔ yirɛ yire ta
mbe ka, a nde yaa yɔɔ.
Ee sɛ tiɛri sɛɛnlɛ nyinyi nu,
a yaa biile ta mbe se,
ŋgi na hin?
E laa ni kro
mu sɛ taa sɛɛnlɛ na.
11 Simi ŋga nu alɛɛ nyi,
na ŋga nu alɛɛ n wa
yire gbɔɔ tia
ni leele pre jawala la.
12 E sɛ na jawala chaa tinyi pan,
tiŋge kɔɔn ki e nyina
kee ŋga e chaa mbe chin.
Pan e nyi na chlɔ
ŋmba u kaari tɛtiɛrɔɔ wi.
E laa ni kro mu sɛ eyɛ wru
mu sɛɛnlɛ ŋga.
13 Nyuɛ ndrɛ na e shie
na sra woni,
na tuwe ndiom tɛɛn
sroi nyambie bɛɛlɛ,
na tinyi nyjɛ wrɛ yi tɔ zuu,
a yi nyimi tna jaara.
Kre kolo ŋga na
e bichiɛlɛ pre troi na tiɛri,
a e biile chiɛlɛ pre
na leŋgeere klai.
14 La, mba pe ndie tini,
ŋgi na hin?
Yire bilɛ pre shie
tiɛrifɛɛnlɛ pre pan,
a yire na pre na shie
na sra woni sɛɛnlɛ yire na.
Yire titi jijiere kie e dɔɔya.
15 Kii wa na yire Israel leele
sɛ tiɛri, la, yaashia ti
mbe Judah leele pre,
kre sisam kre nyini pe.
Yaashia sɛ sumi Gilgal,
ndee Beth-Aven a na.
A yaashia sɛ yire wa
mbe mi e Tafun Nyiɛkpɔɔ
ŋmba nii wa nyjila kro nu
wre mɛɛ tɛɛ mbe da.
16 Israel leele ndie kan na napɔlɔ
ŋmba ndie ki kan wi.
Mni mbe pe mbe sɛ na pe ni
kahaa chichie nu
na mbaala lɛ hin?
17 Yire Israel leele sɛ
taa sɛɛnlɛ kro, e laa yi kro.
18 Na pe simi ta mu gbɔ mu to,
kre pe pe tiɛrɛɛ kee yire pini,
a pe ŋulo pre nyifɛɛrɛ
kee kori.
19 Pie pe wru mbe sɛ
na legboo fuflɛ ki pe wru,
mbe nyifɛɛrɛ pe gbo
sra nyjɛ pe woni
na sɛɛnlɛ kaan yire na.”